2 Corinth-te 3 - Zokam International Version

¹ Kote, ko le ko kiphat kik dinga kipan ka hi uh hiam? Ahikeh mi pawlkhatte bangin note tungah ahikeh note tung panin panpihna laite kisam ka hi uh hiam?

² Note mahmah kote lungtang tunga kigelhsa, mi khempeuh in thei-a a sim uh lai na hi uh hi.

³ Note Christ tung pana lai na hi uh a, kote nasep gah, laitui tawh kigelh hi lo, a nungta Pasian Kha tawh a kigelh, suangpekte tungah hi lo, mihing lungtang pekte tunga kigelh lai na hina uh na lak uh hi.

⁴ Christ tungtawnin kote in Pasian mai-ah tua zahta kimuanna ka nei uh hi.

⁵ Na khatpeuh ko pana piang hi, ci-a ngaihsun dingin ko mahmah in kicinna ka nei kei uh hi. Kote kicinna Pasian tung pan hizaw hi.

⁶ Amah in kote lai-a gelh hi loin Kha in thukhun thak nasemte bangin hong kicingsak zo hi. Ahang in, lai gelh in that a, ahi hangin Kha in nuntakna a pia hi.

Thukhun Thak Minthanna

⁷ Tu-in sihna hong tun nasepna, tua suang tunga kigelhkuak laimalte a mual thei minthanna hi napi-in Israel-te in Moses maitang tangtaka a et theihloh zah a, minthanna tawh hong tung ahileh

⁸ Kha nasepna minthang zawtham lo ding ahi hiam?

⁹ Mihingte a mawhpaih nasepna minthang ahileh thumaanna hong tun nasepna nak minthan zaw ngel ve!

¹⁰ Ahang in, a minthang ngeisa in a minthang zaw tham tawh tehin tu-in minthanna a nei nawn kei hi,

¹¹ A mual thei nangawn minthanna tawh hong tung ahileh a om den minthanna bangzahin a lianzaw tham tam!

¹² Tua ahi manin tua bang lametna ka neih khit nungsangun ka hang mahmah uh hi.

¹³ Kote ka hi uh leh a maitanga a vangtannate a mual hiaihiai lam Israel-te in a muh loh nadinga a maitang puan a khuhpa Moses bang ka hi kei uh hi

¹⁴ Ahi hangin amaute lungsim kimawlsaka tuni dongin thukhun lui a kisim ciangin tua khuhna puan mah a om lai hi. Christ tungtawnin kilakhia thei bek ahi manin a kihawkkhiatsak nai kei lai hi.

¹⁵ Tuni dong nangawnin Moses laite a kisim ciangin khuhna puan in amaute lungtang a khuh lai hi.

¹⁶ Ahi hangin mi khatpeuh Topa lamah a kihei peuhpeuh ciangin khuhna puan a kihawkkhia ahi hi.

¹⁷ Tua Topa pen tua Kha hi-a, Topa Kha a omna ah suahtakna a om hi.

¹⁸ Maitang kikhuh lo-a Topa minthanna a tang sawnsak a kote pen Kha ahi Topa tung pana hong tung, a lian semsem minthanna tawh amah bang dingin hong kibawlpha den hi.