San Marcos 3 - Zoque Copainalá New Testament

Te' pʌn tʌtzpʌ's inʌc quiʌ'

¹ Y eyaco naco'oyj tʌjcʌyu Jesús te' judio'sta'm wyindʌjcojmo. Tey inʌc ijtu tumʌ pʌn tʌtzpʌ's inʌc quiʌ'.

² Y quiʌ'isʌyajpa inʌc juca yajtzocpa te' sabado-jamo'oyj wa'ytyij ñiwa'cʌyaju.

³ Pijche'ca Jesujsis ñʌjayu te' pʌn, te' tʌtzpʌ's quiʌ': Tzu'cumʌ y tenaqui'mʌ ñe'ta'm wyi'naŋdʌjqui.

⁴ Y ñʌjayaju Jesujsis: ¿Yajwinducpasʌ'ŋ aŋgui'mgu'yis sabado-jamo'oyj wa'ytyʌ ndzʌjcu bien o wa'ytyʌ ndzʌjcu mal? ¿Yajwinducpasʌ'ŋ wa'ytyʌ nyajcotzojcoyu o wa'ytyʌ nyajca'oyu? Yʌ'še'a quiʌ'aŋwa'quiaju'c uma'pʌ'yaju.

⁵ Y Jesujsis qui'šca'u'c ñique'nʌpyʌ'yaju te' quiʌne'ŋyajupʌ's, y triste'aju porque nuyuta'mbʌte' choco'yojmo. Pijche'ca ñʌjayu te' pʌn: Yajtʌyʌyʌ mis ŋgʌ'. Y yajtʌyʌyu, y tzojcu te' quiʌ'.

⁶ Te'ya tzu'cumyaju'c fariseota'm, maŋu quipsaŋgospo'ʌyaju te' Herodistaji'ŋda'm jutz wa'y yajca'yaju Jesús.

Wʌwʌ pʌn ma'ra'acapoyo'mo

⁷ Pijche'ca Jesús tzu'cumu, maŋu ma'raŋi te' quiʌ'aŋmayeji'ŋda'm. Y cutzuca'ŋu'c maŋyaju ñe' 'yucaŋgʌ'y te' Galilea-najsojmota'mbʌ y te' Judea-najsojmowʌ.

⁸ Y maŋyajque'tu te' Jerusale'ŋojmocta'mbʌ y te' Idumea-najsojmocpʌ y te' Jordaŋ-nʌ'is 'yocwinducta'mbʌ y te' Tiro y Sidoŋ-gumgu'yis quiojambapʌ pʌnda'm. Myatoŋyaju'ca te' mʌja'ŋda'mbʌ tiyʌ chʌjcuwʌ Jesujsis, quiʌ'maŋyaju wʌwʌta'mbʌ pʌ'nis.

⁹ Jesujsis ñʌjayaju te' quiʌ'aŋmayeta'm: Wa'yʌj jana me'ctochʌquiaju wʌwʌta'mbʌ pʌ'nis, tomec nimejcʌyupʌ ya'itʌ te' barco.

¹⁰ Y tzoquiaju'ca wʌwʌ pʌn, mumu inʌc ñe'cʌ ñite'tzʌyajpa jujche'ŋ ca'cu'yʌyajupʌ's y pyi'qui'šajpa inʌc.

¹¹ Cuando quieñajpa inʌc yatzi-espiritu'sta'm te' Jesús, cutcʌne'quiaju ñe' wyi'na'ŋoyj. Y weju'c inʌc nʌmyajpa: Mijte' te' Diojsis 'Yune.

¹² Pero ñe'cʌ's 'yotoŋjayajpa inʌc y 'yaŋgui'myajpa inʌc uy quiotzamyaju ñe'cʌ.

Quiopiŋu Jesujsis macwʌstʌjca'y cʌ'wej

¹³ Pijche'ca qui'mu Jesús te' pu'mnacʌsi, y wyejtu'mʌyaju iwʌta'm sunu quiopiwʌ y quiʌ'miñaju ñe'cʌ'sta'm.

¹⁴ Y quiojtu Jesujsis macwʌstʌjca'y pʌn wa'y ijtyaju ñe'cʌji'ŋ, y wa'y quiʌ'wejyaju wa'y chamgopu'ŋoyaju.

¹⁵ Chi'yaju aŋgui'mʌtʌjcuy wa'y yajtzoquiaju te' ca'eta'mbʌ, y wa'y myacpujtyaju te' yatzita'mbʌ espíritu.

¹⁶ Yʌ'ta'mbʌte' te' macwʌstʌjca'pyʌ pʌn: Simón, te' quiotjaquie'tupʌ's ñʌy Pedro,

¹⁷ te' Jacobo y te' pyotzoji'ŋ Juan, Zebedeo's 'yuneta'm. Yʌ'ta'mbʌ Jesujsis quiotjayajque'tu ñʌy Boanerges, sunbate' ñʌmu, quiwaŋda'mbʌ's itcuy jujcha' aŋjʌquiʌ'.

