Thukhente 20 - Zokam International Version

Israel-te in Benjamin-te Sim

¹ Tua ciangin Dan pan Beersheba dong le Gilead gam panin Israel-te kuankhia uh a, khekhatkhai bangin Mizpah a TOPA mai-ah a kikhawm uh hi.

² Pasian mite kikhopna ah Israel beh makaite zong kikhawm uh a, galkapte namsau tawi tul zali a pha hi.

³ (Benjamin-te in Israel-te Mizpah ah a paitoh khit lam a za uh hi.) Tua ciangin Israel-te in, "Hih a cikzethuai thu a pianzia hong gen in," a ci uh hi.

⁴ Tua ciangin numei kithatnu pasal Levi-pa in, "Benjamin gama Gibeah ah kei le ka zino a tam dingin ka tung uh hi.

⁵ Zan ciangin Gibeah a mite in ka nung hong zui-in kei thah hong sawm uh a, ka tunna inn hong um uh hi. Ka zino buangawp uh a, a si hi.

⁶ Ka zino pua-in ka semnen khit ciangin Israel luahna kual ciat ah bak khat ciat ka khak hi, bang hang hiam cihleh amaute in hih banga a daihuai lanluatna Israel sungah a gamta uh hi.

⁷ No Israel-te khempeuh aw, tu-in na ngaihsutna uh gen un," a ci hi.

⁸ Mi khempeuh khekhatkhai bangin ding zuah uh a, "Kuamah inn ah i ciah kik kei ding hi. Khat beek inn ah a ciah i om peuhmah kei ding hi.

⁹ Ahi zongin Gibeah ah i hih ding hih bang ahi hi: Eite ai in hong lamlah bangin a sim dingin i kuanto ding hi.

¹⁰ Israel beh khempeuh panin galkapte an pua dingin mi zakhat ciangin sawm, tulkhat ciangin zakhat le tulsawm ciangin tulkhat i sehkhia ding hi. Tua ciangin Benjamin-a Gibeah a ah galkap buppi a tun ciangin Israel sungah a zummawh-zahmawh gamtatna uh i thuaksak zo pan ding hi.

¹¹ Tua ciangin Israel mite khempeuh kithutuak uh a, khuapi sim dingin khekhatkhai a bang uh hi.

¹² Israel behte in Benjamin behte lakah mi paisak kawikawi uh a, "Na bawl uh mawhna cikzet huai mahmah hi lo hiam?

¹³ Tu-in tua Gibeah a gamtatsiate ka thah theih nading uh leh Israel panin gitlohna i siaksiang theih nadingin tua mi tatsiate hong paikhia un," a cisak uh hi. Ahi hangin Benjamin-te in a mipih Israel-te thu a ngai kei uh hi.

¹⁴ Israel-te do dingin a khuapi tek panun Gibeah ah a kikhawm uh hi.

¹⁵ Benjaminte in Gibeah a teng a kitengkhia mi zasagih banah a khuapi tek panun namsau tawi mi tul sawmnih le tul guk a kaikhawm pak uh hi.

¹⁶ Hih galkapte khempeuh lakah a veikhoi, suangtangin samzang khat kap-a a khial lo a kitengkhia mi zasagih a om hi.

¹⁷ Benjamin a kisim lo, Israel in gal sim thei mi namsau tawi tul zali a khawm uh hi.

¹⁸ Israel-te Bethel a ah paito uh a, Pasian a dong uh hi. Amaute in, "Benjamin-te sim dingin kote kua masa ding ka hi uh hiam? a ci uh hi. TOPA in, "Judah masa hen," ci-in a dawng hi.

¹⁹ A zing ciangin Israel-te thoin Gibeah kiangah giahphual a sat uh hi.

²⁰ Benjamin-te do dingin Israel mite kuankhia uh a, Gibeah a, amaute langkhatah galphual mun a la uh hi.

²¹ Gibeah a Benjamin-te paikhia uh a, tua ni-in Israel-te tul sawmnih le tul nih a satlum uh hi.

²² Ahi hangin Israel mite khat le khat kihanthawn uh a, a ni masa ni-a a laknasa uh mun mah ah mun a va la kik uh hi.

²³ Israel-te pai to uh a nitak dong TOPA mai-ah kapin TOPA a dong uh hi. Amaute in, "Ka sanggamte uh Benjamin-te sim dingin ka kuanto kik ding uh hiam?" a ci uh hi. TOPA in, "Kuanto unla amaute sim un," ci-in a dawng hi.

²⁴ Tua ciangin a ninihna ni-in Israel-te in Benjamin-te a neh uh hi.

²⁵ Hih hunin amaute do dingin Benjamin-te Gibeah pan a kuankhiat uh ciangin Israel-te namsau tawi sinsen mi tulsawm le giat a sattuk beh lai uh hi.

