ဆာ​လံ 108 - မြန်​​​မာ့​​​စံ​​​မီ​​​သမ္မာ​​​ကျမ်း​​

အောင်ပွဲအတွက် တောင်းလျှောက်ခြင်း

ဒါဝိဒ်​၏​ဆာလံ​သီချင်း

¹ အို ဘုရားသခင်​၊ အကျွန်ုပ်​၏​စိတ်နှလုံး​သည် တည်ကြည်​ပါ​၏​။ အကျွန်ုပ်​သည် သီချင်းဆို​၍ အကျွန်ုပ်​၏​စိတ်ဝိညာဉ်​ဖြင့် သီဆိုချီးမွမ်း​ပါ​မည်​။

² စောင်းပြား​နှင့်​စောင်းကောက်​တို့​၊ နိုးထ​ကြ​လော့​။ အရုဏ်ဦး​ကို​လည်း ငါ​နိုးထ​စေ​မည်​။

³ အို ထာဝရဘုရား​၊ အကျွန်ုပ်​သည် လူမျိုးတကာ​တို့​အလယ်​တွင် ကိုယ်တော်​၏​ကျေးဇူးတော်​ကို ချီးမွမ်း​ပါ​မည်​။ လူ​တို့​အလယ်​တွင် ကိုယ်တော်​ကို သီဆိုချီးမွမ်း​ပါ​မည်​။

⁴ အကြောင်းမူကား ကိုယ်တော်​၏​မေတ္တာကရုဏာ​တော်​သည် ကောင်းကင်​ထိ​တိုင်အောင်​ကြီးမား​၍ ကိုယ်တော်​၏​သစ္စာ​တော်​သည် မိုးတိမ်​ထိ​တိုင်အောင်​ရောက်​ပါ​၏​။

⁵ အို ဘုရားသခင်​၊ ကိုယ်တော်​သည် ကောင်းကင်​အထက်​၌​ချီးမြှောက်​ခြင်း​ရှိ​ပါစေသော​။ ကိုယ်တော်​၏​ဘုန်းအသရေ​တော်​သည်​လည်း ကမ္ဘာမြေ​တစ်ခွင်လုံး​ကို လွှမ်းမိုး​ပါစေသော​။

⁶ ကိုယ်တော်​ချစ်​တော်မူ​သော​သူ​တို့​သည် လွတ်မြောက်​ခြင်း​သို့​ရောက်​မည့်​အကြောင်း ကိုယ်တော်​၏​လက်ယာ​လက်​တော်​ဖြင့်​ကယ်တင်​ပြီး အကျွန်ုပ်​တို့​ကို ထူး​တော်မူ​ပါ​။

⁷ ဘုရားသခင်​သည် မိမိ​၏​သန့်ရှင်းရာဌာန​တော်​မှ မိန့်​တော်မူ​သည်​မှာ “​ငါ​သည် ရွှင်မြူး​ခြင်း​ရှိ​လျက် ရှေခင်​မြို့​ကို​ခွဲဝေ​၍ သုကုတ်​ချိုင့်ဝှမ်း​ကို​တိုင်းတာ​ဝေခြမ်း​မည်​။

⁸ ဂိလဒ်​ပြည်​ကို ငါ​ပိုင်​၏​။ မနာရှေ​ပြည်​ကို​လည်း ငါ​ပိုင်​၏​။ ဧဖရိမ်​ပြည်​သည် ငါ​၏​သံခမောက်​ဖြစ်ပြီး ယုဒ​ပြည်​သည် ငါ​၏​ကျိုင်း​တော်​ဖြစ်​၏​။

⁹ မောဘ​ပြည်​သည် ငါ​၏​ခြေဆေးအိုး​ဖြစ်​၏​။ ဧဒုံ​ပြည်​အပေါ် ငါ့​ဖိနပ်​ကို​ငါ​ပစ်ချ​မည်​။ ဖိလိတ္တိ​ပြည်​အပေါ် ငါ​အောင်ပွဲခံ​ကြွေးကြော်​မည်​”​ဟူ၍​ဖြစ်​၏​။

¹⁰ မည်သူ​သည် ငါ့​ကို ခံတပ်​မြို့​သို့ ခေါ်ဆောင်​သွား​မည်နည်း​။ မည်သူ​သည် ငါ့​ကို​ဧဒုံ​ပြည်​သို့ ပို့ဆောင်​ပေး​မည်နည်း​။

¹¹ အို ဘုရားသခင်​၊ ကိုယ်တော်​သည် အကျွန်ုပ်​တို့​ကို ငြင်းပယ်​တော်မူ​ခဲ့​သည်​မ​ဟုတ်​လော​။ အို ဘုရားသခင်​၊ ကိုယ်တော်​သည် အကျွန်ုပ်​တို့​၏​ဗိုလ်ခြေ​များ​နှင့်အတူ ချီတက်​တော်​မ​မူ​ပါ​။

¹² ရန်သူ့​လက်​မှ​လွတ်​ရန် အကျွန်ုပ်​တို့​ကို​ကူညီမစ​တော်မူ​ပါ​။ အကြောင်းမူကား လူ​ပေး​သော​ကယ်တင်​ခြင်း​သည် အချည်းနှီး​ဖြစ်​ပါ​၏​။

¹³ ငါ​တို့​သည် ဘုရားသခင်​အားဖြင့် ရဲရင့်​စွာ​ပြု​ကြ​မည်​။ ကိုယ်တော်​သည် ငါ​တို့​အား​ရန်ဖက်ပြု​သော​သူ​များ​ကို နင်းချေ​တော်မူ​လိမ့်မည်​။