1 Corinth-te 2 - Zokam International Version

¹ Sanggamte aw, note kiangah Pasian thu teci pang dinga c kong pai lai-in dangnalna ahi zongin pilna thupizaw tawh ahi zongin kong pai kei hi.

² Ahang in, note tawh ka om khawm sung teng Jesu Christ le a kikilh lum amah longal bangmah theih ka tum kei bikbek hi.

³ Note kiangah thanemna, launa le linna tampi tawh kong pai hi.

⁴ Ka thupuak le ka thuhilhnate pilna le zolna kammalte tawh hi lo a, Kha vangliatna lahkhiatna tawh hizaw hi.

⁵ Tua-in na upna uh mite pilna tungah kinga loin Pasian vangliatna tungah a kingak zawk nading ahi hi.

Kha Pana Pilna

⁶ Ahi ta zongin a picingsate lakah pilna thupuak ka gen uh a, ahi hangin hih khanghun ahikeh bangmah ahi lo ding hih khanghun gam-ukte pilna ahi kei hi.

⁷ Hi lo hi, kote in a kiselcip pilna le hun kipat ma-a eite minthan nadinga Pasian sehkholhsa Pasian pilna thusim ka gen uh hi.

⁸ Tu khanghun a gam-ukte khat beek in hih thu a theitel kei uh hi. Bang hang hiam cih leh thei uh hileh minthanna Topa a kilhlum kei ding uh hi.

⁹ Ahi zong in: "Amah a itte adingin Pasian bawlkholhsate mitin mu ngei nai lo, bilin za ngei nai lo lungsimin ngaihsun ngei nai lo" d ci-a kigelhsa bang hi a,

¹⁰ ahi hangin Pasian in a Kha in eite tungah hong laak zo hi. Tua Kha in na khempeuh zonga, Pasian thuthukpite nangawn a zongkhia hi.

¹¹ Ahang in, mite lakah mi khat ngaihsutna a thei thei a sunga om mihing kha longal kua ahi hiam? Tua mah tawh kibangin Pasian Kha longal kuamah in Pasian ngaihsutnate a thei thei kei hi.

¹² Pasian in eite man nei lo a hong piak i theihtel theih nadingin leitung kha i ngah kei a, Pasian tung pana Kha i ngah hi.

¹³ Kote in ka gen uh hih thu mah ahi hi, mihing e pilna in eite hong hilh kammalte hi lo a, ahi hangin Kha hong hilh kammalte zangin khalam thutakte khalam kammalte-in ka genkhia zaw uh hi.

¹⁴ Tua Kha a nei lo mite adingin Pasian Kha pana hong pai nate haina suak ahi manin a sang kei uh hi. Ahang in, khalam tawh kikhentel thei bek ahi manin amah in tuate a theitel thei kei hi.

¹⁵ Khami bek in nate khempeuh thu khena, ahi hangin amah kuama thukhena mai-ah a om kei hi.

¹⁶ "Ahang in, Topa a hilh thei dingin kua in ama lungsim thei ahi hiam?" f Ahi hangin eite in Christ lungsim i nei hi.