1 Khangthute 16 - Zokam International Version1 Amaute in Pasian singkuangpi pua uh a, David in tua dingin a zalsa puanbuk sungah koihin amaute in meihal biakna, kilawmtakna biakna c, Pasian mai-ah a pia uh hi. 2 David in meihal biakna le kilawmtakna biakna a piak khit ciangin TOPA minin mipite thupha a pia hi. 3 Tua ciangin Israel-te a numei a pasalin anlum khat, nisuh moh khat le lenggah moh khatciat a pia hi. 4 Amah in TOPA singkuangpi mai-ah nasem ding, deihna ngen ding, lungdam ko ding, TOPA Israel Pasian a phat dingin Levi-te seh a: 5 A makaipi Asaph, a nihna Zechariah, tua ciangin Jeiel, Shemiramoth, Jeriel, Mattithiah, Eliab, Benaiah, Obed-Edom le Jeiel ahi hi. Amaute in lyre-te le harp-te tumin, Asaph in daltuah tum dinga, 6 siampi Benaiah le Jahaziel-te in Pasian thukhun singkuangpi mai-ah a hunhunin pengkul a mut ding uh hi. David Lungdamkohna La 7 Tua ni-in David in Asaph le ama kikoppihte hih lungdamkohna la TOPA a sak dingun a masapenin a ap hi. 8 TOPA tungah lungdam koin, a min lo unla; ama sepsate minamte lakah kitheisak un. 9 Amah la sak un, amah phatna la sak un; ama sepsa a lamdang teng genkhia un. 10 A min siangtho thangsak un; TOPA a zongte lungsim nuam ta hen. 11 TOPA le ama hatna enkawmin; ama maitang zong den un. 12 Ama sepsa a lamdangte, ama nalamdang bawlte le a genkhiat a thukhennate, 13 ama nasem Israel suante aw, ama teelsa Jacob tapate aw, phawk gige un. 14 Amah TOPA eite Pasian hi a; leitung khempeuh ah a thukhennate a om hi. 15 Amah in a thukhun phawk tawntung a, a thupiaksa kammal khang tul khat dong a ciamteh d hi, 16 tua in Abraham tawh a thukhun Jacob tungah tom lo-a a thuciam ahi hi. 17 Amah in Jacob tungah thukip in kipsak a, tawntung thukhunin kipsakin, 18 "Luah in na tan dingin nang tungah Canaan gam kong pia ding hi," a ci hi. 19 Amaute e tawmkha bek pha uh a, tawm takpi-in tua gamah mikhual suak uh a, 20 gam khat pan gam khat, kumpi-gam khat pan adang khatah a pai kawikawi uh hi. 21 Amah in amaute kuama nuai-et ding phal loin, amaute a khualna-in kumpite tai a; 22 "Ka sathau nilhte lawngkha kei unla; ka kamsangte nasak kei un," a ci hi. 23 Leitung khempeuh aw, TOPA la sak un; nisimin ama hotkhiatna tangko un. 24 Minamte lakah ama minthanna pulak unla, mi khempeuh lakah a nasepna piandangte pulakkhia un. 25 Ahang in, TOPA liana, a phattak pen ahi hi; pasiante khempeuh khengin kihtak ding ahi hi. 26 Minamte pasiante khempeuh milimte hi-a, TOPA in ahileh vante a bawl hi. 27 Ama mai-ah thupina le ukzawhna om a; ama omna munah thahatna le lungnopna a om hi. 28 Minamte innkuante aw, TOPA ahi bangin hisak un, TOPA a minthanna le a hatna bangin hisak un, 29 Ama minthanna a tawh kituakin TOPA minthangsak un. Biakna khat kengin ama mai hong zuan un; ama sianthona, a thupina tawh kituakin TOPA bia un. 30 Leitung khempeuh ama mai-ah ling un! Leitung kiptakin kikhosak a; a kikhin thei kei ding hi. 31 Vante nuam uh henla, leitung kipak hen; amaute in minamte tungah, "TOPA in uk hi," ci uh hen. 32 Tuipi le a sunga omte khempeuh in kithawnsak uh hen; lote le a sunga omte in nuamsa uh hen! 33 Tua ciangin leitung thukhenin TOPA hong pai ding ahi manin tulak singkungte khempeuh in ama mai-ah lungnuamin la sa ding uh hi. 34 TOPA hoih ahi manin ama tungah lungdam ko un; ama itna kip tawntung hi. 35 Kiko unla, "Kote Honpa Pasian aw, kote hong hon in; na min siangtho tungah lungdam ka koh theih nading uh le na minthang ka phat theih nadingun minamte panin kote hong kaikhawm inla hong hukhia in," ci un. 36 A tawntung pan tawntung dongin TOPA, Israel Pasian in phatna ngah ta hen. Tua khit ciangin mi khempeuh in, "Amen, TOPA phat un," a ci uh hi. 37 David in nisimin kisapna tawh kizui a hunhun a TOPA thukhun singkuangpi mai-a nasem dingin Asaph le amah a huhte a nusia hi. 38 Amah in amaute tawh a semkhawm dingin Obed-Edom le amah a huh sawmguk le giatte zong a nusia hi. Jeduthun tapa Obed-Edom le Hosah zong kongpi cingte ahi uh hi. 39 David in siampi Zadok le ama siampi naseppihte Gibeon a munsang tunga TOPA biakbuk mai-ah 40 TOPA in Israel a piaksa ama thukham khempeuh tawh kizui-in zingsang le nitak a hunhunin meihal biakna-tau tungah TOPA tunga meihal biakna a pia dingin a nusia hi. 41 Amaute tawh Heman le Jeduthun le TOPA tungah lungdam ko dinga a kiteelsa a mina kilote in "ahang in, ama itna kip tawntung hi," ci ding uh hi. 42 Heman le Jeduthun-te in la siangtho sak cianga kitum, pengkulte daltuahte le tumtheih kitum dangte awging a uk uh hi. Jeduthun tapate in kongpi ah mun a nei uh hi. 43 Tua khit ciangin mite khempeuh amau neihsa inn ciatah ciah uh a, ama innkuanpihte thupha pia dingin a inn ah David a ciah hi. |
Copyright 1994 Myanmar Center for World Mission