Mathewu 20 - IsiZulu 2020

Izisebenzi Zesivini

¹ “Ngokuba umbuso wezulu ufana nomuntu ongumninindlu, owaphuma ekuseni ukuyoqasha izisebenzi ukuba ziye esivinini sakhe.

² Esevumelene nezisebenzi ngodenariyu ngosuku, wazithumela esivinini sakhe.

³ “Waphuma futhi ngehora lesithathu, wabona abanye bemi esigcawini, bengenzi lutho;

⁴ nakubo wathi: ‘Hambani nani niye esivinini; ngiyakuninika okufaneleyo.’

⁵ Bahamba-ke. “Wabuye waphuma futhi ngehora lesithupha nangelesishiyagalolunye, wenza kanjalo.

⁶ Kuthe ngehora le-11, wathola abanye bemile, wayesethi kubo: ‘Nimeleni lapha usuku lonke ningenzi lutho na?’

⁷ “Bathi kuye: ‘Ngokuba akukho muntu osiqashileyo.’ “Wathi kubo: ‘Hambani nani niye esivinini.’

⁸ “Kusihlwa, umninisivini wathi enduneni yakhe: ‘Biza izisebenzi, uziholele imali yazo, uqale ngezokugcina, ugcine ngezokuqala.’

⁹ “Kuthe lapho zifika ebeziqashwe ngehora le-11, kwaba yileso naleso sahola udenariyu.

¹⁰ Kepha kuthe sekusondela ezokuqala, zacabanga ukuthi zizokwemukela okukhulu, kodwa nazo zaholelwa udenariyu, umuntu ngamunye.

¹¹ “Kuthe seziwemukela zakhononda kumninindlu,

¹² zathi: ‘Laba abokugcina basebenze ihora elilodwa nje, kodwa ubaholela njengathi esithwale ubunzima nesifudumezi semini.’

¹³ “Kepha waphendula wathi komunye wabo: ‘Mngani, angikuqoli; kanti asivumelananga yini ngodenariyu na?

¹⁴ Thatha okungokwakho, uhambe; kepha ngiyathanda ukumholela nalo wokugcina njengokuba ngikuholele nawe.

¹⁵ Angivunyelwe yini ukwenza engikuthandayo ngokungokwami na? Ngabe iso lakho libi, ngenxa yokuba ngiyephana na?’

¹⁶ “Kanjalo-ke abokugcina bayakuba ngabokuqala; abokuqala babe ngabokugcina.”

UJesu Ukhuluma Okwesithathu Ngokuhlupheka Kwakhe

¹⁷ Kwathi uJesu esekhuphukele eJerusalema, wathatha abafundi abayishumi nambili, waqhelela nabo eceleni. Sebesendleleni, wathi kubo:

¹⁸ “Bhekani, sikhuphukela eJerusalema, iNdodana yomuntu izakukhashelwa kubaphristi abakhulu nezazimthetho; banqume ukuba ife.

¹⁹ Bazakuyinikela kwabezizwe ukuba iklolodelwe, ishaywe, ibethelwe esiphambanweni, kodwa ngosuku lwesithathu izakuvuswa.”

Isicelo SomkaZebedewu

²⁰ Kwase kuza kuye unina wamadodana kaZebedewu namadodana akhe. Wakhuleka, wayesecela okuthile kuye.

²¹ UJesu wathi kuye: “Ufunani na?” Wathi kuJesu: “Yisho ukuthi lawa madodana ami amabili ayakuhlala, enye ngakwesokunene sakho, enye ngakwesokhohlo sakho, embusweni wakho.”

²² UJesu waphendula wathi: “Anikwazi enikucelayo. Ningasiphuza yini isitsha engizakusiphuza na?” Bathi kuye: “Singasiphuza.”

²³ Wathi kubo: “Kuyiqiniso, nizakusiphuza isitsha sami, kodwa ukuhlala ngakwesokunene nangakwesokhohlo sami, akusikho okwami ukuphana ngakho, kepha kungokwalabo abakulungiselelwe nguBaba.”

²⁴ Sebekuzwile lokhu abayishumi, bazithukuthelela izelamani ezimbili.

²⁵ Kepha uJesu wababiza, wathi: “Niyazi ukuthi ababusi bezizwe bazithwalisa kanzima, nezikhulu zazo ziziphethe ngamandla anzima.

²⁶ Nokho akuyukuba njalo phakathi kwenu, kodwa yilowo nalowo ofuna ukuba mkhulu phakathi kwenu, makabe yisikhonzi senu.

²⁷ Nalowo ofuna ukuba ngowokuqala phakathi kwenu, makabe yinceku yenu,

²⁸ njengalokhu iNdodana yomuntu ingezelanga ukukhonzwa, kodwa ukukhonza nokunikela ngokuphila kwayo, kube yisihlengo sabaningi.”

UJesu Uvula Amehlo Ezimpumputhe Ezimbili

²⁹ Kuthe sebephuma eJerikho, balandelwa yisixuku esikhulu.

³⁰ Kwakuhleli izimpumputhe ezimbili ngasendleleni. Zathi zingezwa ukuthi uJesu uyadlula, zamemeza zathi: “Nkosi, Ndodana kaDavide, sihawukele!”

³¹ Kepha isixuku sazikhuza, sathi azithule, kodwa zamemeza kakhulu kunakuqala, zithi: “Sihawukele, Nkosi, Ndodana kaDavide!”

³² UJesu wema, wazibiza wathi: “Nifuna ukuba nginenzeleni na?”

³³ Zathi kuye: “Nkosi, ukuba amehlo ethu avuleke.”

³⁴ UJesu waba nesihawu wathinta amehlo azo; zase ziyabona masinyane, zamlandela.