San Marcos 4 - Zoque Copainalá New Testament

Te' tʌmbu-puŋbapʌ

¹ Eyaco naco'oyj aŋma'yoquiʌ'yu Jesús te' ma'ra'acapoyo'mo. Y quiʌtu'mʌyaju ñe'cʌ wʌwʌta'mbʌ pʌ'nis cosaque'cše'ŋoyj ñe'cʌ tʌjcʌyu te' barco'ojmo te' ma'rojmo ijtuwʌ y tey maŋu pyocsu. Y te' pʌ'nʌputzi tzʌ'yaju te' ma'ra'acapoyo'mo.

² Soneta'mbʌ tiyʌ 'yaŋmayaju Jesujsis comparacioŋbit y te' 'yaŋma'yoquiu'yojmo ñʌjayaju:

³ Matoŋdamʌ. Ijtu inʌc tumʌ pʌn. Tzu'cumu wa'y maŋu pyuŋu tʌmbu tajyʌ'sumʌy nas.

⁴ Y nʌ'c pyuŋu te' tʌmbu, wene cuñaju tuŋgʌsi y paloma's minu jyu'quiaju.

⁵ Y wene cuñaju ijtumʌy tzeya-nas tza'cʌsi. Jʌnʌjtij nayu, porque ja'n inʌc tyiŋdiŋ te' nas.

⁶ Pero piju'cande' jama, pyoŋga'u y tʌjtzu porque jawyatzipʌquia oye.

⁷ Y wene cuñaju apijtojmo y ye'ŋu te' apitta'm y yajsu'csca'pʌ'u y jatyʌ'ma.

⁸ Y te' cuñajque'tupʌ oyepʌ najsojmo, yʌ'ta'mbʌ tzoquiaju y ye'ŋyaju y chʌquiaju tʌm. Wenepʌ's chʌquiaju tʌm ips-co-mac, y wenepʌ's chʌquiaju tuqui's y wenepʌ's chʌquiaju mojsi's.

⁹ Pijche'ca ñʌjayaju Jesujsis: Iwʌ's ijtu quiowita'm wa'y myatoŋyaju, yajcʌmato'ŋʌya'ʌj.

Tiyʌcotoyate' chamu Jesujsis comparacioŋda'm

¹⁰ Maŋu'ca te' pʌ'nʌputzi, quiʌ'aŋwa'quiaju te' Jesusji'ŋ ijtyajuwʌ's y te' macwʌstʌjcʌ'pyʌ quiʌ'aŋmaye's: ¿Jutzasʌ'ŋde' sunba ñʌmu te' comparación?

¹¹ Y Jesujsis ñʌjayaju: Diojsismij nyajmustamba te' jayajqueyapʌ tiyʌta'm winata'mbʌ tiempo'ojmo, te' chambapʌ's jutz aŋgui'mba ñe'cʌ. Pero te' eyata'mbʌ pʌngotoya mumu ʌs ndzamba comparacioŋbit.

¹² Te'cotoya ñempe quieña, ja'n quie'nʌyay y ñempe myatoŋya, ja'n ñʌctʌ'yay wa'y quiacpʌ'yaju chocoy wa'y quiotocoyaju quiowa.

Cha'maŋwaju Jesujsis te' tʌmbu-puŋbapʌ

¹³ Y ñʌjayaju Jesujsis: ¿Juca ja'nmis nʌctʌ'ytyame yʌ' comparación, jutza' mis maŋba nʌctʌ'ytyamu mumuta'mbʌ comparación?

¹⁴ Te' pyuŋbapʌ's tʌmbu, te'wʌte' te' chamgopuŋbapʌ's te' tzame.

¹⁵ Te' tʌmbu cuñajuwʌ tuŋgʌsi, yʌ'wʌte' te' pʌnda'm iwʌ'sta'mis choco'yojmo nu'cu te' tzame myatoŋyaju'c. Y jʌnʌjtij minba Satanás, yajʌcʌ'pa te' tzame tʌjcʌyupʌ choco'yojmo.

¹⁶ Te' tʌmbu cuñajuwʌ ijtumʌy tzeya-nas tza'cʌsi, yʌ'wʌte' te' pʌnda'm myatoŋyajpapʌ's te' tzame y jʌ'nʌjʌ'nʌ pyʌjcʌchoŋyajpa y ñʌ'omyajpa.

¹⁷ Pero te' choco'yojmota'm ja'n wyatzipʌqui te' tzame, te'cotoya uša'ŋ horacotoyatij wyʌ'aŋjamyajpa. Quiengʌ'yajpa'c toya o qui'nisoquiuy te' Diojsis chamecotoya, pijche'ctij ja'na šuñay, y chaquiajpa.

¹⁸ Te' tʌmbu cuñajuwʌ apijtojmo, yʌ'wʌte' te' pʌnda'm myatoŋyajpapʌ's te' tzame,

¹⁹ pero quipšajpa najsacopajcʌsipʌ yosjojcʌtʌjcuy, y ñʌ'omyajpa itʌpa'tcuy y ñi'aŋsuñajpa sone eyata'mbʌ tiyʌ. Y yʌ'šejta'mbʌ tiyʌ's yajambʌ'yajpa te' tzame choco'yojmo y ja'na tyʌ'may.

²⁰ Te' tʌmbu cuñajuwʌ oyepʌ najsojmo, yʌ'wʌte' te' pʌnda'm myatoŋyajpapʌ's te' tzame y tyumʌtzocoy pyʌjcʌchoŋyajpa. Watzipʌcpa te' tzame y wenepʌ's chʌquiajpa ips-co-mac, y wenepʌ's tuqui's y wenepʌ's mojsi's.

