Paunakte 28 - Zokam International Version

¹ Migilote kuama delh lohin tai-a, mi thumaante ahileh humpinelkai bangin kihtak a nei kei hi.

² Gam khatah kilehdona a om ciangin gam-uk tampi a nei hi-a, theihtelna le theihna nei mi khat ahileh gam khat a uk zo hi.

³ Mizawngte b a nuainet gam-ukpa ankungte a hawkmang guah tawh kibang hi.

⁴ Thukham a thusimlote in migilote pakta a, thukham zuite’n ahileh amaute dal hi.

⁵ Mi tatsiate in thutang theitel lo uh a, TOPA a zongte in ahileh a cingin theitel sinsen uh hi.

⁶ A lungsim kawi mihau khat sangin kawkbaang lo-a gamta mizawng khat hoihzaw hi.

⁷ Thukham a zuipa thu theikak tapa hi-a, ahi hangin anhaite tawh kithuahpa in, a pa mindaisak hi.

⁸ Summet sangsak lua-a a hau totote, a zawngte tungah a migi ding midang khat ading a kholsak ahi hi.

⁹ Thukham a za nuam lo peuhmah a thungetna nangawn kihhuai hi.

¹⁰ Mi thutang khat gitlohna lam a zuisakpa ama thang mah ah awk dinga, kawkbaanna om lopa in ahileh gou hoih a ngah ding hi.

¹¹ Mihaupa ama mitin pil kisa thei dinga, ahi zongin thu theikak mizawngpa in amah a teltheih ding hi.

¹² Mi thumaante a gualzawh ciangin kithalawp mahmah a; migilote vang a liat ciangin mite bu uh hi.

¹³ A mawhnate a impa daupai lo a, pulaaka a tawpsan peuhmah ahileh kilainat hi.

¹⁴ TOPA a kihta tawntung mi thupha ngah hi-a, a lungtang khauhsakte ahileh a lungkham hi.

¹⁵ Mi cimawhte a uk migilo in humpi hawk le vompi hang mi delh tawh kibang hi.

¹⁶ Thumaan lo-a gam ukpa thukhentel thei lo hi-a, amaan lo-a ngah a mudah mi ahileh khansawt nuam a sa ding hi.

¹⁷ Tualthah khialhna hanga lunggim mi a sih mateng taitai ding hi; kuamah in huh kei hen.

¹⁸ Kawkbaang lo a nungtate kihonkhia dinga, a lungsim kawi mi ahileh thakhatin puk ding hi.

¹⁹ Ama leitang a kho mi in an tampi nei dinga, sunmang sansanpa zawng teitei ding hi.

²⁰ A muanhuaite thupha tampi kipia dinga, hauhpah a sawmte dan tuak loin a om kei ding hi.

²¹ Deihsak tuam neih hoih lo hi - anlum them khat hang nangawnin mi khial thei hi.

²² A iiksiik mi a haupah nuam hi-a, zawnna in a ngak lam a phawk kei hi.

²³ Maitang phat mi sangin a taihilh mi a nung ciangin kipaktazaw ding hi.

²⁴ A nu ahikeh a pa neihsa suta, "Khialhna hi kei," a cipa - amah a siasakpa tawh kipawl ahi hi.

²⁵ A huaiham mi in kiselna sosak hi; TOPA a muang mi ahileh a daupai ding hi.

²⁶ Amah le amah kimuangte mihai hi a, pilna tawh kalsuan mi ahileh kisuaktasak ding hi.

²⁷ Mizawngte tunga a piate bangmah tasam lo dinga, amau a kimuhmawh-bawlte ahileh hamsia tampi khu ding hi.

²⁸ Migilote vang a liat ciangin mite bu a, migilote a manthan ciangin ahileh a thumaante khangto ding hi.