Paikhiatna 29 - Zokam International Version

Siampite Siansuahna

¹ "Amaute in ka siampi nate a sep theih nadingun nang sep ding hihte ahi hi: Kawkbaanna a nei lo bawngtalno khat le tuutal nih la in.

² Mangbuh-vui panin silngo sawh loin anlum bawl inla sathau tawh a kihel le tui le sathau tawh a kinuh moh bawl in.

³ Tuate lawh khat sungah koih inla, tua sungah tuate - bawngtal le tuutal nihte tawh piakhawm in.

⁴ Tua ciangin Aaron le a tapate Kikhopna Puanbuk sungah lutpih inla, amaute tui-in sil in.

⁵ Tua puante la inla puantungsilh, siampi puan-aktualpi, siampi puan-ak Aaron silhsak inla awmtuam tuamsak in. Ama tungah a siampi puan-ak, khutsiamte gat kawnggakin gak in.

⁶ A lutangah dialkhip khimsak inla, a dialah kumpi lukhu siangtho khusak in.

⁷ Nilh sathau la inla a lutungah sungin nilhsak in.

⁸ A tapate paipihin puantungsilhte silhsak inla

⁹ amaute dial khimsak in. Tua ciangin Aaron le a tapate a kawng gaksak in. Amaute adingin siampi hina a tawntunga kip thuzek ahi ding hi. Hih bangin Aaron le a tapate na kipsak ding hi.

¹⁰ "Kikhopna Puanbuk mai-ah bawngtal na paipih dinga, Aaron le a tapate in a lutungah a khut uh a nga ding uh hi.

¹¹ TOPA omna Kikhopna Puanbuk lutna mai-ah kigo ding hi.

¹² Bawngtalte sisan pawlkhat la-in, na khutme-in biakna-tau kite nuh inla, a val lai teng biakna-tau bulah sungkhia in.

¹³ Tua ciangin a gilpituam a thau khempeuh le a sin tuam le a kalte gel a tuam a thau tawh la inla, biakna-tau tungah tuate haltum in.

¹⁴ Ahi hangin bawngtal sa le a vun le a ekte giahphual pua-ah haltum in. Tua in mawhna hanga biakna ahi hi.

¹⁵ "Tuutalte khat la-in Aaron le a tapate in a lutungah a khut uh a nga ding uh hi.

¹⁶ Go-in a sisan na la dinga biakna-tau pangte na theh kim ding hi.

¹⁷ Tuutal semnenin a sungkua teng le a khete sawp inla, a lu le a sanen dangte tawh koih khawm in.

¹⁸ Tua ciangin biakna-tau tungah a tuutal buppi haltum in. Tua in TOPA tungah meihal biakna hi-a, a gim namtui TOPA tunga mei-a hal biakna khat ahi hi.

¹⁹ Tuutal a khat pen la-in Aaron le a tapate in a lutungah a khut uh a nga ding uh hi.

²⁰ Go-in, a sisan pawlkhat la inla Aaron le a tapate taklam bilhual, a taklam khutpi, le a taklam khepi ah nuhsak in. Tua ciangin biakna-tau tung apang khempeuh sisan theh in.

²¹ Tua ciangin biakna-tau tunga sisan pawlkhat le nilh sathau pawlkhat la inla, Aaron le a puansilhte le a tapate le a puansilhte uh tungah theh in. Tua ciangin amah le a tapate le a puansilhte uh sianthosaksa hi ding hi.

²² "Hih tuutal panin a thau, a mei thau, a sung thau, a sin tuam, a kalte gel a tuam a thau tawh a taklam phei la in. (Hih in kipsakna tuutal ahi hi).

²³ TOPA mai-a silngo sawh loh anlum lawh panin lum khat le sathau tawh kibawl moh khat le tui tawh kibawl moh khat la in.

²⁴ Hihte a vekin Aaron le a tapate khut sungah koih inla, TOPA mai-ah vei-a biakna-in vei in.

