AmaHubo 30 - IBHAYIBHELI ELINGCWELE

Ukubonga kosindisiweyo ekufeni

Ihubo. Igama lokuvula indlu. ElikaDavide.

¹ Ngiyakuphakamisa, Jehova, ngokuba ungikhuphulile; awuvumanga ukuba izitha zami zijabule phezu kwami.

² Jehova Nkulunkulu wami, ngakhala kuwe, wangiphilisa.

³ Jehova, umphefumulo wami uwukhuphulile endaweni yabafileyo, wangiphilisa phakathi kwabashona emgodini.

⁴ Dumisani uJehova nina enimkhonzayo, nibonge igama lakhe elingcwele.

⁵ Ngokuba ukuthukuthela kwakhe kuba ngokomzuzwana nje, umusa wakhe uba ngowokuphila konke; kusihlwa kungena ukukhala, ekuseni ukujabula.

⁶ Mina ngithe ekubuseni kwami: Angisoze nganyakaziswa naphakade.

⁷ Jehova, ngomusa wakho ubuwenzile ukuba iqine intaba yami; wabufihla ubuso bakho, ngase ngithuthumela.

⁸ Ngakhala kuwe Jehova; nganxusa kuJehova, ngathi:

⁹ “Kukhona nzuzoni egazini lami nasekushoneni kwami egebeni na? Uthuli luzakukudumisa yini, lushumayele iqiniso lakho, na?

¹⁰ Yizwa, Jehova, ube nomusa kimi; Jehova, yiba ngumsizi wami.”

¹¹ Waphendula ukukhala kwami kwaba ngukusina; wangikhumula izingubo zami zokulila, wangembathisa ukujabula,

¹² ukuze umphefumulo wami ukudumise, ungathuli; Jehova Nkulunkulu wami, ngizakukubonga kuze kube phakade.