Tito 3 - Zoque Copainalá New Testament

Tiyʌta'm pyʌcpa wa'y chʌquiaju wʌ'aŋja'moye'sta'm

¹ Yajamwʌtzʌquia wa'y myato'ŋoyjayaju gobernador y co'aŋgui'moyeta'm. Yajmato'ŋoya y uy ñuyu'ajyaju, sino que wa'y chʌquiaju mumu oyeta'mbʌ tzʌqui.

² Yajamwʌtzʌquiajque'ta wa'y jana ñisujtzʌyaju ya'iwʌ, wa'y jana quipcuy šuñaju, wa'y wyʌcomʌ'yaju mumu pʌn y wa'y ñʌ'ijtyaju yumijpʌ tzocoy mumu pʌ'nis wyi'naŋdʌjqui.

³ Porque tʌta'm wina te'šejtijtʌ inʌc jowi'ittaŋgue'tpa nuyu'ajcu'yojmo, y tocoquiu'yojmo. Nʌtu'ŋajtambatʌ inʌc tʌta'm ndzoco'yis yatzi su'noquiuy, y tiyʌta'm inʌc šunba tʌta'm ŋgüerpo's. Yatzitzoco'yajcuy y ñi'aŋsu'noquiuytyʌ inʌc nʌtu'ŋajtamba. Ngui'nišajpatʌ inʌc eyata'mbʌ, y ñe'cʌ'stʌ inʌc qui'nišajque'tpa.

⁴ Pero te' tʌta'm nyajcotzojcopyapʌ Diojsis yajmujsutʌ que ñe'cʌ jene oyepʌte' y šunba mumu pʌn.

⁵ Ñe'cʌ'stʌ yajcotzoctamu, pero ja'n tʌta'm justota'mbʌ ndzʌquipit sino ñe' tyo'ya'ŋʌ'oquiupyit. Te'šejtʌ yajpʌ'najwʌtzʌctamu yajcowajtamu'ctʌ y tzi'tamu'ctʌ jomepʌ quenguy te' Espíritu Santopit.

⁶ Y tʌta'm nyajcotzojcopyapʌ Ngomi Jesucristopit quiʌ'weju Diojsis te' Espíritu Santo tʌta'm ndzoco'yojmo wa'y teymʌ ijtu pajcupajcu.

⁷ Te'šej chʌjcu Diojsis wa'ytyʌ nʌcma'yʌyu justota'mbʌšej te' ñe' yajya'moquiupyit, y wa'ytyʌ yajcotzojcoctuctamu njo'ctambašejtʌ hasta que tucpa.

⁸ Muspamis nijamu tiyʌ'ʌsmij ndzamu, porque wiyuŋda'mbʌte'. Sunba'ʌs wa'mis maŋdzʌ'yu'c ndzamu te'šejta'mbʌ tiyʌ, wa'y chʌcjojcʌtʌquiaju oyeta'mbʌ tiyʌ jujche'ŋ wyʌ'aŋjamyajpapʌ's Dios. Yʌ'šejta'mbʌ tiyʌ oyepʌyʌ' y te'wʌpit pya'tyajpa pʌ'nista'm 'yoye'ajcuy.

⁹ Uy tʌjcʌy tita'm quiʌ'aŋwa'quiajpamʌy jowišejtij, ni te' nʌ chamyajumʌy ja'n yaye-cho'tzepʌ familia-a'ŋucu, ni te' nʌ quipotoŋyajumʌy, ni te' nʌmʌy quio'otoŋyaju te' Moisejsis 'yaŋgui'mguy. Te'šejta'mbʌ tiyʌ comequete' y yajtiyʌtʌ ja'n nʌwʌ'ay te'wʌpit.

¹⁰ Juca ijtu te'šej quipotoŋbapʌ pʌn eya'eya yajquipsoyajpapʌ's tyʌwʌ tyu'mʌquiu'yojmo, aŋnʌctza'mʌ te'wʌ metza tuca'y ñaca. Juca ja'n myato'ŋoy, tzacʌ.

¹¹ Porque muspamis que te'šejpʌ pʌn ca'ŋdocoyuwa'nde', y nʌte' quiowapa'tu. Ñe'cʌ's myuspa que maŋba quio'aŋgʌyu.

Pablo's chamjayu Tito tiyʌta'm wa'y chʌjcu

¹² Ngʌ'wejpa'camʌs te' atzi Artemas o te' Tíquico, tzʌcme'tza wa'misʌj ŋgʌ'minu Nicopolis-cumgu'yojmo, porque te'yʌs nʌ ŋguipsu wa'yʌs ŋgʌtʌjcu te' pacac aŋsʌŋ.

¹³ Ngʌpa'tpaše'ŋmis cotzoŋya tu'ŋojmocotoya te' aŋgui'mguy-myujsoye Zenas y te' Apolos wa'y jana quieñaju toya.

¹⁴ Y jujche'ŋ tʌta'm nwʌ'aŋja'moye-tʌwʌ'sta'm wa'y 'yaŋmayaju wa'y chʌquiaju oyeta'mbʌ tiyʌ wa'y quiotzoŋyaju nʌ quieñajupʌ's toya y uy myawʌ'ijtyaju.

Ultimota'mbʌ dyujchi'oquiuy y nicomasa'nʌquiuy

¹⁵ Mumu yʌy ijtyajupʌ's ʌji'ŋ ñdyujchi'yajpamij. Dyujchi'jayajque'ta wʌ'aŋja'moyeta'm te' suñajpapʌ'stʌ. Diojsismij nyajnicomasa'nʌytyamʌ muma'ŋgʌ'y. Amén.