San Mateo 3 - Zoque Copainalá New Testament

Tzamgopu'ŋoyu Juan Bautista

¹ Nu'cu'ca aŋsʌŋ, minu Juan Bautista. Minu chamgopu'ŋoyu ja'itʌnʌmʌmʌy.

² Y nʌmba inʌc: Quipswitu'tamʌ, porque jʌ'nʌ'a maŋba 'yaŋgui'moyu te' tzajpojmopʌ Dios.

³ Yʌ' Juaŋde' chamupʌ te' tza'maŋwa'opyawʌ Isaiajsis, nʌmu'c: Wejqui'mu'c nʌmu tumʌ te' pʌn ja'itʌnʌmʌmʌy: Nimejcʌytyamʌ ndzocoy tʌ Ngomicotoya jujcha' pʌ'nista'm ñimejcʌyajpa tuŋ. Wʌtzʌcjaytyamʌ te' wyiyuŋ-duŋ te' maŋba minumʌy.

⁴ Y yamba inʌc Jua'ŋis te' pyama camello-pʌcpʌ, y nacapʌ checwatcuy. Y te' quiu'tcuy awute' inʌc y yumij tzinuj.

⁵ Pijche'c te' Jerusale'ŋojmota'mbʌ, y mumu te' Judea-najsojmota'mbʌ, y te'šejtijque' mumu te' Jordaŋ-nʌ'is 'yacapoyo'mota'mbʌ tzu'cumyajpa inʌc wa'y myaŋyaju ijtumʌy Juan.

⁶ Y yajnʌ'yʌyajpa inʌc ñe'cʌ's te' Jordaŋ-nʌ'ojmo quiowʌ'aŋjamyaju'cande' quiowa.

⁷ Y quienu Jua'ŋis que nu'quiajpa inʌc wʌwʌ te' fariseota'm y saduceota'm wa'y ñe'cʌ's yajnʌ'yʌyaju, y ñʌjayaju: Njyoco'istotzanšejta'm mij. ¿Iwʌ'sayʌ' ñchamjaytyamu wa'mis mboyjaytyamu te' co'aŋgʌquiuy Diojsismij maŋba nyajnʌco'aŋgʌytyamupʌ?

⁸ Yajquejtamʌ jeque mista'm ndzʌquipit que nʌmij ŋguipswitu'tamu.

⁹ Y uy nʌcʌpo'tame wa'mij ñʌmdamu ndzoco'yojmo: Abrahaŋde' tʌs ndataj, porque ʌsmij ndzamjaytyamba que Diojsis muspa yajqueju uneta'm Abrahaŋgotoya ñempe yʌ' tza'pitta'm.

¹⁰ Y te'ya ijtu mejwinbujtupʌ hacha. Jujche'ŋ cuy ja'n chʌquipʌ's oyepʌ tyʌm, tyʌŋyajpa y quiojtyajpa jucʌtʌjcojmo.

¹¹ Wiyuŋšej nʌ'ʌsmij nyajnʌ'yʌytyamu nʌ'pit wa'mij ŋguipswitu'tamu. Pero ʌs ucaŋgʌ'mʌc nʌ minu más mʌja'ŋbʌ que ja'n ʌj. Y myasa'najcupyit ja'n pyʌqui ni wa'yʌs nʌmaŋjayu wyacasnaca. Ñe'cʌ'smij maŋba nyajnʌ'yʌytyamu Espíritu Santopit wa'y pya'jayu mista'm ndzocoy.

¹² Quiʌ'ojmo ñʌ'ijtu te' trigo-cosu'oquiuy yajcowajpapʌpit ñe' yojsaŋ. Maŋba yajtu'mʌyu te' trigo ñe' troja'ojmo y maŋba pyoŋbʌ'jayu te' šo'c ja'n tyu'ipʌ jucʌtʌjcojmo.

Nʌ'yʌyu Jesucristo

¹³ Pijche'ca minu te' Jesús Galilea-najsojmoc y nu'cu ijtumʌy Juan te' Jordaŋ-nʌ'ojmo wa'y yajnʌ'yʌyu te' Jua'ŋis.

¹⁴ Pero Jua'ŋis jašunʌ yajnʌ'yʌ, y ñʌjayu: Ʌj misʌjte' inʌc pyʌcpa nyajnʌ'yʌyu, ¿y misʌj wa'y ŋgʌ'minu?

¹⁵ Pijche'ca Jesujsis 'yaŋdzoŋu: Yajnʌ'yʌ'ʌj. Yʌ'šej pyʌcpa wa'ytyʌ ndzʌcta'nu chamušej Diojsis. Pijche'ca yajnʌ'yʌyu Jua'ŋis.

¹⁶ Y nʌ'yʌyu'ctij te' Jesús, qui'mbujtu te' nʌ'ojmo, y aŋwaju te' tzap y quienu te' Diojsis 'Yespiritu nʌ wyanajcu'c jujcha' wiyuŋšejpʌ paloma, y nu'cu ñe'cʌcʌsi.

¹⁷ Pijche'ca minu tzajpojmocpʌ otowe, nʌmupʌ: Yʌ'wʌ te' ʌs Une sunbapʌ'ʌs, y yajtzocopyacpapʌ'sʌj.