Paikhiatna 27 - Zokam International Version

Meihal Biakna-tau

¹ "Singkha singin biakna-tau tong c thum a sang khat dawh in; tua pen a ningkim hi dinga, tong nga sau-in tong nga zai d ding hi.

² A kiu lite ah ki neisak ciat-in, a ki le biakna-tau sakhat ahi theih nadingin biakna-tau sumngo-in luan in.

³ Van kizang khempeuh - vutbeelte, vutluahnate le thehna kuangkum, salepna sikkate le meiluahnate sumngo-in bawl in.

⁴ Tua-a zat dingin sumngo-in len phan inla akiu lite ah sumngo kual li vawh in.

⁵ Siklen in biakna-tau kim ciang a bat toh theih nadingin tua sikkualte biakna-tau khinta nuaiah omsak in.

⁶ Biakna-tau a zat ding singkha zawl sui inla, tuate sumngo tawh luan in.

⁷ Biakna-tau a kipuak ciangin tuate a pang lang tuakah a om nadingin a zawlte sikkual bil sungah khum in.

⁸ Tua biakna-tau singpek tawh bawl inla, a sung hawmsak in. Mual tunga nang hong kilaksa bang tektek hi ding hi.

Innhuang

⁹ "Biakbuk huang neisak in. Leitaw-lam pang tong e za khat sau-in limtaka kikhuk-a kigan puanzak nei dinga,

¹⁰ khuam sawm nih le sumngo bullen sawm nih, le a khuam tungah ngun vankhaite le a ngaknate a om ding hi.

¹¹ A leilu-lam pang zong tong sawmnih sau dinga, puanzak nei-in, khuam sawmnih le sumngo bullen sawm nih a khuamte tungah ngun van khaite le a ngaknate a om ding hi.

¹² "A huang nitumna-lam pang tong f sawmnga zai dinga, puanzak le khuam sawm le bullen sawm nei ding hi.

¹³ Nisuahna-lam pang nisuak lam manawh in huang zai-na tong sawmnga hi ding hi.

¹⁴ Puanzakte a lutna pang khatah tong g sawm le nga sau in, khuam thum le bullen thumte tawh hi in,

¹⁵ apang langkhat-a puanzak tong sawm le nga sau-in khuam thum le bullen thum tawh hi ding hi.

¹⁶ "Huang sung lut nadingin adum, adupsan, a-ausan khau, hoih taka kikhuk-a kigan puan - khut tawh phima khuite sep - khuam li le bullen li tawh tong sawm nih h a sau puanzak khat neisak in.

¹⁷ Huang kimkota khuamte khempeuh in, a gakna le vankhaite ngun, a bullente sumngo a nei ding hi.

¹⁸ A huang pen tong za khat sau in tong sawm nga zai i dinga, tong nga j a sang hoih tak-a kikhuk-a kigan puan le sumngo bullente tawh nei ding hi.

¹⁹ Biakbuk sunga nasepna-a kizang adang nate khempeuh, puanbuk khetphimte khempeuh dongin innhuanga kizang peuhmah sumngo kibawl hi ding hi.

Meivak Tunna ading Sathau

²⁰ "Meivakte a kuan tawntung theih nadingin, a kisuk olive thau siang, Israel-te in nang tungah hong puak nadingun thu pia in.

²¹ Tua Kikhopna Puanbuk sunga, Tecipanna mai puanzak pua-ah Aaron le ama tapate in nitaka kipan zingsang dong TOPA mai-ah mei a kuangsak tawntung ding uh hi. Hih in Israel-te adingin a kiptawntung khang kivaikhakna thuzek hi ding hi.