Isaiah 35 - Zokam International Version

Tatkhiatna hanga Lungnopna

¹ Sehnel-gam le gamgawtak a nuam ding hi; gamsimthamte lungnuamin a palhkhia ding uh hi. Mualheuh-pak bangin

² a pak uh kakhia dinga; nuam lua mahmah in lungdamin kiko ding uh hi. Lebanon minthanna kipia dinga, Carmel le Sharon thupina a kipia ding hi; amaute in TOPA’ minthanna le Pasian thupina a mu ding uh hi.

³ A thazaw khutte khauhsak unla, a zaw khukte kipsak un;

⁴ A lauthawng mite tungah, "Kihatsak un, lau kei un; na Pasian uh hong pai dinga phula dingin hong kuanin a siangtho dantuahsakna tawh note hong hon ding hi," ci un.

⁵ Tua ciangin mittawte mit kihonsak dinga bengngongte’ bil a kivaksak ding hi.

⁶ Tua ciangin khebaite sazuk bangin diang ding uh a, a pau thei lote lungdamin a awng ding uh hi. Gamsimtham ah tui phulkhia dinga sehnel-gam ah lui a luang ding hi.

⁷ A sa mahmah sehnel, bualtui suak dinga, leigawtakte ciktui phulna a suak ding hi. Khatvei lai-a ngiate lupna munah lopa, pumpeng le mau a po ding hi.

⁸ Tua lai-ah lam lianpi om dinga, Sianthona lampi a kici ding hi. A sianglo mite in tua a tung tawn lo ding uh a; tua Lampi tawnte ading tua bang ahi ding hi; a tatsia mihaite in tua tung a tawn kei ding uh hi.

⁹ Tua lai-ah humpinelkai om loin, tua tungah sasialne ganhing khatpeuh a pai kei ding hi; tua munah tuate a kimu kei ding hi. Ahi hangin tatsate bek tua lai-ah pai ding uh a,

¹⁰ TOPA in tatman a piaksate hong ciah kik ding uh hi. Amaute lasa kawmin Zion ah a lut ding uh hi; amaute lutungah a tawntungin lungnopna khu ding uh hi. Nopsakna le kipahna tawh kidim ding uh a, dahna le khuisatna beimang ding hi.