Isaiah 5 - Zokam International Version

Lenggui Lo La

¹ Ka itpa ading a lenggui lo phuahna la khat ka sa ding hi: Mualpang lei hoihna khatah ka itpa in lenggui lo khat a nei hi.

² Amah in tua lei tang kal a, suangteng paikhia-in lenggui hoih pente a suan hi. A lo sungah buktau khat dawh a, lengtui sukna khuk khat a to hi. Tua ciangin lenggah hoih gah dingin lamen a, ahi hangin lenggah hoih lo gah mawk hi.

³ Tu-in no Jerusalem a tengte le Judah mite aw, kei le ka lenggui lo kikalah thu khen dih un.

⁴ Ka lenggui lo adingin ka hihsate longal, adang bang hih lai ding ka hi hiam? Lenggah hoih gah dinga ka lamet hi napi bang dingin a hoihlo bek gah mawk hiam?

⁵ Tu-in ka lenggui lo ka hih ding zia kong gen ding hi. A dai ka phelkhia dinga, a kisia ding hi; a kulh ka sukham dinga, a kituancil ding hi.

⁶ Lotul ka suaksak dinga kipuah loin kikho lo dinga, tua lai-ah lingkungte le thangling kungte a po ding hi. A tungah guah a zuk loh nadingin meiite thu ka pia ding hi," a ci hi.

⁷ Thahatpen TOPA’ lenggui lo pen Israel innkuan hi-a, a lungtunna huan lah Judah mite ahi hi. Amah in a thutang dingin lamen napi sisan luanna a mu hi; thumaanna a lamet hangin lungdonga kahna a za hi.

Gimnate le Thukhennate

⁸ Mun khat beek awng lo zahin inn khat le inn khat zoma lo khat le lo khat a zom leitang tunga no guak a tengte tungah gimna tung ta hen.

⁹ Thahatpen TOPA in ka zak tektekin: "Inn lianpite a hawmin kinusia dinga, inndei lianpipite ah a teng a om kei ding hi.

¹⁰ Lenggui lo acre a sawm ah lenggah-zu bath b khat piangin, anci homer c khat ah anhum ephah d khat bek a suak ding hi.

¹¹ Zingsangin tho baih a, a zu dawn ding delhin zu in a satsak pilpial dong zan sawt dong a tutkhote tungah gimna tungta hen.

¹² Amaute in pawi sungah harp-te le lyre-te, khuangtate le tamngaite le lenggah-zu nei uh a, ahi hangin TOPA nasepna thudon loin ama khutma a zahtak kei uh hi.

¹³ Tua ahi ciangin ka mite, theihtelna a neih loh manun sal a suak ding uh hi; a mi zaliante uh gilkialin si ding uh a, a mihonte uh dangtakin a keu ding uh hi.

¹⁴ Tua ahi ciangin hankhuk e in a ankam limsak a, ciangtan om loin a kam ka a; tua sungah a uliante uh le a mipite uh kitawng zuazua sa-in nuamsa-in a tumsuk uh hi.

¹⁵ Tua hi a, mite kikhiasukin mihing a kiniamkhiat ding hi; a kiphasakte mit a niam hah ding uh hi.

¹⁶ Ahi hangin Thahatpen TOPA a thutangna hangin kitawisang dinga, a siangtho Pasian in a thumaanna tawh a siangtho a hihna hong lak ding hi.

¹⁷ Tua ciangin tuute in amau lonona-a gamta bangin lopa ne ding uh a, mihaute’ mun kisiate ah tuunote a gamta f ding uh hi.

¹⁸ Zuauna khauzen-in mawhna kai a, leng khauhualpi-in gitlohna kai-in

¹⁹ "Pasian nasep i muh theih nadingin amah kinawhsakin manlangsak ni; i theihtheih nadingin kinaihsakin Israel Siangtho Pa ngimna tangtungsak pak ni," a cite tungah gimna tung ta hen.

²⁰ Gitlohna hoih ci a, migitna hoih lo ci-in khuavak tangin khuamial koih a, khuamial tangin khuavak koih in, a khum tangin a kha koih in, a kha tangin a khum a koihte tungah gimna tung ta hen.

²¹ Amau mita pil a kisate le amau muhna-a tei a kisate tungah gimna tung ta hen.

²² Zu dawna pasal tangte le zuhel dawn a siampente

²³ a mawhte golhsum-in khah a, mawhpengte’ thutanna a nialte tungah gimna tung ta hen.

²⁴ Tua ahi ciangin meikuang in buhtu a liahtum bangin, meikuang lai-ah lopa keu khulsuk bangin amaute zungte muat dinga, a pakte uh leivui bangin a leengmang ding hi; ahang in, amaute in Thahatpen TOPA thukham nial uh a, Israel Siangtho Pa kammal a simmawh uh hi.

²⁵ Tua ahi ciangin TOPA hehna a mite langkhatah kuangin a khut vikto-a amaute a sattuk hi. Mual liante kiling a, misi luangte kongzinga nin lompi bang hi. Hizahta khit nangawnin a hehna dam nai lo lai-a, a khut a vikto lailai hi.

²⁶ Amah in gamlapi a om minamte adingin dialkhai lek a, leimonga omte adingin phit a mut hi. Hih munah amaute manlangtakin a pai pah uh hi!

²⁷ Amaute khat beek gim loin kimuktu lo uh a, kuamah lusu loin a ihmu kei uh hi; a kawnggak uh zong kol lo a, a khedap kaih khau uh zong a kitat kei hi.

²⁸ Amau thaltangte hiam a, a thalte khempeuh uh keksa ahi hi; a sakol khecinte uh meisuang bangin a sakollengpeite uh pingpei a bang hi.

²⁹ Amaute humpinelkai bangin hawk uh a, humpinelkai khanglaite bangin a hawk uh hi. Amaute humhamin a sa nek ding uh man uh a, a hu ding kuamah om loin a puakhia uh hi.

³⁰ Tua ni ciangin amaute in tuipi hawk bangin a hawksan ding uh hi. Mi khatpeuh in gamsung a et ciangin khuamial le lungdonna bek a mu ding hi; khuavak nangawn meii in liah dinga a mial ding hi.