Piancilna 2 - Zokam International Version

¹ Tua bangin vante le leitung - na khempeuh a vekpi-in kimansiang dimdem hi.

² A ni sagihna ni-in Pasian in asepsep pen zota a; a ni sagihna ni-in a sep khempeuh pan tawlnga b hi.

³ Pasian in a ni sagihna ni thupha pia-in siangthosak hi, bang hang hiam cih leh tua ni-in a sepsa piansakna khempeuh panin a tawlnga hi.

Adam le Eve

⁴ Hih in vante le lei a kipian-sak lai-a piansak zia ahi hi. TOPA, Pasian in leitung le vante a bawl lai -

⁵ leitung c ah guah zusak nai loin leitang ah nasem ding mi om lo a, gamlak singteh sawlbawkte leitung d ah dawkkhia nai loin, gamlak lopate a menkhiat ma,

⁶ ahi hangin TOPA Pasian in lei maitang buppi kawtsak dingin ciktuite e phulkhiasaka-

⁷ TOPA Pasian in leitang vui panin mi f bawla a nak vang sungah nuntakna huu muamin mi pen a nungta khat suak hi.

⁸ Tu in TOPA Pasian in nisuahna lam Eden ah huan khat bawl zo hi;Tua munah a bawlsa mipa koih hi.

⁹ Tua ciangin TOPA Pasian in a etlawm ding le an a hoih dingin lei panin singkung nam khempeuh posak hi. Tua huan laizang ah nuntakna singkung le sia le pha theihna singkung a om hi.

¹⁰ Huan a kawtsak gun khat Eden panin luang hi; tua panin gun li-in kakhia hi.

¹¹ A masa min Pishon hi a, kham omna Havilah gam bup nawk hi.

¹² (Tua gama kham hoih hi; sing namtui nai g le onyx suang zong tua lai-ah a om hi.)

¹³ A nihna gun min Gihon hi-a Cush h gambup nawk hi.

¹⁴ A thumna gun min Tigris hi a, Asshur nisuahna lam dung zui-in luang hi. A lina gun min Euphrates ahi hi.

¹⁵ TOPA Pasian in mipa la-a Eden huan sung a sem ding le a kem dingin koih hi.

¹⁶ Tua ciangin TOPA Pasian in mipa thu pia a, "Huan sunga singkung peuhpeuh panin na ne thei hi;

¹⁷ ahi hangin a sia a pha theihna singkung panin na ne peuhmah kei ding hi; ahang in, tua na nek hunhunin na si pelmawh ding hi," ci hi.

¹⁸ TOPA Pasian in, "Tua mipa a tang om ding a hoih kei hi. Ama ading a kituak ahuh khat ka bawl ding hi," a ci hi.

¹⁹ TOPA Pasian in leitang panin leitung ganhing khempeuh le huih lak vasa khempeuh a bawl hi. Amah in min a phuah nop peuh a phuah dingin mipa kiangah tuate puak hi. Mipa in nuntakna nei ganhing khempeuh a min a phuah bangbang a min hi pahpah hi.

²⁰ Tua ciangin mipa in innsa khempeuh, huih lak vasa khempeuh le gamlak a ganhing khempeuh min a phuak hi. Ahi hangin Adam i ading a kituak a huh ding om lo hi.

²¹ Tua ciangin TOPA Pasian in mipa ihsipsak a, mipa ihmut kalin a nakguhte j khat la-in a lakna mun satakin dim hi.

²² Tua ciangin TOPA Pasian in mipa pana a lak nakguh k numei khatin bawl a, tuanu mipa a puak hi.

²³ Tua mipa in, "Tu-in hihin kei guh pana guh, kei sa pana sa ahi hi; amah pasal pana kilakhia ahi manin numei l kici ding hi," a ci hi.

²⁴ Hih thu hangin pasal in a nu a pa nusia in a zi tawh kigawm dinga, amaute sakhat suak ding uh hi.

²⁵ Mipa le a zi a nih un a guaktang un om uh a, a zum kei uh hi.