1 Khangthute 26 - Zokam International Version

Kongpi-cingte

¹ Kongpi-cingte kisehkhenna: Korah-te panin: Asaph tapate khat Kore tapa Meshelemiah.

² Meshelemiah neih tapate: Zechariah a suak masa, Jediael a nihna, Zebadiah a thumna, Jathniel a lina,

³ Elam a ngana, Jehohanan a gukna, le Eliehoenai a sagihna ahi hi.

⁴ Obed-Edom in zong a neih tapate: Shemaiah a suak masa, Jehozabad a nihna, Joah a thumna, Sacar a lina, Nethanel a ngana,

⁵ Ammiel a gukna, Issachar a sagihna, le Peullethai a giatna ahi hi. (Ahang in Pasian in Obed-Edom thupha a pia hi)

⁶ Ama tapa Shemai-ah in zong tapa nei a, amaute mi belcing ahi manun a pate innkuan sungah makai ahi uh hi.

⁷ Shemaiah tapate: Othni, Rephael, Obed le Elzabad; a tanaute Elihu le Semakiah-te zong mi kician ahi uh hi.

⁸ Hihte khempeuh Obed-Edom suante hi uh a; amaute le a tapate le a tanaute mi belcing nasep hatte hi-in - Obed-Edom suante a vekun 62 ahi uh hi.

⁹ Meshelemiah in mi kician tapate le tanaute nei a - a vekin 18 ahi hi.

¹⁰ Merari-te Hosah neih tapate: Shimri a khatna (amah a suak masapen ahi loh hangin a pa in a masapenin a koih hi),

¹¹ Hilkiah a nihna, Tabaliah a thumna, le Zechariah a lina ahi hi. Hosah tapate le a tanaute a vekin 13 ahi hi.

¹² Hih kongpi cinga kiseh khente amaute makai a hi uh hangin amau tanaute hih bang tektekin TOPA biakinnpi sungah biakna nasep tavuan a nei uh hi.

¹³ Amau innkuante tawh kizui-in a moi a ham a kibangin kongpi simin ai a kilawn hi.

¹⁴ Nisuahna kongpi ai Shelemiah a tungah a tu hi. Tua ciangin ama tapa Zechariah thukuppih pil khat, adingin ai kilawna, Leilu Kongpi ai ama tungah a tu hi.

¹⁵ Leitaw Kongpi ai Obed-Edom tungah tu a, vankholna inn ai a tapa tungah a tu hi.

¹⁶ Nitumna Kongpi le lampi tungnung a Shelleketh Kongpi ai Shuppim le Hosah tungah a tu hi. A vil le a vil kimaituah uh a:

¹⁷ Ni khatin nisuahna lamah Levi-te guk, ni khatin leilu lamah li, ni khatin leitaw lamah li, le vankholna inn ah hun khatin nih a om uh hi.

¹⁸ Nitumna-lam tuala lampi ah li om uh a, a tual ah nih a om uh hi.

¹⁹ Hihte in Korah le Merari suan kongpi cingte sehkhennate ahi hi.

Goukemte le Adang Uliante

²⁰ Amau lawm Levi-te b in Pasian inn a goukholna le a ki-ap nate kholnate uk uh hi.

²¹ Ladan suante, Ladan tungtawna Gershon-mi a suakte le Gershon-te Ladan tawh kisai-a innkuan lutangte in Jehieli,

²² Jehieli tapate, Zetham le a sanggampa Joel ahi hi. Amaute TOPA biakinnpi a gou kholnate uk ahi uh hi.

²³ Amram-te, Izhar-te, Hebron-te le Uzziel-te panin:

²⁴ Moses tapa Gershom suante khat Shubael, in gou-manphate uk ulianpa ahi hi.

²⁵ Eliezer tungtawna ama tanaute: a tapa Rehabiah, a tapa Jeshaiah, a tapa Joram, a tapa Zicri, le a tapa Shelomith ahi hi.

²⁶ Shelomith le amau tanaute in, kumpipa David le a tulte le a zate a uk innkuan lutangte le galkap mang dangte in a apsa nate koihna goukholnate khempeuh a uk uh hi.

²⁷ Amaute in gal sunga a lak uh vante pawlkhat TOPA biakinnpi puah nadingin a ap uh hi.

²⁸ Tuateh thumupa Samuel le Kish tapa Saul le Ner tapa Abner le Zeruiah tapa Joab-te in a ap uh na khempeuh le a ki-ap nadang khempeuh Shelomith le a tanaute in a kem uh hi.

²⁹ Izhar-te panin: Kenaniah le a tapate, biakinnpi tavuante banah Israel tunga ulian le thukhente dingin a kiseh hi.

³⁰ Hebron-te panin: Hashabiah le a tanaute - siamna nei tulkhat le zasagihte in Jordan nitumna Israel sungah TOPA nasepna le kumpi nasepna khempeuh ah tavuan a la uh hi.

³¹ Hebron-te adingin amau innkuante khangthu ciamtehna tawh kizui-in amaute ukpa Jeriah ahi hi. David uk a kum sawmlina-in ciamtehna kizong a, Hebron-te lakah Gilead a Jazer ah siamna a nei mi a kimu hi.

³² Jeriah in siamna a nei mi innkuan lutang tulnih le zasagih nei a, Kumpi David in amaute Reuben-te, Gad-te, Manasseh beh alangte uk ding le Pasian tawh kisai thu khempeuh le kumpipa vaite ah a uk dingin a koih hi.