²⁶ Tua ciangin Israel-te a vekpi un Bethel ah paito uh a, TOPA mai-ah tu-in a kap uh hi. Amaute in tua ni nitak dong an tang uh a, TOPA tungah haltum-a biaknate le kilawmtakna biaknate b a pia uh hi.

²⁷ Tuateh Israel-te in TOPA a dong uh hi. (Tua hun lai-in Pasian thukhun singkuangpi,

²⁸ Aaron tupa Eleazar’ tapa Phinehas a mai-a nasem den tawh a om hi.) Amaute in, "Ka sanggamte uh Benjamin sim dingin ka kuan kik ding uh hiam, kuan kik lo ding ka hi uh hiam?" ci-in a dong uh hi. TOPA in, "Kuan un, zing ciangin amaute no khut sungah kong pia ding hi," ci-in a dawng kik hi.

²⁹ Tua ciangin Israel in Gibeah kimkot ah buksimna a bawl uh hi.

³⁰ A ni thum ni-in Benjamin-te sim dingin kuan to uh a, a masa-a a hih bangun Gibeah langah panmun a la uh hi.

³¹ Benjamin-te amau do dingin khuapi panin a kizukkhia khin uh hi. A masa-ate mah bangin, Bethel zuatna lampi le Gibeah lampi tung - lopaang ah Israel-te mi sawmthum bang a sattuk ta uh hi.

³² Benjamin-te in, "A masa-a bangin zo ding hi ta hang ei," a cih laitakun, Israel-te in, "Lehdelhin khuapi pan hawlkhia-in lampi ah hawlmang ni ei," a ci uh hi.

³³ Israel mite khempeuh a omna mun tek panun kuankhia in Baal Tamar ah panmun la uh a, a buksim Israel-te zong Gibeah c nitumna d lam panin a diangkhia uh hi.

³⁴ Tua ciangin Israel mi galsim a siampente tulsawm Gibeah ah maisi-in a do uh hi. Kidona nasia lua ahi manin Benjamin-te in a siat dektak lam uh a thei kei uh hi.

³⁵ TOPA in Israel mai-ah Benjamin zo a, tua ni-in Israel-te in Benjamin-te namsau tawi cingteng 25,100 a satlum uh hi.

³⁶ Tua ciangin Benjamin mite in amaute a guallel ahilam a kithei uh hi. Tu-in Israel mite in Gibeah kianga a koih uh a buksimte muang uh ahi manin Benjamin-te a awn phot uh hi.

³⁷ A buksimte pawlin Gibeah sung thakhat in sim uh a, kithehzakin khuapi bup a vatlum khin uh hi.

³⁸ Khuapi panin meii bangin meikhu lianpi kitunsak ding Israel mite le a buksimte in a geelsa uh hi a,

³⁹ tua ciangin Israel-mite galphual ah kiheii kik dinga a geel uh ahi hi. Benjamin-te in Israel-te (sawmthum bang) liamsakin thah ding kipan uh a, "I kido masa bangin zo ding hi ta hang," a ci uh hi.

⁴⁰ Ahi hangin khuapi sungah meikhu lompi a khut ciangin Benjamin-te kihei uh a, a khuapi buppi kangkhu vantung lama kitungto a mu uh hi.

⁴¹ Tua ciangin Israel mite in amaute sim uh a, Benjamin in a tungah siatna tungta cih thei ahi manin a linglawng uh hi.

⁴² Tua ciangin Israel-te mai pan sehnel-gam lam manawhin a tai uh hi. Ahi hangin gal panin a suakta tuan kei uh hi. Tuateh khuapite pana kuan Israel mite in tua lai-ah amaute a sattuk uh hi.

⁴³ Amaute in Benjamin-te pum-um uh a, nisuahna-lam Gibeah kiang mahmah dong ah amaute khiangin baihtakin e a man uh hi.

⁴⁴ Benjamin-te tulsawm le giat tuk uh a, a vekun galdo siam vive ahi uh hi.

⁴⁵ Amaute kihei-in sehnel-gam lam manawhin Rimmon suangpi-a a taina uh lamdungah Israel-te in mi tulnga a sattuk uh hi. Amaute in Benjamin-te nung panin Gidom dong delh uh a, tul nih a sattuk beh lai uh hi.

⁴⁶ Tua ni-in Benjamin-te namsau tawi cingteng tulsawmnih le tulnga tuka, a vekpi-in galhang vive ahi uh hi.

⁴⁷ Ahi hangin sehnel-gam lamah mi zaguk kihei-in Rimmon suangpi ah tai uh a tua lai-ah kha li sung a om uh hi.

⁴⁸ Israel mite Benjamin-te kiangah kileh kik uh a, khuapite khempeuh ah a mihing a ganhingin a muh peuhpeuh uh namsau-in a vatgawp uh hi. A paina uh khuapi khempeuh mei-in a hal uh hi.