2 Kumpite 25 - Zokam International Version

¹ Tua ciangin Zedekiah in a uk a kum kuana, a kha sawmna a ni sawmna ni-in Babylon kumpipa Nebuchadnezzar, Jerusalem sim dingin a galkap buppi tawh a kuan hi. Amah in khuapi pua-ah giahphual sat-a a kimkot tengah umcihna a bawl hi.

² Zedekiah uk a kum sawm le khatna dong khuapi ki-um cip hi.

³ A kha lina e a ni kuana ni-in khuapi sungah kialpi nasia tun lua ahi manin mite nek ding an a om kei hi.

⁴ Tua ciangin khuapi kulh kitovang a, Babylon-te f in kulh a umcih uh hangin kumpipa huan gei-a kulhte gel kikal tawnin galkap buppi zanin a taikhia uh hi. Amaute Arabah g lam manawhin a tai uh hangin,

⁵ Babylon-te h in kumpipa nungdelh uh a, Jericho zangleite ah a pha uh hi. A galkapte khempeuh ama kiang pan kikhenkhia in kithehthang uh a,

⁶ amah kiman hi. Amah Libnah a Babylon kumpipa kiangah kipuak a, tua lai-ah ama tungah thu a kikhen hi.

⁷ Amaute in Zedekiah tapate ama muhin a that uh hi. Tua ciangin a mitte khelkhia uh a, sumngo kol bulhin Babylon ah a paipih uh hi.

⁸ Babylon kumpipa Nebuchadnezzar a kum sawm le kuana, a kha ngana, a ni sagihna ni-in Babylon kumpipa ulian khat ahi amah cingte ukpa Nebuzaradan Jerusalem ah a pai hi.

⁹ Amah in TOPA biakinnpi, kumpi-inn le Jerusalem a inn khempeuh mei-in a hal hi. Inn thupi peuhmah a haltum hi.

¹⁰ Kumpi cingte ukpa khutnuai-a Babylon galkap buppi in Jerusalem kimkot ah kulhte a phelkhia uh hi.

¹¹ A cingte ukpa Nebuzaradan in khuapi sunga a om lai mite, mi omlai peuhmah le Babylon kumpipa tungah tokaisate khempeuh tawh salin a kai khawm hi.

¹² Ahi hangin a ukpa in lote le lenggui-lote a kho dingin gammi a zawng pente pawlkhat a nusia hi.

¹³ Babylon-te in sumngo khuampite, TOPA biakinnpi a om sumngo Tuipi le a kikhin thei a dinnate satkham uh a, a sumngo Babylon ah a pua uh hi.

¹⁴ Amaute in beelte, vutluahnate, taitehte, kuangte le biakinnpi sunga nasepna-a kizang sumngo vanzat khempeuh a lamang uh hi.

¹⁵ Kumpi cingte ukpa in biakna veinate le tui thehna kuang-ukte - kham ahikeh ngun-a kibawl khempeuh a lamang hi.

¹⁶ TOPA’ biakinnpi adingin Solomon in a bawl khuampite gel, Tuipi le a kikhin thei a dinnate a sumngote a gikna teh zawh ding hi lo hi.

¹⁷ Khuampite khat teh pi sawmnih le sagih a sang hi. Khuampi khat, a dawn a sumngo lubawk pi li b le a lang sanga, a kimkot ah sumngo kiphan le sumngo mangkawlsing gahin a kizem hi. Adang khuampi khat tawh zong a kiphanzia kibang hi.

¹⁸ A cingte ukpa in siampi makaipa Seraiah le ama zoma siampipa Zephaniah le kongpi cing mi thumte salin a kai hi.

¹⁹ Tua khuapi sunga a omlaite panin galdo mite a uk ulianpa le kumpipa thudot mi ngate a man hi. Amah in gam mite laka aana-a paltan dongte a uk thuvanpipa le khuapi sunga kimu ama mi sawmgukte zong a man hi.

²⁰ A cingte ukpa Nebuzaradan in amaute khempeuh paipih a Riblah a Babylon kumpipa kiangah a puak hi.

²¹ Tua lai Hamath gam sung Riblah ah kumpipa in amaute a thatsak hi. Tua bangin ama gam pan Judah salin kikai hi.

²² Nebuchadnezzar in Judah-a a nusiat mite a uk dingin Shaphan tapa, Ahikam tapa Gedaliah a koih hi.

²³ Galkap mangte le amau mite khempeuh in, Babylon kumpipa in Gedaliah ukpi-a a koih lam a zak uh ciangin Mizpah a Gedaliah kiangah Nethaniah tapa Ishmael, Kareah tapa Johanan, Netophat-te Tanhumeth tapa Seraiah, Maacath-te tapa Jaazaniah le amau mite a pai uh hi.

²⁴ Amaute le amau mite a khamuan nadingin Gedaliah a kiciam hi. Amah in, "Babylon uliante kihta kei un. Gam sungah hong lal unla Babylon kumpipa na sem un; no adingin hoih ding hi," a ci hi.

²⁵ Tua hi napi a kha sagihna sungin kumpi sisan mah ahi, Elishama tapa Nethaniah, tapa Ishmael a mite sawm tawh kuanin Mizpah a om Gedaliah le amah tawh a om khawm Judah mite le Babylon mite zong a suamlum hi.

²⁶ Tuateh amaute in Babylon-te kihta uh ahi manin aneu pen pan alian pen dongin galkap uliante tawh Egypt ah a tai uh hi.

Jehoiachin Kikhahkhia

²⁷ Judah kumpipa Jehoiachin sal-a a kikaih zawh a kum sawmthum le sagihna kumin Babylon ah Evil - Merodach c kumpi suak-a a kha sawm le nihna, a ni sawmnih le sagihna ni-in Jehoiachin thong sung panin a khahkhia hi.

²⁸ Amah kamnemin hopih a, Babylon ah amah tawh a omkhawm kumpi khempeuh sangin pahtawina tutphah sangzaw ah a tusak hi.

²⁹ Tua ciangin Jehoiachin in a thong puante suahkhia-a, tua huna kipan a nuntak laiteng kumpi sabuai-ah an a ne hi.

³⁰ Jehoiachin a nuntak laisiah kumpipa in nisimin a zattawm ding manmanin a pia hi.