Te' yajsʌ'ŋoquiuy

²¹ Quiʌ'aŋwa'quiajque'tu Jesujsis: ¿Ijtusʌ'ŋ ño'papʌ's sʌ'ŋgʌ' wa'y ñimucsʌyu tzicapit o wa'y quiojtu ʌŋguquiʌ'mʌ? ¿Ja'nsʌ'ŋde' wa'y quiojtu sʌ'ŋgʌ'-cotcuquiʌsi?

²² Mumu nu'mdijpʌ tiyʌ maŋba quieju y tiyʌta'm cʌwʌ'nu maŋba myujšaju.

²³ Iwʌ's ijtu quiowita'm wa'y myatoŋyaju, yajcʌmato'ŋʌya'ʌj.

²⁴ Nʌjayajque'tu: Coquendamʌ cuenta tiyʌ mis matoŋdamba. Tiyʌ mis mu'ctamba ne'cʌ, te'wʌtijmij maŋba myu'cjatʌtaŋgue'tu. Y iwʌ's myatoŋba te' tzame ʌs ndzambapʌ, Diojsis maŋba myu'ctzi'a'ŋʌyu.

²⁵ Iwʌ's myatoŋba te' tzame y pyʌjcʌchoŋba, maŋba 'yaŋmaya'ŋʌyu, y iwʌ's myatoŋba te' tzame y ja'n šʌ'mjay chocoy, maŋba jyambʌ'u myatoŋuše'ŋ.

Jutz ye'ŋba te' nayupʌ tʌmbu

²⁶ Nʌmgue'tu Jesús: Te' Diojsis 'yaŋgui'mʌtʌjcuy yʌšejpʌte': Tʌmbuše'ʌs utzpa, pʌ'nis pyuŋupʌ tajyʌ'supʌ najsojmo.

²⁷ Y te' pʌn maŋba 'yʌŋu tzu'cʌsi, y jo'pit sa'pa, y te' tʌmbu napya y ye'ŋba y ñe'cʌ's ja'n myusi jutz.

²⁸ Te' nas ñe'cʌtij yospa wa'y chʌjcu tʌm, wina yajwo'mbutpa te' tʌmbu, pijche'ca yajpo'pa y jʌsa'ca sinanba te' pyuj pyuŋgujcʌsi.

²⁹ Cʌŋu'ca te' tʌm, pijche'ca quiʌ'weyatʌjyajpa coyosa wa'y jyactu'mʌyaju porque nu'cwa'nde' te' cosecha.

Te' mostaza-tʌmbu

³⁰ Y nʌmgue'tu Jesús: ¿Tiyʌpi'tandʌ utztʌ'pa te' Diojsis 'yaŋgui'mʌtʌjcuy? ¿Jutipʌ comparacioŋbi'tandʌ utztʌ'pa?

³¹ Y'ʌ'šejpʌte' jujcha' mostaza-tʌmbu ñijpupʌ te' pʌ'nis te' tajyʌ'supʌ najsojmo. Y yʌ'wʌte' te' tʌmbu más chʌlʌcspʌ mumupo'mo najsacopajcʌsi.

³² Y nayu'ca, ye'ŋba y más mʌja'pa que ja'nde' eyata'mbʌ nipi. Mʌja'pa te' 'yaŋmaŋ muspa'cše'ŋoyj chʌquiaju ño'se te' sitityajpapʌ paloma's te' 'yaŋmaŋgʌsita'm.

Tiyʌcotoyate' chamu Jesujsis comparacioŋda'm

³³ Te' šejtijque' wʌwʌta'mbʌ comparacioŋbit cha'maŋwajayajpa inʌc Jesujsis te' Diojsis chame hasta muspaše'ŋ ñʌctʌ'yaju.

³⁴ Mumutiyʌ inʌc comparacioŋbit chamjayajpa. Y ñaytyumʌ ijtu'c te' quiʌ'aŋmayeji'ŋda'm cha'maŋwajpʌ'jayaju te' comparación.

Jesujsis yajsʌju te' tujwinsawa

³⁵ Tza'yʌ'ca te' pijche'cpʌ jama, ñʌjayaju te' quiʌ'aŋmaye: Jacta'mitʌy te' ma'ra'ocwinduc.

³⁶ Y te' quiʌ'aŋmaye'sta'm 'yoto'ŋʌchaquiaju te' wʌwʌ pʌn. Y te' ijtumʌytyij te' barco'ojmo ñʌtzu'cumyaju Jesús. Y te'šejtijque' maŋyajque'tu eyata'mbʌ barco.

³⁷ Pijche'ca minu pyoyu te' sawa na'chaŋbʌ. Nʌ inʌc tyepstʌjcʌyu te' nʌ' te' barco'ojmo hasta nʌwa' inʌc jyo'ʌyu nʌ'pit.

³⁸ Y Jesús ʌŋu inʌc tʌŋgʌscʌsi te' barco's tuy'tzojmo. Pijche'ca yajsa'yaju quiʌ'aŋmaye'sta'm y ñʌjayaju: ¿Maestro, ja'nja mbʌcjay maya'cuy que matʌ sucsca'tamu?

³⁹ Pijche'ca sa'u, 'yotoŋjayu te' sawa y ñʌjayu te' mar: Numumña. Y sʌ'mgʌne'cu te' sawa y numumgʌñe'cʌnʌmu.

⁴⁰ Y ñʌjayaju te' quiʌ'aŋmaye: ¿Tiyajca'nde' ña'tztamba? ¿Ja'nja nwyʌ'aŋja'moytyame?

⁴¹ Y jene nʌ inʌc ña'chaju. Nañʌmjayatʌju: ¿Iwa' jequeyʌ' yʌ'wa, hasta wa'y sawa's y ma'ris wa'y myato'ŋoyjayaju?