Isaiah 56 - Zokam International Version

Midangte ading Hotkhiatna

¹ TOPA gen hih ahi hi: "Ka hotkhiatna nai mahmah ta a, ka thumaanna hong kilaak pah ding ahi manin thutang zang unla amaanin gamta un.

² Hih bangin gamta in hih thu lenkip a, Sabbath siasak loin tang a, gitlohna bawl lo dingin a khut a kem zote thupha ngah ahi hi," a ci hi.

³ Ama thu-a TOPA a pawl gamdang mipa in, "TOPA in a mite panin kei hong khenkhia taktak ding hi," ci kei hen. Tuateh cilgeh khatpeuh in, "Kei singkungkeu hi lel ing," ci-in phun kei hen.

⁴ Ahang in, TOPA gen hih ahi hi: "Ka Sabbath tangin ka lungkimna tel a, ka thukhun a kiplet cilgehte -

⁵ amaute tungah ka biakinnpi sung le a kawmte tungah tanute le tapate sanga a hoihzaw phawkdenna le minte ka pia ding hi. Amaute tungah a mang nawn lo ding a kip tawntung min ka pia ding hi.

⁶ Tua ciangin ama nasem ding, TOPA min a it ding, amah a bia ding, Sabbath tangin a siasak lo ding, ka thukhun a kiplet, TOPA pawlin a beel gamdang mite -

⁷ tuate ka mualsiangtho ah ka paipih dinga, ka thungetna inn sungah ka lungnuamsak ding hi. Ka inn minam khempeuh thungetna inn a kicih nadingin, amaute meihal biakna le a biakpiaknate uh ka biakna-tau tungah a kisang ding hi," a ci hi.

⁸ Thupipen TOPA - a kikhenthang Israel-te a kaikhawmpa in: "A kikaikhawmsa banah a omlaite amaute kiangah ka kaikhawm lai ding hi," a ci hi.

Migilote, Pasian’ Mawhsakna

⁹ Lo sunga om ganhing khempeuh hong pai un, tulaka om ganhing khempeuh hong pai unla nawmvalh un!

¹⁰ Israel galvilte a mit uh taw a, amaute khempeuh in bangmah a thei kei uh hi; amaute khempeuh a ham thei lo ui hi uh a, a tawng thei kei uh hi; lup bek si uh a, mang manmanin ihmut nuamsa uh hi.

¹¹ An a hai mahmah uite hi uh a, kham hun a nei kei uh hi. Amaute, theihtelna a nei lo tuucingte ahi uh hi; a vekun amau tum ciatin pai uh a, amau met nading a zong ciat uh hi.

¹² Amaute in, "Hong pai un, zu kong lup ding hi! I gilpi dimin zucil dawn ni. Zing ciang pen tuni mah bang dinga nuamzaw lai tham ding hi," ci uh hi.