Isaiah 32 - Zokam International Version

Thumaanna Kumpi-gam

¹ En in, thumaana tawh kumpi khat in uk dinga, gam-ukte in thutangin a uk ding uh hi.

² Amaute huih pana kidalna, huihpi pana bukna bangin, sehnel-gam luitui bang le keugaw gama suangpi liim a bang ding uh hi.

³ Tua ciangin mite in amaute mitsinsan nawn lo ding uh a, amaute gen a zate in a ngai ding uh hi.

⁴ Lungtom mite lungsim in thei in tel dinga, dang-awkte dangnalin a pau sensen ding uh hi.

⁵ Mihaite, mi nampi kici nawn lo dinga micingtak lote nakpi in a kizahtak nawn kei ding hi.

⁶ Bang hang hiam cih leh mihaite hai pau uh a, gitloh ding bek a ngaihsun uh hi. A pasian-milohna na bek sem a TOPA tawh kisaite ahi lo lamin a thehzak hi; a gilkialte a hawmpi-in nusia a, a dangtakte tui dawn ding a pia nuam kei hi.

⁷ Mi cingtak lopa sepzia kheltatna bek hi-a, a tasamte in thutanga a ngetna nangawn khemna tawh a suksiat nadingin gitloh ding bek a sawm hi.

⁸ Ahi hangin mi thupi in na thupite mah ngim a, nasep thupi ah a kip hi.

Jerusalem Numeite

⁹ A om hithiat numeite aw, tho unla ka thugen ngai un. Awlmawh a nei lo tanute aw, kong gen dingte za un!

¹⁰ Kum khat valzek khit ciangin bangmah a awlmawh lote na ling ding uh hi; lenggah kila thei lo dinga an lak hun hong tung kei ding hi.

¹¹ No a om hithiat numeite aw, ling un; no awlmawh nei lo tanute aw, lau-in ling un! Na puante uh hawkkhia unla, na kawnguah ippi puan teng un.

¹² Logam hoihte lenggui gahphate le

¹³ thangling le lingkung in a ponelh ka mite’ leitang adingin na dip uh hum un - hi hi, lungdamna innte khempeuh le hih khuapi a kipahpihte khempeuh adingin thum un.

¹⁴ Mun muanhuaite kisusia in, a gamlum khuapi kilawi ding hi; mualbote le tausangte gamkhing suak den dinga, laate gamtatna mun le bawnghonte lonona mun a suak ding hi;

¹⁵ eite tungah a sangna pan Kha a kibuak mateng, sehnel-gam, logam hoih a suah mateng le logam hoihte tulak a bat matengin a tuaci om den ding hi.

¹⁶ Sehnel-gamah thutang teng dinga, logam hoih ah thumaanna teng ding hi.

¹⁷ Thumaanna gah lemna hi dinga; thumaanna hangin daihna le kimuanna a om tawntung ding hi.

¹⁸ Lungmuangtaka tenna mun, inn muanhuai le bangmah in nawngkaisak lo-a khawlna munah ka mite a teng ding uh hi.

¹⁹ Gialpi in tulak dengzanin khuapi a kimaihtam kiuhkeuh zongin,

²⁰ luidung ah na khaici uh tuh a, na bawngtalte uh le na laate uh note utnana-a a khah note thupha ngah mahmahte na hi ding uh hi.