AmaHubo 98 - IsiZulu 2020

Ukuhubela USimakade Ihubo Elisha Ngezimangaliso Zakhe

Ihubo

¹ Hubelani uSimakade ihubo elisha, ngokuba wenze izimangaliso, esokunene sakhe nengalo yakhe engcwele kumzuzele ukunqoba.

² USimakade uyenze yaziwa insindiso yakhe, ukulunga kwakhe wakwembula emehlweni abezizwe.

³ Uwukhumbulile umusa wakhe nokwethembeka kwakhe kwabendlu yakwa-Israyeli. Yonke imikhawulo yomhlaba iyibonile insindiso kaNkulunkulu wethu.

⁴ Hlokomelani uSimakade mhlaba wonke, qhumukani, nihlabelele ngenjabulo, nihube amahubo.

⁵ Mhubeleni uSimakade ngehabhu, ngehabhu nangezwi lehubo,

⁶ ngamacilongo nangokukhala komtshingo, hlokomani ngezwi lokuhalalisa phambi kweNkosi uSimakade.

⁷ Ulwandle maludume nakho konke okukulo, nezwe nabakhileyo kulo.

⁸ Imifula mayishaye ihlombe, izintaba zihube ndawonye ngentokozo,

⁹ phambi kukaSimakade, ngokuba uyeza, uzokwehlulela umhlaba. Uzolehlulela ngokulunga izwe, nezizwe ngobuqotho.