Rome-te 12 - Zokam International Version

A Nungta Biakpiakna

¹ Tua ahi manin sanggamte aw, a siangtho le Pasian lungkimna ahi a nungta biakpiakna ahi dingin na pumpi uh na piak nadingun Pasian lainatna hangin kong kun hi. Tuamah lah na khalam d biakna uh ahi hi.

² Hih leitung deihna tawh kizui-in na gamta nawn kei unla, na lungsim uh thaksuaksakin na kipumkhel un. Tua hileh a hoih, a lungkimhuai, a hoihkim Pasian deihna bang ahi hiam, cih khentel thei-in na pakta thei ding uh hi.

³ Ahang in, nangma hina tan sanga a sangzaw-in nang le nang kingaihsun kei in. Ahi hangin Pasian in nang hong piaksa upna zah tawh kizui-in amaan thukhenna tawh nang le nang na kingaihsut nadingin ka ngahsa hehpihna hangin note tungah kong gen hi.

⁴ I pumpi in pumpi na tampi nei ciat a, tua pumpi nate khempeuh a nasep a kibat loh mah bangin,

⁵ a tampi eite in zong Christ sungah pumpi i suaka, eite khempeuh khat le khat a kizom dimdiam i hi hi.

⁶ Eite in hong kipiasa hehpihna tawh kizui-in letsong a tuamtuam i ngah hi. Mi khat letsong thugen theihna ahileh amah in ama e upna tawh kituakin zang ta hen.

⁷ Nasepna a ngah leh sem ta hen; Laihilhna a ngah leh limtakin hilh ta hen;

⁸ hansuah theihna a ngah leh hansuah ta hen; midang kitasamte huh theihna a ngah leh cinghtakin huh ta hen; makaihna a ngah leh kiciantakin uk ta hen; lainatna lahtheihna a ngah leh lungtaitakin lak ta hen.

Itna

⁹ Itna, a taktak hi pelmawh ding hi. Gitlohna na mudah un, a hoih na pom cinten un.

¹⁰ Note khat le khat unau ki-itna kho tawh na ki-it thuk un. No sangin midangte a sangzaw-in na kipahtawi thuk un.

¹¹ Hahkat lo ngei kei unla, khalam hanciamna ah lenkipin Topa na sem un.

¹² Lametna ah lungnuam unla, thuaksiatna ah lungduai-in, thungetna ah muanhuai un.

¹³ Pasian mi a kitasamte na hawm un. Zindo na siam un.

¹⁴ No hong bawlsiate thupha na pia un; thupha na pia unla, na hamsiat kei un.

¹⁵ A lungdamte tawh na lungdam khawm un; a dahte tawh na dah khawm un.

¹⁶ Note khat le khat na kithuhual un. Kisathei kei unla, dinmun niamte f tawh na kikhawl khawm nuam un. Na kimisak kei un.

¹⁷ Khatpeuh gitlohna, gitlohna-in na thuk kik kei un. Mikim muhna-ah amaana gamtat ding na hanciam un.

¹⁸ Ahih theih leh nang tunga a kingak laiteng mikim tawh na kilem un.

¹⁹ Ka lawmte aw, phu na la kei un; Pasian thangpaihna adingin na awnzaw un. Ahang in, Topa in: "Phulakna keima aa ahi hi. Keimah in ka thuk kik ding hi." g ci hi.

²⁰ Tua sangsik in: "Na galpa a gil a kial leh na vak in; a dangtak leh a dawn ding bang khatpeuh na pia in. Hih bangin na hih leh amau lutungah mei-am vumsak na hi ding hi.," h ci-in kigelh hi.

²¹ Gitlohna kizosak kei unla, a hoih tawh gitlohna na zo un.