Misimna 17 - Zokam International Version

Aaron’ Ciangkhut Sel

¹ TOPA in Moses kiangah,

² "Israel-te hopih inla a pupa behte uh zui-in makai khat in ciangkhut khat, ciangkhut sawm le nih lasak in. A ciangkhut tungah a neipa min gelh in.

³ Pupa beh lutang khatah ciangkhut khat hi pelmawh ding ahi manin Levi ciangkhut tungah Aaron min gelh in.

⁴ Kikhopna Puanbuk sung nang tawh i kituahna mun Tecipanna mai-ah tuate koih in.

⁵ Ka teel mipa ciangkhut na sel dinga kei mahmah in hih panin Israel-te hong phunsanna ka beisak ding hi," a ci hi.

⁶ Tua ciangin Moses in Israel-te hopih a, amaute makaite in ciangkhut sawm le nih - a pupa behte makai khat panin khat ciat pia uh a, Aaron aa zong tuate lakah a om hi.

⁷ Moses in tua ciangkhutte, Tecipanna biakbuk-a TOPA mai-ah a koih hi.

⁸ A zing ciangin Tecipanna Puanbuk sungah Moses lut a, amah in Levi innkuan aitang dingin Aaron ciangkhut sel bek loin palh a, pakin almond a gah a mu hi.

⁹ Tua ciangin Moses in TOPA omna Israel-te kiangah ciangkhutte khempeuh a lakhia hi. Amaute in tuate en uh a, amau ciangkhut ciat a la kik tek uh hi.

¹⁰ TOPA in Moses tungah, "A lehdo mite tungah lim a hiden dingin Tecipanna mai-ah Aaron ciangkhut koih kik in. Amaute a sih loh nadingun hih in amaute hong phunsanna a beisak ding hi," a ci hi.

¹¹ Moses in TOPA thupiak bang tektekin a hih hi.

¹² Israel mite in Moses kiangah, "Si nung ei! Mang ta ung ei, mang ta ung ei!

¹³ TOPA biakbuk kianga paite nangawn si ding hi. Ka vekpi-un si khin ding ka hi uh hiam?"a ci uh hi.