Tamlawhna 4 - Zokam International Version

¹ aBangci in kham a hoihna kikin, a tee keuhkeuhte mual ahi hiam? Lampi dung tengah a siangtho suangmanphate kithehthang hi.

² Hun khat lai-a manphatna kham tawh a kiteh Zion tapate bang ci-in tu-in beelsekpa in a khuta a sek leibeel banga kingaihsun a hia!

³ Se-alte nangawn in a note nawi pia thei buang hiven, ka mite in lah sehnel-gam a kala-oh vasate bangin hehpihna a nei kei uh hi.

⁴ Naungekte dangtakin a lei uh a dangtunguah belh a; a tate un anlum a nget uh hangin kuamah in a pia kei hi.

⁵ Hun khat lai-a anlim nete kongzing lakah hawmsuak uh hi. Puan hoih pen nuai-a khangkhiate tu-in vutbuakna ah lum ta uh hi.

⁶ Ka mite dan thuakna pen, a huh ding khut khat zong a kikhak man lo thakhat thu-a a kilawnthal Sodom thuakna sangin lianzaw hi.

⁷ A kumpi tapate uh vuk sangin pakzaw uh a, nawizu sangin ngozaw uh hi. A pumpi uh ruby suang sangin ngilzaw a, amai puak uh sapphires b a bang hi.

⁸ Ahi hangin amaute tu-in suangmeihol sangin vomzaw uh a, lamdungah kuamah in a thei kei hi. A vun uh a guh tunguah belhcip a, ciangkhut bangin a keu hi.

⁹ Kialpi-a puksite sangin namsau a kithatte hampha zaw hi. A lo sunga piangte gaikhin uh a, an duha gawngtaam ahi uh hi.

¹⁰ Ka mite a kisuksiat lai-in a khuatuah siam numeite in an dingin a tate uh bawlin a huan uh hi.

¹¹ TOPA in a thangpaihna a vekin suahkhia ta hi, a heh luatna a sungkhia hi. Mei-in Zion hala a bulpite a kangtum hi.

¹² Leitung kumpite le leitung a teng mi peuhmah in Jerusalem kongpite ah galte a langte lut zo kei in teh ci-a a up laitak ahi hi.

¹³ Ahih hangin ama sungah a thumante sisan luanna a piangsak kamsangte mawhna hang le siampite ginatlohna hanga piang ahi hi.

¹⁴ Tu-in amaute in mittawte bangin kongzing teng a zawt kawikawi uh hi. A puantualpite uh kuama lawn ngam loh dingin sisanin a nin hi.

¹⁵ Mite in, "Mi ninte paikhia un," ci-in amaute ki-otsan hi. "Paikhia un! Paikhia un! Kote hong lawngkha kei un!" ci uh hi. Amaute tai-in a vak kawikawi na-uah minamte laka mite in, "Amaute hih lai-ah om thei nawn lo ding uh hi," ci uh hi.

¹⁶ TOPA mahmah in amaute thehthangin amaute a cing nawn kei hi. Siampite kipahtawi loin upate a ki-angvan kei hi.

¹⁷ Tua tham loin huh ding lamena ka khua dakdakna un ka mit uh kham ta hi; ka tausang panun ko hong hon zo lo ding minam ka galet uh hi.

¹⁸ Mite in ka khekhap uh hong zui a, ka kongzingte uah ka vakkhia thei kei uh hi. Ka hun beina uh tungta ahi manin ka ni uh bei ta a, ka hun uh a nai ta hi.

¹⁹ Hong nungdelhte vana muvanlai sangin manlangzaw uh hi; mualtungah hong zandelh uh a, gamsungah zong hong buksim uh hi.

²⁰ TOPA sathau nilhsa ka naksuk ka naktohna uh amaute’ thangah a awk ta hi. Kote in minamte lak ama liim nuai-ah i nungta ding hi, ci-in ka ngaihsun uh hi.

²¹ Uz gama teng no Edom Tanute aw, nuamin kilungdamsak un. Ahi hangin note tungah zong tua hai mah hong kihawm veve ding a, khamin na guaktang un na om ding uh hi.

²² Zion Tanu aw, na dan thuakna beita ding hi. Amah in nang salin hong kikaisak nawn kei ding hi. Ahi hangin Edom Tanu aw, na mawhna dan hong pia dinga, na gitlohnate a pholak ding hi.