Ephesa-te 3 - Zokam International Version

Gentile-te tunga Thuhilhpa Paul

¹ Hih thu hangin, no Gentile-te tanga Christ Jesu’ hanga thongkia keimah Paul in -

² Note adinga kei tunga hong kipia Pasian hehpihna in na a sepkhiatna thu na za zo tham uh hi.

³ Tua in, a toma ka gelhsa bangin kilaakna tawh kei tunga hong kitheisak thuthuk ahi hi.

⁴ Tua ahi teh hih thu na sim uh ciangin Christ thuthuk ka theihzia na thei ding uh hi.

⁵ Tua pen Pasian sawltakpi siangthote le kamsangte tunga tua Kha tawh tu huna a kilaak bangin khang dang mite tungah a kitheisak kei hi.

⁶ Hih thuthuk i cih in, lungdamna-thu tungtawnin Gentile-te in Israel-te tawh luah khawmin, pumpi khat ah pumpi nate suakkhawm uh a, Christ Jesu sunga kamciam a tangkhawm a suahna uh ahi hi.

⁷ Ama vangliatna nasepna tungtawna kei tungah tua Pasian hehpihna letsong hong kipiak hanga hih lungdamna-thu nasempa a suak ka hi hi.

⁸ Pasian mi a neupente sanga a neuzaw hi napi hih hehpihna a kizongkhia zo lo Christ hauhna thu Gentile-te tunga hilh ding

⁹ le a beisa khanghunte a, na khempeuh a piangsak Pasian sunga a kiselcip hih thuthuk nasepna mikim tungah teltaka lakkhia dingin kei hong kipia hi.

¹⁰ Ama ngimna in Pasian pilna thuap tampite pawlpi tungtawnin vanlam gam sunga thuneihna neite le ukna a neite tunga theihsak ding deihna hi a,

¹¹ tua pen ama tawntung ngimna tawh kizui-in i Topa Christ Jesu sunga a bukimsak pen ahi hi.

¹² Ama sung le, ama sunga upna tungtawnin suahtakna le kimuanna tawh Pasian i nai thei ta hi.

¹³ Tua ahi manin note adinga ka thuaknate hangin a lungkia lo dingin kong ngen hi, tuate note minthanna ahi hi.

Ephesus-te ading Thungetsakna

¹⁴ Hih thu hangin Pa mai-ah ka khukdin hi,

¹⁵ amah panin vantung le leitung b ama innkuanbupa min a kilo hi.

¹⁶ Amah in a minthang ama hauhna panin, Kha tungtawnin vangliatna tawh na sunglam mi uh hong thakhauhsak nadingin thu ka ngen hi.

¹⁷ Tua pen upna tungtawnin note lungsungah Christ a ten theih nading ahi hi. Tua ciangin note ading kong ngetsakna in itna ah zungkha-in, kipin,

¹⁸ misiangte khempeuh tawh vangliatna nei khawmin Christ hong itna, a zaina, a sauna, a sanna, le a thukna na theih zawh nading uh,

¹⁹ le theihbatloh ahi itna thei-in, Pasian kicinna khempeuh ah note na dim theih nading uh ahi hi.

²⁰ Tu-in i nget khempeuh le i lunggeel khempeuh sanga nakpi-a thupi zawtham le, eite sunga a sem a vangliatna tawh kizui-a a hih thei pa tungah

²¹ pawlpi le Christ Jesu tungtawnin akhang akhang a tawntungin minthanna omden ta hen. Amen.