¹⁸ Y te' eyata'mbʌ's ñʌy: Te' Andrés y te' Felipe, te' Bartolomé y te' Mateo, te' Tomás y te' Jacobo, Alfeo's 'yune, y te' Tadeo, y Simón te' Zelotista'sta'm tyʌwʌ,

¹⁹ y Judas Iscariote, te' chi'oquia'upʌ's Jesús. Y maŋyaju tyʌjcoyj.

Nʌmyaju que Jesús yatziwʌ'ste' ñʌc'ijtʌyu

²⁰ Tumnacacʌsi wʌwʌ pʌn miñajque'tu hasta ja'na inʌc chi'yay lugar wa'y quiu'tyaju Jesús y ñe'cʌji'ŋ ijtyajuwʌ.

²¹ Pijche'ca myatoŋyaju te' Jesujsis 'yamigo'sta'm que tey inʌc ijtu Jesús. Maŋyaju wa'y ñuctzʌ'yaju porque nʌ inʌc ñʌmyaju pʌnda'm que co'sawapʌte'.

²² Te' Jerusale'ŋojmoc wanaquiajuwʌ aŋgui'mguy-tyayuta'm nʌmyajpa inʌc: Yʌ' Jesús ñʌc'ijtʌyupʌyʌ' Beelzebu'is y myacputpa yatzita'mbʌ espíritu te' yatzita'mbʌ espiritu's quiowi'napit, te' ñʌjayajpapʌ Beelzebú.

²³ Pijche'ca Jesujsis wyejyaju te' pʌnda'm y 'yoto'ŋʌyaju comparacioŋbit. Nʌmu: ¿Jutza' muspa Satanajsis myacpujtu te' ñe' quio'aŋgui'moyeta'm?

²⁴ Y juca tumʌco gobierno'ojmota'mbʌ quipyajpa ñe'co'mo, ja'n musi itjojcʌtʌjcu ʌ' gobierno.

²⁵ Y juca tumʌco tʌjcoyj ijtyajupʌ quipyajpa ñe'co'mo, ja'n musi itjojcʌtʌquiaju.

²⁶ Y juca inʌc te' Satanajsis ñʌquijpa te' ñe' quio'aŋgui'moyeta'm, ñe'te' 'yaŋgui'mʌtʌjcuy nʌ wye'nbʌ'u. Te'šej ja'n musi itjojcʌtʌjcu sino yajpa.

²⁷ Juca iwʌ sunba tyʌjcʌyu te' pʌmi'ʌyupʌ pʌ'nis tyʌjcojmo wa'y maŋu ñinu'mu, ijtupʌte' pyena wa'y myo'csu wina wa'y mujsu ñinu'mu.

²⁸ Wiyuŋše'ʌsmij ndzamjaytyamba: Diojsis yajcotocopya mumu cowa pʌ'nista'mñe', y te'šejtijque' mumu otowewʌ'ajcuy yempejutzpʌ.

²⁹ Pero iwʌ's 'yotowewʌ'ajayajpa te' Espíritu Santo, nunca ja'n maŋu yajcotocoyjayu Diojsis, porque te'šejpʌ cowapa'tcuy ja'na yajujche'c jyʌcʌ'i.

³⁰ Yʌ'šej chamu Jesujsis porque nʌ inʌc ñʌmyaju: Yʌ'wʌ ñʌc'ijtʌyupʌyʌ' yatzipʌ espiritu's.

Jesujsis ñanaj y pyotzota'm

³¹ Pijche'ca miñaju te' Jesujsis pyotzota'm y te' ñanaj, y fuera'ojmoc ijtyaju'c, quiʌ'wejyaju iwʌ's wa'y wyeju Jesús.

³² Y te' wʌwʌta'mbʌ pʌ'nis ñe'ca'ŋi pocšajuwʌ's ñʌjayaju: Fuera'ojmoc ijtu mis nanaj y mis mbotzota'm. Nʌmij mye'chaju.

³³ Aŋdzoŋu ñe'cʌ y ñʌjayaju te' pʌnda'm: ¿Iwa'nde' ʌs nanaj y ʌs mbotzota'm?

³⁴ Y ñique'nʌyaju Jesujsis te' tey pocšajuwʌ ñe'ca'ŋi y nʌmu: Yʌ'ta'mbʌyʌ' ʌs nanaj y ʌs mbotzota'm.

³⁵ Porque iwʌ's chʌquiajpa te' Diojsis šu'noquiuy, te'wʌte' ʌs mbotzota'm y ʌs nanaj.