2 John 1 - Zokam International Version

¹ Upapa in, Thutak sunga ka it, kei bek hi lo thutak a theite khempeuh in zong a it uh -

² kote sunga om, kote tawh a omkhawm tawntung ding tua thutak hanga teelsa upanu le a tate tungah:

³ Pa Pasian le Pa’ Tapa Jesu Christ tung panin hehpihna, lainatna le lemna in thutakna le itna tawh eite hong ompih ding hi.

⁴ Pa in eite hong thupiak bang tektek in, na tate uh pawlkhat thutakin a kalsuan uh ka muh in nakpi-in hong nuamsak hi.

⁵ Kong it upanu aw, tu-in thupiak a thak kong gelh kei-a, a kipatcil-a i neihsa pen mah ahi hi. Eite khat le khat i ki-it thuk ding kong thum hi.

⁶ Ama thupiak manga kalsuanna in: itna ahi hi. A cil-a kipan na zaksa bangun ama thupiak in: itna sungah na gamta un, ci hi.

⁷ Jesu Christ ci-le-sa in hong pai hi, ci-a a sang lo, mikhem tampi leitung ah paikhia khin zo uh hi. Tua bang mi peuhmah mikhem le antichrist ahi hi.

⁸ Ngah sawma na sep uh pahtakman, mansuah loin a kima na ngah nadingun kigalging un.

⁹ Mi khatpeuh a khengvalin pai a, Christ thuhilhna-a a om den lo pa in Pasian a nei kei hi; tua hilhna-a a om den peuhmah in Pa le Tapa a nei khawm hi.

¹⁰ Mi khatpeuh no kiangah hong pai a, hih thuhilhna mah a hilh kei leh na muak kei unla, na inn uah zong na tungsak kei un.

¹¹ Amah a muak peuhmah ama gilo nasepna ah a kihel ahi hi.

¹² Note tungah kong gelh nop a tam mahmah hangin laidal le laitui ka zang nuam kei hi. Tua sangsik in, i lungnopna a kim theih nadingin hong hawh a, maitang kituah in, thu i kikup ding ka lamen hi.

¹³ A kiteel na sanggamnu uh tate in hong hopih nate uh hong khak uh hi.