ကမ္ဘာဦး 25 - မြန်မာ့စံမီသမ္မာကျမ်းအာဗြဟံ၏အခြားမိန်းမနှင့်သားများ 1 အာဗြဟံသည် မိန်းမနောက်ထပ်တစ်ယောက်ယူ၏။ သူ၏အမည်မှာ ကေတုရ ဖြစ်၏။ 2 ထိုမိန်းမသည် အာဗြဟံအတွက် သားဇိမရံ၊ ယုတ်ရှန်၊ မေဒန်၊ မိဒျန်၊ ဣရှဗက်နှင့် ရှုအာ တို့ကိုမွေးဖွားပေး၏။ 3 ယုတ်ရှန်သည် သားရှေဘနှင့်ဒေဒန်ကိုရ၏။ ဒေဒန်မှဆင်းသက်လာသောသူများမှာ အာရှုရိမ်လူမျိုး၊ လေတုရှိမ်လူမျိုးနှင့် လုမ်မိမ်လူမျိုး တို့ဖြစ်ကြ၏။ 4 မိဒျန်၏သားများမှာ ဧဖာ၊ ဧဖေရ၊ ဟာနုတ်၊ အဘိဒနှင့် ဧလဒါ တို့ဖြစ်ကြ၏။ ဤသူအပေါင်းတို့သည် ကေတုရ၏သားမြေးများဖြစ်ကြ၏။ 5 အာဗြဟံသည် မိမိပိုင်ဆိုင်သောအရာအားလုံးကို ဣဇက်အား ပေး၏။ 6 မိမိမယားငယ်တို့၏သားတို့ကိုကား အာဗြဟံသည် လက်ဆောင်ပစ္စည်းများပေး၍ မိမိအသက်ရှင်စဉ်တွင် သူတို့ကို မိမိသားဣဇက်နှင့်ဝေးရာ အရှေ့ပြည်သို့ လွှတ်လိုက်လေ၏။ အာဗြဟံသေဆုံးခြင်း 7 အာဗြဟံအသက်ရှင်ခဲ့သောနေ့ရက်နှစ်ကာလမှာ တစ်ရာခုနစ်ဆယ့်ငါးနှစ်ဖြစ်၏။ 8 အာဗြဟံသည် အိုမင်းရင့်ရော်၍ သက်တမ်းစေ့သောအခါ နောက်ဆုံးထွက်သက်ထွက်၍သေဆုံးပြီး မိမိလူမျိုးတို့စုစည်းရာသို့ ရောက်လေ၏။ 9 သူ၏သား ဣဇက်နှင့်ဣရှမေလတို့သည် မံရေမြို့အရှေ့ဘက်၊ ဟိတ္တိလူမျိုးဇောဟာ၏သား ဧဖရုန်၏လယ်၌ရှိသော မပ္ပေလလိုဏ်ဂူတွင် သူ့ကိုသင်္ဂြိုဟ်ကြ၏။ 10 ထိုလယ်သည် ဟေသအမျိုးသားတို့ထံမှ အာဗြဟံဝယ်ယူထားသောလယ်ဖြစ်၏။ အာဗြဟံကို သူ၏မယားစာရာနှင့်အတူ ထိုအရပ်တွင် သင်္ဂြိုဟ်ကြလေ၏။ 11 အာဗြဟံကွယ်လွန်ပြီးနောက် သူ၏သားဣဇက်ကို ဘုရားသခင်ကောင်းချီးပေးတော်မူ၏။ ဣဇက်သည် ဗေရလဟဲရောအရပ်၌ နေထိုင်၏။ ဣရှမေလ၏ဆွေစဉ်မျိုးဆက် 12 စာရာ၏ကျွန်မ၊ အီဂျစ်အမျိုးသမီး ဟာဂရက မွေးဖွားပေးသော အာဗြဟံ၏သား ဣရှမေလ၏ဆွေစဉ်မျိုးဆက်မှာ ဤသို့ဖြစ်၏။ 13 ဣရှမေလ၏သားတို့အမည်ကား ဤသို့တည်း။ သူတို့၏အမည်များကို ကြီးစဉ်ငယ်လိုက်စဉ်သော် ဣရှမေလ၏သားဦးမှာ နဗာယုတ်၊ ထို့နောက် ကေဒါ၊ အာဒဗေလ၊ မိဗသံ၊ 14 ထို့နောက် မိရှမ၊ ဒုမာ၊ မာစ၊ 15 ဟာဒဒ်၊ တေမ၊ ယေတုရ၊ နာဖိရှနှင့် ကေဒမာဖြစ်၏။ 16 ဤသူတို့ကား ဣရှမေလ၏သားများဖြစ်ကြ၏။ ဤသူတို့၏အမည်များကို သူတို့၏ရွာများ၊ သူတို့စခန်းချရာအရပ်များအလိုက်ခေါ်တွင်ကြ၏။ သူတို့သည် မိမိတို့မျိုးနွယ်စုများအလိုက် ခေါင်းဆောင်တစ်ဆယ့်နှစ်ပါးဖြစ်ကြ၏။ 17 (ဣရှမေလအသက်ရှင်ခဲ့သောနှစ်ကာလမှာ တစ်ရာသုံးဆယ့်ခုနစ်နှစ်ဖြစ်၏။ သူသည် နောက်ဆုံးထွက်သက်ထွက်၍သေဆုံးပြီး မိမိလူမျိုးတို့စုစည်းရာသို့ ရောက်လေ၏။) 18 သူတို့သည် ဟဝိလအရပ်မှ အီဂျစ်ပြည်၏အရှေ့ဘက်၊ အဆီးရီယားပြည်သို့သွားသောလမ်း၌ရှိသည့် ရှုရအရပ်တိုင်အောင် နေထိုင်ကြ၏။ သူတို့သည် မိမိညီအစ်ကိုအပေါင်းတို့နှင့် ရန်ဘက်ပြုလျက် နေထိုင်ကြ၏။ ယာကုပ်နှင့်ဧသောမွေးဖွားလာခြင်း 19 အာဗြဟံသားဣဇက်၏အတ္ထုပ္ပတ္တိကား ဤသို့ဖြစ်၏။ အာဗြဟံသည် သားဣဇက်ကိုရ၏။ 20 ဣဇက်သည် ပါဒန်အာရံပြည်မှ အာရံလူမျိုးဗေသွေလ၏သမီး၊ လာဗန်၏ညီမ ရေဗက္ကာကို မိမိမယားအဖြစ်ယူသောအခါ အသက်လေးဆယ်ရှိ၏။ 21 ဣဇက်သည် မိမိမယားမြုံသောကြောင့် သူ့အတွက် ထာဝရဘုရားထံဆုတောင်း၏။ ထာဝရဘုရားသည် သူ၏ဆုတောင်းသံကိုနားညောင်းတော်မူ၍ သူ၏မယားရေဗက္ကာသည် ကိုယ်ဝန်ဆောင်လေ၏။ 22 သို့သော် ကလေးတို့သည် ဝမ်းထဲ၌အချင်းချင်းတိုးဝှေ့ကြသဖြင့် ရေဗက္ကာက “ကျွန်မ၌ အဘယ်ကြောင့် ဤသို့ဖြစ်ရသနည်း”ဟု ဆိုလျက် ထာဝရဘုရားအား မေးမြန်းရန် သွားလေ၏။ 23 ထာဝရဘုရားက “သင်၏ဝမ်းထဲ၌ လူမျိုးနှစ်မျိုးရှိ၏။ သင့်အထဲမှ လူမျိုးနှစ်မျိုးခွဲထွက်လာလိမ့်မည်။ လူမျိုးတစ်မျိုးသည် အခြားတစ်မျိုးထက်အင်အားကြီးမားလိမ့်မည်။ အကြီးသည် အငယ်ကိုအစေခံရလိမ့်မည်”ဟု သူ့အား မိန့်တော်မူ၏။ 24 ထို့နောက် ရေဗက္ကာသည် သားဖွားရန်နေ့လစေ့လေ၏။ သူ၏ဝမ်းထဲ၌ သားအမြွှာရှိ၏။ 25 အဦးဆုံးမွေးလာသောသားသည် အသားအရေနီ၍ သူ၏တစ်ကိုယ်လုံးသည် သားမွေးခြုံထည်ကဲ့သို့ဖြစ်၏။ သူ၏အမည်ကို ဧသော ဟုမှည့်ခေါ်လေ၏။ 26 ထို့နောက်မှ သူ၏ညီသည် ဧသော၏ဖနောင့်ကို မိမိလက်ဖြင့်ဆုပ်ကိုင်လျက်မွေးလာ၏။ သို့ဖြစ်၍ သူ၏အမည်ကို ယာကုပ် ဟုမှည့်ခေါ်လေ၏။ ထိုသားတို့မွေးဖွားကြသောအခါ ဣဇက်သည် အသက်ခြောက်ဆယ်ရှိပြီဖြစ်၏။ ဧသောက သားဦးအရာကိုရောင်းစားခြင်း 27 သူငယ်တို့သည် ကြီးပြင်းလာသောအခါ ဧသောသည် တော၌ကျင်လည်သောမုဆိုးကောင်းဖြစ်၏။ ယာကုပ်မူကား လူရိုးလူအေးတစ်ယောက်ဖြစ်၍ တဲ၌နေလေ့ရှိ၏။ 28 ဣဇက်သည် တောကောင်သားကိုခံတွင်းတွေ့သောကြောင့် ဧသောကိုချစ်၏။ ရေဗက္ကာမူကား ယာကုပ်ကိုချစ်၏။ 29 တစ်နေ့တွင် ယာကုပ်သည် ဟင်းချက်ပြုတ်နေစဉ် ဧသောသည် တောမှ မောပန်းလျက်ပြန်လာ၏။ 30 ဧသောက ယာကုပ်အား “ငါသည် မောပန်းနေသဖြင့် ငါ့ကို ထိုဟင်းနီနီလေးကျွေးပါ”ဟု ဆို၏။ (ထို့ကြောင့် သူ၏အမည်ကို ဧဒုံ ဟုခေါ်ကြ၏။) 31 ယာကုပ်ကလည်း “သင်၏သားဦးအရိုက်အရာကို ငါ့အား ယခုရောင်းပါလော့”ဟု ဆို၏။ 32 ဧသောကလည်း “ငါသေလုပြီဖြစ်၍ ဤသားဦးအရိုက်အရာသည် ငါ့အတွက် မည်သည့်အကျိုးရှိမည်နည်း”ဟု ဆို၏။ 33 ယာကုပ်ကလည်း “ယခုကျိန်ဆိုပါ”ဟု ဆိုသဖြင့် ဧသောသည် ကျိန်ဆို၏။ ဤသို့ဖြင့် ဧသောသည် မိမိ၏သားဦးအရိုက်အရာကို ယာကုပ်အားရောင်းလေ၏။ 34 ထိုအခါ ယာကုပ်သည် မုန့်နှင့်ပဲနီဟင်းကို ဧသောအားပေးသဖြင့် သူသည် စားသောက်ပြီးမှ ထ၍ ထွက်သွားလေ၏။ ထိုသို့ ဧသောသည် သားဦးအရိုက်အရာကို မထီမဲ့မြင်ပြု၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative