Paunakte 11 - Zokam International Version

¹ TOPA in tawisuang maan lo kiha tehna maan lian ahileh a lungkim hi.

² Kisaktheihna in hong maimawlsak a, kiniamkhiatna ahileh pilna ahi hi.

³ A citakte a cihtakna un makaih a, a muanhuai lote ahileh a zuautatna un susia hi.

⁴ Thangpaih hunin hauhna in man nei lo a, thumaanna in ahileh sihna panin a hu hi.

⁵ Kawkbaanna om lo thumaanna in a mau adingin lamtang sialsak a, migilote ahileh amau gitlohna in a puksak hi.

⁶ A thutangte’ thumaanna in a maute hu-a, a muanhuai lote ahileh amau lunggulhna hoih lo ah a awk uh hi.

⁷ Migilo khat a sih ciangin ama lametna mangthang a, a vangliatna pana ki-ummawh teng a guaksuak hi.

⁸ Thumaan mipa lungkhamna pan kihu a, ama tangin migilopa tungah tung hi.

⁹ Pasian nei lopa kam in a vengpa susia a, theihna tungtawnin a thumaanpa suakta hi.

¹⁰ Thumaan mipa a daupai ciangin khuapi lungnuam a; migilo a manthan ciangin lungdam a kikona a om hi.

¹¹ Thutang mi khat’ thupha tungtawnin khuapi kitawisang a, migilo kam hangin khuapi kisia hi.

¹² Thu khencian thei lopa in a vengpa nuihsan a, thu theitelpa ahileh a ki-ip thei hi.

¹³ Mi kamtamte in thusim tehkha teitei a, a muantak mi in ahileh thu im hi.

¹⁴ A kimakaih lo minam puk a, mi tampi thudot in gualzawhna kician a tun hi.

¹⁵ Mel theih loh mi mawhna a puaksakpa in thuak pelmawh dinga, kiciamna-a khut beng nuam lopa a suakta ding hi.

¹⁶ A dik numei kizahtak a, a hiamgamh pasal in ahileh hauhna bek a ngah hi.

¹⁷ A migipa amahmah phattuamna hi-a, a kheltatpa ahileh amahmah siatna kitun ahi hi.

¹⁸ Migilopa thalawh thaman in khemna hi-a, thumaanna a vawhpa in ahileh pahtakman at teitei hi.

¹⁹ A thumaan taktak mi in nuntakna ngah a, gitlohna a delhpa in a sihlawh hi.

²⁰ TOPA in mihing lungsim lehtatte kih a, kawkbaang lo-a nungtate a pakta hi.

²¹ Hih thu telcian in: Migilote in dan tuak loin a om kei ding hi; a thumaan mite ahileh a suakta ding uh hi.

²² A kidawm thei lo numei melhoih, vok naka kham nakbah bat tawh kibang hi.

²³ A thumaante lunggulhna a hoih bekbek suak a, migilote lametna ahileh thangpaihna bek ahi hi.

²⁴ Mi khat in pia ziahziah napi, a tamzaw ngah a, adang khat cil tentan napi zawng semsem zaw hi.

²⁵ A cingh mipa a daupai dinga, midang a thamalhsakte amau kithamalhsak ahi hi.

²⁶ Antang kholkhol te kihamsiat a, a zuak nuamte thupha kikhusak hi.

²⁷ A hoih zongte in deihsakna mu uh a, gitlohna a zongte tungah gitlohna mah a tung ding hi.

²⁸ A hauhna a muang peuhmah puk dinga, thumaanna ahileh singteh pha hing tawh kibang ding hi.

²⁹ A innkuan tungah lunghimawhna a tun mi kihawmkhai dinga, mihaite, mipilte nasem a suak ding hi.

³⁰ Thumaanna gah in nuntakna singkung hi-a, mihing lungsim zo mi mipil ahi hi.

³¹ Thumaante in leitung ah thaman sang uh ahileh a pasian-milote le mawhneite in tam sanzaw ngel ve!