Phatna-late 144 - Zokam International Version

David phuah.

¹ Keima Suangpi, TOPA, ka khutte galsimzia sinsaka ka khutmete galdozia a sinsakpa kiphat ta hen.

² Amah ka nuai-ah mite a a nuaisiahpa hong it ka Pasian le ka kulhpi, ka mun muanhuai le kei hong hukhiapa hi in, ka lum le ka bukna ahi hi.

³ TOPA aw, na thudon dingin mihing bang hi-a, nang ngaihsut dingin mihing tapa bang ahi hiam?

⁴ Mi in huusan khat tawh kibang a; a nuntak hun niliim kikhinkhin tawh kibang hi.

⁵ TOPA aw, na vante khenkham inla hong paisuk in; mualte lawngin, mei khusak in.

⁶ Kek kiasak inla galte thehthang in; na thaltangte kap inla amaute taikeksak in.

⁷ A sangna pan na khutin hong bansuk inla; tui thahatte pan le gamdang mite khut panin kei hong dalin hong hukhia in,

⁸ amaute kam zuauthu tawh kidim a, a khut taklam uh zong zuautat hi.

⁹ Pasian aw, nang tungah lathak khat kong sak dinga; khauzang sawm kivawh lyre kong tum ding hi.

¹⁰ Nang, kumpite tunga hong gualzosak Pa, sih theihna namsau panin na nasem David a honkhiapa na hi hi.

¹¹ A kam uh zuauthu tawh a dim, a khut taklam uh zong a zuautat, gamdang mite khut pan kei hong hu-in hong suaktasak in.

¹² Tua hileh ka tapate uh a moi lai-un hoihtaka khang singno bang ding uh a, ka tanute uh kumpi inn zep nadingin hoihtaka kikhuaka kizem khuampite bang ding uh hi.

¹³ Ka saalte uh an namkim tawh a dim ding hi. Ka tuute uh a tultul, a tul sawmsawmin ka lo lai-uah pung ding hi;

¹⁴ ka bawngtalte un vangik b a kai ding hi. Kulh vanna mun om lo dinga, sal-a kikai zong om loin, kongzing ah lungdong a kahna zong a om kei ding hi.

¹⁵ Hih bang thu tawh a kituak mite thupha ngah hi-a; amaute Pasian, TOPA ahi mite thupha ngah ahi hi.