Paikhiatna 30 - Zokam International Version

Gimnamtui Biakna-tau

¹ "Gimnamtui hal nadingin singkha singin biakna-tau khat dawh in.

² A ningkim hi dinga, tong khat asau, tong khat azai, tong nih a sang a - a kite a tau tawh sakhat hi ding hi.

³ Atung, apangte le a kite kham citaktui luan inla, a kimkotah kham geihual neisak in.

⁴ A geihual nuai-a bulh dingin kham kual nih - apang tuakah nih - a zawnna zawlte khumna vanga zat dingin bawl in.

⁵ Singkha zawl sui inla khamtui luan in.

⁶ Tecipanna tung sana thoihdamna sin mai - Tecipanna singkuang mai-a puanzak mai - nang tawh i kituah nading munah biakna-tau koih in.

⁷ "Aaron in zingsang sima meivakte a puah ciangin biakna-tau tungah gimnamtui a hal pelmawh ding hi.

⁸ Amah in khang sawnsawnte donga TOPA mai-ah gimnamtui maanmaana a kihal theih nadingin nitak khuamui-a mei a vak ciangin gimnamtui a hal kik ding hi.

⁹ Hih biakna-tau tungah gimnamtui dang peuhmah ahikeh meihal biakna khatpeuh ahi-a, an-a biakna ahi zongin pia loin tua tungah dawntheih biakna na sung kei ding hi.

¹⁰ Aaron in tua biakna-tau kite tungah kum khatin khat vei thoihdamna a bawl ding hi. Khang sawnsawn dongin kumsim in hih mawhna hanga biakna sisan tawh thoihdamna kibawl pelmawh ding hi. Tua in TOPA tungah a siangtho pen ahi hi," a ci hi.

Thoihdamna Sum

¹¹ Tua ciangin TOPA in Moses tungah,

¹² "Israel mite kisim dinga misimna na bawl ciangin mikim in amah a kisim hun ciangin ama nuntakna a tatna TOPA a pia pelmawh ding hi. Tua hi a amaute na sim ciangin amau tungah pulpi a tung kei ding hi.

¹³ A kisimsate lak-a a pai peuhmah in biakbuk shekel b tawh kizui-in gerah sawm nih a gik shekel lang a liau ding uh hi. Hih shekel lang pen TOPA tungah biakna ahi hi.

¹⁴ A kisimsa khempeuh kum sawmnih le a tungsiah-te in TOPA tungah biakna a pia ding hi.

¹⁵ Na nuntakna tatna-a TOPA tungah biakna na piak uh ciangin a haute in shekel lang sanga tamzaw pia lo dinga, a zawngte in a tawmzaw a pia kei ding uh hi.

¹⁶ Israel mite tung panin tua thoihdamna sum sang inla Kikhopna Puanbuk-a nasep nadingin zang in. Tua thoihdamna pen na nuntakna uh tatna Israel-te adingin TOPA mai-ah, a tawntunga phawkna hi ding hi," a ci hi.

Kisilna Kuangpi

¹⁷ Tua ciangin TOPA in Moses tungah,

¹⁸ "Kisil nadingin sumngo kuangpi khat le a tunna sumngo in bawl in. Tua pen biakna-tau le Kikhopna Puanbuk kikalah koih inla a sungah tui koih in.

¹⁹ Aaron le a tapate in tua lai-ah a khut le a khete uh a sil ding uh hi.

²⁰ Kikhopna Puanbuk sungah a lut ding simun amaute a sih loh nadingun tui-in a kisil ding uh hi. Amaute in TOPA tungah mei-a biakna nasep khat pia dingin biakna-tau a naih uh ciangin

²¹ amaute a sih loh nadingun a khut a khete uh sil ding uh hi. Hih in Aaron le a suan a khak khang sawnsawnte adingin a kip den thuzek hi ding hi.

Nilh Sathau

²² Tua ciangin TOPA in Moses tungah,

²³ "A nuai-a a namtui hoihte: pak namtuikha, tui shekel c 500, singguithak namtui tua zah lang (tua pen shekel 250), kawltu namtui shekel 250,

²⁴ thaksiing namtui shekel 500 - a vekpi in munsiangtho shekel-a teh - le olive thau hin d khat la in.

²⁵ Nangmah in hihte paknamtui bawlte bawl bangin a namtui dingin nilh sathau siangtho-in bawl in.

²⁶ Tua ciangin tua tawh Kikhopna Puanbuk, Tecipanna singkuang,

²⁷ sabuai le a vanzat teng, meivak tunna le a nazat teng, gimnamtui halna biakna-tau,

²⁸ meihal biakna-tau le a vanzat teng le kuangpi le a tunna zut in.

²⁹ Tuate a siangtho pen ahi dingin na siansuah dinga, tuate a sukhate peuhmah a siangtho ding uh hi.

³⁰ "Aaron le a tapate in ka siampi na a sep theih nadingun sathau nilh inla amaute siansuah in.

³¹ Israel-te kiangah, ‘Hih in khang sawnsawnte dongin ka nilh sathau siangtho ahi hi.

³² Mihing pumpi tungah sung kei inla, a helkhawm zia kibang sathau dang bawl kei in. Tua in a siangtho hi; a siangtho-a na neih ding ahi hi.

³³ Tua tawh kibang paknamtui a bawl peuhpeuh siampite simloh midang tunga a zang peuhmah a mipihte panin kikhenkhia ding hi,’ ci in," a ci hi.

Gim-namtui

³⁴ Tua ciangin TOPA in Moses tungah, "A gim namtui - singnai kaw, onycha le galbanum le paknamtui citak a vekin a kikim la inla

³⁵ paknamtui bawlte bawl bangin a namtui-in bawl in. Ci kisawh dinga bangmah dang hel loh a siangtho ahi ding hi.

³⁶ Tua tawmkhat gawivui inla Kikhopna Puanbuk sunga Tecipanna mai, nang tawh i kituah nading munah koih in. Tua in nang tungah a siangtho pen hi ding hi.

³⁷ Nang mahmah in hih bang helzia tawh kibangin a namtui dang bawl kei in; TOPA tungah a siangtho-in nei in.

³⁸ Namtui a sak dinga tua tawh kibang a bawl mi peuhmah a mipihte panin kikhenkhia ding hi," a ci hi.