Isaiah 21 - Zokam International Version

Babylon’ Langah Genkholhna

¹ Tuipi gei-a sehnel-gam tawh kisai thusuak: Pingpeite in leitaw-lam a kantan bangin sehnel-gam pan - a lauhuai gam panin a sim ding khat hong kuan hi.

² A kihtakhuai mangmuhna khat kei hong kilak a: Migilopa in lehhek a, a luhpa in a luh hi. Elam aw sim in, Media aw umcih in! Ama piansak taunate khempeuh ka beisak ding hi.

³ Hih bangin na sa-in ka gawnggawp a, numei nausuak nat bangin natna in hong tun hi; ka zak thu hangin ka genthei a, ka muhte hangin ka lung mang hi.

⁴ Ka lungsim hema, launa in hong lingsak hi; ka ngaklah nidial kei tungah launa a suak hi.

⁵ Amaute in sabuai gualin sualphah puan phah uh a, ne in a dawn uh hi! No uliante aw, tho un lumte sathau nuh un!

⁶ Topa in kei tunga hong gen hih ahi hi: "Pai inla galvil khat omsakin a muhte gensak in.

⁷ Sakollengte a sakolte tawh laa tunga tuangte ahikeh kala-oh tuangte a muh ciangin beltakin, belcingtakin vil hen," hong ci hi.

⁸ Tuateh galvilpa a kiko a, "Ka topa aw, ni khat khit ni khat galvilna-tau tungah ka ding hi; zan simin ka vilna munah ka om hi.

⁹ En in, sakolte kaih sakolleng-in mi khat hong pai hi. Amah in dawng kik a: ‘Babylon puk khin, puk khin ta! A pasiante limte khempeuh lei lakah kitamzan ta!’ ci hi," a ci hi.

¹⁰ Ka mite, ka ancilna phuala cilsate aw, Israel Pasian tung pan, Thahatpen TOPA tung pana ka zaksa kong gen hi.

Edom’ Langah Genkholhna

¹¹ Dumah b tawh kisai thusuak: Seir panin mi khat in kei hong sam a, "Galvilpa aw zanhun bang tan om lai hiam? Galvilpa aw zanhun bang tan om lai hiam?" hong ci hi.

¹² Galvilpa in, "Zan zong hi ta a, zingsang hidek ta hi; nong dot nop uh leh hong dong un; hong kileh kik unla hong dong lai un," ka ci hi.

Arabia’ Langah Genkholhna

¹³ Arabia tawh kisai thusuak: Dedan mi khualzin honte Arabia gamlak a giahphual satte aw,

¹⁴ a dangtakte adingin tui puak un; no Tema a tengte aw, galtaite adingin an puak un.

¹⁵ Amaute namsau pan, a kidoksa namsau panin thal keksa pan le gal husa pana taite ahi uh hi.

¹⁶ Topa in kei tungah hong gen hih ahi hi: "Kiciamna in a letcip nasempa banga kisim kum khat sungin Kedar galkap honpi a bei ding hi.

¹⁷ Thal tawi a omlai sunte, Kedar galhangte, a tawm ding hi," TOPA Israel Pasian in gen khin hi.