Tito 2 - Zoque Copainalá New Testament

Te' wiyuŋšejpʌ aŋma'yoquiuy

¹ Pero mis, uy tzaque te' nʌšejmis nʌtzamyajupʌ tiyʌ, pyʌcpašej te' wiyuŋbʌ aŋma'yoquiu'yis.

² Aŋnʌctza'mʌya te' tzamupʌnda'm wa'y jyʌ'ctzʌ'yaju wyin, wa'y quioqueñaju cuenta mumutiyʌcʌsi, wa'y mujsu quiopiŋyaju tiyʌ oye y tiyʌ ja'n 'yoye, wa'y wyʌ'aŋjamyaju te' wiyuŋbʌ tiyʌ, wa'y šuñaju mumu pʌn y wa'y pyʌ'mgopajcʌyaju jujche'ŋ toya.

³ Aŋnʌctza'mʌyajque'ta te' tzamuyomota'm wa'y tyu'ŋajyaju Diojsis šunbašej, wa'y jana ñisujtzʌ'oyaju, wa'y jana ño'tyaju y wa'y quie'naŋgʌschi'oyaju oyeta'mbʌ tiyʌ.

⁴ Te'šej wa'y 'yaŋmayaju uneyomota'm wa'y šuñaju jyayaj y 'yuneta'm,

⁵ wa'y mujsu quiopiŋyaju tiyʌ oye y tiyʌ ja'n 'yoye, yomo jyayajtij quiojambapʌ's, y sa'sa quioquenbapʌ's, oyetzocoytya'mbʌ, myato'ŋoyjayajpapʌ's jyayaj, uy ya'iwʌ's yatzicotzamjayaju Diojsis chame.

⁶ Te'šejtij aŋnʌctza'mʌyajque'ta unepʌnda'm wa'y mujsu quiopiŋyaju tiyʌ oye y tiyʌ ja'n 'yoye.

⁷ Mumu misne' ndzʌquipit que'naŋgʌschi'ʌya oyeta'mbʌ tiyʌ wa'y quiengʌspʌquiaju mijcʌsi. Nʌ'cmij 'yaŋma'yoyu'c na' te' wiyuŋbʌ tiyʌ tzamʌ oyepʌ ŋguipsoquiupyit.

⁸ Y sa'sa wiyuŋda'mbʌ tzamepit nʌtzamya wa'y jana quionocjayaju mis ndzame. Te'šej yʌ' ŋgui'nišajpapʌ'smij maŋba ñʌctza'a'ʌyaju ñe'ta'm chame.

⁹ Aŋnʌctza'mʌya te' coyosata'm wa'y myato'ŋoyjayaju quiomita'm, wa'y yajtzocopyaquiaju mumutiyʌcʌsi, y uy 'yaŋdzoŋdʌctʌcnayaju.

¹⁰ Aŋnʌctza'mʌya wa'y jana ñinu'myaju quiomi, wa'y yajqueñaju quiomita'm que ñe'cʌ ñijamyatʌjpapʌ pʌnda'mde'. Pyʌcpa wa'y chʌquiaju te'šej wa'y wyʌcotzamyaju pʌ'nista'm te' Diojsis 'yaŋma'yoquiuy. Ñe'cʌte' tʌta'm nyajcotzojcopyapʌ.

¹¹ Porque Diojsis yajquendamwa'ndʌ que jene yajyamba mumu pʌn. Te'cotoya sunbatʌ yajcotzoctamu muma'ŋgʌ'y.

¹² Y ñe'cʌ'stʌ aŋnʌctza'mʌytyamba wa'ytyʌ ndzaquiaju ja'n šuñapyʌ's te' Dios y wa'ytyʌ jana ŋguiʌñʌñdamu yatzita'mbʌ tiyʌ. Pyʌcpa wa'ytyʌ njʌ'ctzʌ'ytyamu nwin, wa'ytyʌ ndu'ŋajtamu justopʌ pʌnšej y ndzʌctamu šunbašej Diojsis yʌtijta'mbʌ jamo'oyj.

¹³ Ittamʌ yʌ'šej nʌ'cše'ŋoyjtyʌ omapit njo'ctamu hasta que mingue'tpa chi'muŋgʌ'ojmo tʌ Ngomi Jesucristo te' yajcotzojcupʌ'stʌ. Y ñe'cʌte' tʌ mʌja'ŋbʌ Dios.

¹⁴ Yʌ' Jesucristo's chi'oquia'u wyin wa'y quia'u tʌcotoyata'm wa'ytyʌ jupyuttamu y yajcotzoctamu mumu tʌta'm nyacha'cu'yojmoc. Y te'šej chʌjcu wa'y yajcowajayu tʌta'm ndzocoy wa'ytyʌ pʌjcʌchoŋu jujcha' ñe' 'yune, quiʌñʌñajpapʌ's wa'y chʌquiaju oyeta'mbʌ tiyʌ.

¹⁵ Yʌ'šej nʌtu'ŋa te' aŋma'yoquiuy, y aŋnʌctza'mʌya y wocwinduquia aŋgui'mbawʌšej. Umij ya'iwʌ's myenoscocojtu.