Thuhilhna 6 - Zokam International Version

¹ Sunni nuai-ah gitlohna adang khat ka mu a, mite tungah a gik mahmah hi:

² Pasian in mi khat a lungsima a deih teng a kim nadingin hauhna neihsa lamsa le minphatna pia-a ahi hangin Pasian in amah nopsasak loin ama tangin midang khat in nopsak lawh hi. Hih in a mawknapi hi-a a dahhuai gitlohna ahi hi.

³ Mi khat in ta za khat nei-in kum tampi nungta thei hi; amah bang tanvei nungta taleh ama daupaina a nopsakpih kei a, a kivui ding banga a kivui kei leh amah sangin lamhzui naungeek hoihzaw hi.

⁴ A khiatna nei loin paikhia a, khuamial ah ciah kikin ama min khuamial sungah kikhupcip hi.

⁵ Tua in ni mukha loin bangmah a theih loh hangin tua mipa sangin sawtvei tawlnga zaw a -

⁶ amah kum tul khat zahnih nungta ta leh ama daupaina nuam a sakpih kei hi.A vekun a paina mun uh kibang hi lo ahi hiam?

⁷ Mi khempeuh gimpih a kama ding bek hi napi, a ankam limna in phazo sak hun nei lo hi.

⁸ Mihai khat sangin mipil khat a hamphatzawkna bang ahi hiam? Mizawng khat in midangte mai-ah a omzia ding a theih hangin bang phatuam ahi hiam?

⁹ Ankam limna zon kawikawi sangin mita muhna hoihzaw hi. Hih zong a mawknapi hi a, huih nungdelh mah hi lel hi.

¹⁰ A piangkhiasa peuhmah min kivawhsa hi-in, mihing bang hiam cih a kitheisa hi a; amah sanga hatzaw khat a to ngam kuamah a om kei hi.

¹¹ Thu tam semsem leh khiatna nei lo semsem hi; tua in mi khatpeuh bang ci phattuamsak hiam?

¹² Mihing khat in a khiatna nei lo hun tomkha sung niliim banga a khenkhen sungin, mihing khat nuntak nadingin a hoih kua in thei ding ahi hiam? Amah a sih khit ciangin sunni nuai-ah bang piang ding cih ama tungah kua in gen thei ding ahi hiam?