Hebrews 6 - Zokam International Version

¹ Tua ahi manin Christ tawh kisai ah picin lam manawh ni. Sihna hong tun nasepnate a pan kisikna bulkipte phut kik loin Pasian upna,

² baptisenate tawh kisai lamlahnate, khutngaknate, misite thawhkiknate, le tawntung thukhennate tawh kisai, thuhilhna bulpite nusia ni.

³ Pasian in hong phal leh tua bangin i hih ding hi.

⁴ Khatvei khuavak mu khin a, vantung letsong a ciam khin, Khasiangtho sunga tanh a nei khin,

⁵ Pasian thu hoihna le hong tung ding khanghun vangliatnate a ciam khin mite,

⁶ a pukmang uh leh kisik theih ahi kei hi. Bang hang hiam cih leh b amau man nadingin Pasian Tapa a kilhlum kik uh hi-a, mipi mai-ah sim mawhna a thuaksak kik uh ahi hi.

⁷ A hunhunin guah a dawl, a kikhawh sakpa adingin a manpha gah a gahsak tua lo, Pasian thupha ngah ahi hi.

⁸ Ahi hangin ling le thanglingte a pona lo in kimanna nei lo-a, a kihamsiat ding lauhuai hi. A tawpna-ah a kihaltum ding hi.

⁹ Hih bang i cih tei hangin kong it lawmte aw, no tawh kisai-in hotkhiatna tawh kipawl a hoihzaw nate no aa hi, ci-in lungmuangin ka om hi.

¹⁰ Pasian thutang lo ahi kei hi; amah in na nasep uh le ama mite na huhnasa uh le na huh lai nadingte uhah amah na itna uh na lahnasa uh a mangngilh kei ding hi.

¹¹ Na lametna uh a kip nadingin na vekun a tawpkhak dong tua bangin na thanuam ding uh kong deih uh hi.

¹² Note na thadah ding uh kong deih kei uh a, upna le sikdona tungtawna kam ciamsa a luahte na etteh ding uh kong deih uh hi.

Pasian Kamciam Kiciatna

¹³ Pasian in Abraham tungah kamciam a piakin amah sanga lianzaw kiciam nading om lo ahi manin amahmah kilo in kiciam a,

¹⁴ "Thupha kong pia taktak ding a, suan le khak tampi kong pia ding hi," c a ci hi.

¹⁵ Tua mah bangin lungduaitaka a ngak khit ciangin Abraham in tua a kikamciamsa a ngah hi.

¹⁶ Mihingte, amau sanga lianzaw khat lo-in kiciam uh a, tua kiciamna in thu kigen pen kipsakin kiselna khempeuh a beisak hi.

¹⁷ Bang hang hiam cih leh Pasian in a kamciamsa a luahte tungah, ama tupna bang a khellohna theisak nuam ahi manin tomlawhna tawh a kipsak hi.

¹⁸ Eite in hong kipia lametna len-a i delh laitakin nakpi-a i kihanthawn theih nadingin Pasian zuautheihlohna thu nih tawh Pasian in a hih zo hi.

¹⁹ Eite in tua lametna kha adingin sikkipin i nei a, kip mahmah in muanhuai hi. Tua in, puanzak nung mun siangtho sungnung ah lut-a,

²⁰ tua munah Jesu eite ma-ah eite tangin a na lut khinzo hi. Amah Melchizedek gui zui-in tawntung tulpi hong suak hi.