²⁵ Tua ciangin amaute khut panin lakhia inla, TOPA mai-ah a gim namtui meihal biakna tawh, TOPA tunga meihal biakna bawlna khat ahi dingin biakna-tau tungah haltum khawm in.

²⁶ Aaron kikipsakna tuutal iik na lak khit ciangin vei-a biakna-in "TOPA mai-ah vei in; tua pen nang tanh ding ahi hi.

²⁷ "Aaron le a tapate a kikipsakna tua tuutal sate: a kivei a iik le a kipia a pheite siansuah in.

²⁸ Hih in Israel mite tung pana Aaron le a tapate in a kaih den uh ahi ding hi. Hih in, Israel-te in TOPA tungah kilawmtakna biakna b a bawlna panun a piak ding uh siampite satanh ahi hi.

²⁹ "Aaron puansilh siangthote, a suan-le-khakte, tuate sunga a kikipsak ahi nadingin amau tang ding uh hi.

³⁰ Ama siampi za a laih a tapa, Kikhopna Puanbuk-ah Mun Siangtho-a biakna nasem dinga a pai ciangin tuate ni sagih sung a silh ding hi.

³¹ "Kipsak nadingin tuutal la inla, a siangtho mun khatah a sa huan in.

³² Kikhopna puanbuk lutna-ah Aaron le a tapate in tuutalsa le lawh sunga anlum a ne ding uh hi.

³³ Amaute kipsakna le siansuahna bawlna, thoihdamna biaknate amaute in a ne ding uh hi. Ahi hangin tuate siangtho ahi manin kuamah in a nekpih thei kei ding hi.

³⁴ Kipsakna tuutal sa ahi a, anlum khatpeuh ahi zongin zingsang donga a kikhamval leh haltum in. A siangtho ahi manin tuate a kine kei ding hi.

³⁵ "Nang kong thupiaksa bangin Aaron le a tapate adingin na khempeuh hih inla, amaute kipsak nading ni sagih sung hi ding hi.

³⁶ Thoihdamna bawl nadingin mawhna hanga biakna-in nisimin bawngtal khat ta pia in. Tua ading thoihdamna bawlna tawh biakna-tau siansuah inla, na apna-in sathau nilh in.

³⁷ Biakna-tau ading ni sagih sung thoihdamna bawl inla, siansuah in. Tua ciangin biakna-tau a siangtho pen suak dinga, a kisuk-khakpih peuhmah a siang ding hi.

³⁸ "Hih in biakna-tau ah nisim-a na piak den ding ahi hi: Kum khat a pha tuuno nih.

³⁹ Zingsangin khat pia inla, a khat pen khuamui-in pia in.

⁴⁰ Tuuno a khatna pen tawh annel hoih ephah c khat seh sawm suah seh khat le olive kisuk thau hin d khat seh li suah seh khat tawh helkhawm inla, dawntheih-a biakna dingin lenggahzu hin khat seh li suah seh khat tawh piakhawm in.

⁴¹ A tuuno dang khat khuamui in pia inla, zingsanga bangin an-a biakna le dawntheih-a biakna in - gim namtui dingin TOPA tungah mei-a biakna pia in.

⁴² "Khang sawnsawnte dongin hih meihal biakna TOPA mai Kikhopna Puanbuk lutna-ah a hun manmanin kibawl den ding hi. Tua lai-ah nang tawh i kituak dinga, nang kong hopih ding hi;

⁴³ tua lai-ah Israel-te tawh zong ka kituak dinga ka minthanna in tua mun na siansuah ding hi.

⁴⁴ Tua ciangin Kikhopna Puanbuk le biakna-tau ka siansuah dinga Aaron le a tapate ka siampi nasem dingin ka siansuah ding hi.

⁴⁵ Tua ciangin Israel-te lakah ka teng dinga amau Pasian ka hi ding hi.

⁴⁶ Amaute in keimah TOPA amaute Pasian, amaute lakah ka ten theih nadinga Egypt pana amaute a paikhiatpih pa ka hilam a thei ding uh hi. Keimah TOPA amaute Pasian, ka hi hi.