Amos 2 - Zokam International Version

¹ Hih in TOPA gen ahi hi: "Moab-te mawhna thumte thamlo lite hangin ka thangpaihna ka dok kik kei ding hi. Bang hang hiam cih leh Edom kumpipa’ guhte suangkang hal bangin a hal uh hi.

² Moab ah mei ka sawl dinga, tua in Kerioth c kulh muanhuaite a hultum ding hi. Gal kidona awging le pengkul kimut ging zuazua lakah Moab-te paisuk ding uh hi.

³ Amah le a uliante le a gam-ukte ka susia khawm ding hi," TOPA in a ci hi.

⁴ Hih in TOPA gen ahi hi: "Judah-te mawhna thumte thamlo lite hangin ka hamsiatna ka dok kik kei ding hi. Bang hang hiam cih leh amaute in TOPA thukhamte nial uh a, ama thukipte a mang kei uh hi. Bang hanga mang lo uh hiam cihleh a pu a pate uh zuih pasian d, pasian-zuaute e in lam a khialsak zo hi.

⁵ Judah tungah mei ka sawl dinga tua in Jerusalem kulh muanhuaite a hultum ding hi.

Israel Tungah Thukhenna

⁶ Hih in TOPA gen ahi hi: "Israel-te mawhna thumte thamlo lite hangin ka thangpaihna ka dok kik kei ding hi. Amaute in thumaan mite ngun-in zuak uh a, a tasamte khedapkaih bu khatin a zuak uh hi.

⁷ Leivui lak tuat bangin mizawngte lutung tuancil uh a, a kinengniam mite thu, thutangin a khensak kei uh hi. A pa le a tapa numeino khat kitangkhawm uh a, tua bangin ka min siangtho a zahhuaisak uh hi.

⁸ Biakna-tau gei tengah lum uh a, sum leitawi tanga kikoih puan a kepte uh a delhphah uh hi. Amau pasian inn sungah mi kigaam liausum tanga a mat uh zute a dawn uh hi.

⁹ "Amaute mai-ah tamtak banga a sang, tawsaw sing banga a khauh Amor-te ka susia khin hi. A tunga a gahte le a nuai-a a thaguite ka susia khin hi.

¹⁰ Egypt panin kong paikhiatpih a, kum sawmli sung sehnel-gam ah hong makaihin Amor-te leitang nang kong pia hi.

¹¹ Nangma tapate lak panin kamsang dingte ka lamto a, na khangnote uh lak panin Nazir-te ka teel hi. Israel mite aw, maan lo ahi hiam?" TOPA in cikhia hi.

¹² "Ahi hangin Nazir-te zu na dawnsak uh a, kamsangte in ka thu a genkholh loh nadingun thu na pia uh hi.

¹³ "Tua hi-a tu-in a tungah antang kiguang bawngleng a netcip bangin no kong nengcip ding hi.

¹⁴ A manlangte suakta man loin, a thahatte in amau thaneihzah zang man lo ding uh a, galhangte in amau nuntakna a hu zo kei ding uh hi.

¹⁵ Thal tawite in do zo lo ding uh a, a taihat galkapte taikhia thei loin sakol tuangte in a nuntakna uh a hu zo kei ding uh hi.

¹⁶ Tua ni ciangin galsiam, ahangpente nangawn guaktangin a taikek ding uh hi," TOPA in cikhia hi.