San Lucas 9 - Zoque Copainalá New Testament

Jesujsis quiʌ'weju te' macwʌstʌjca'ytya'mbʌ quiʌ'aŋmaye

¹ Y yajtu'mʌyaju Jesujsis te' macwʌstʌjca'ytya'mbʌ quiʌ'aŋmaye, y chi'yaju isaŋwʌ'ajcuy y aŋgui'mʌtʌjcuy wa'y myacpujtyaju mumu yatzita'mbʌ espíritu y wa'y yajtzoquiaju ca'eta'mbʌ.

² Y pijche'c quiʌ'wejyaju wa'y yajtzoquiaju ca'eta'mbʌ y wa'y maŋu chamgopuŋyaju jutz aŋgui'mopya Dios.

³ Y ñʌjayaju Jesujsis: Uy nʌmaŋdame yajtiyʌ tu'ŋojmocotoya, ni cuytyacus, ni nuti, ni ane, ni tumin. Ni uy nʌmaŋdame yamwingʌšoj.

⁴ Y jutipʌ tʌjcojmomij ñdyʌjcʌytyamba, cojejtamʌ tey, y tey tzu'cumdamʌ.

⁵ Y jutipʌ cumgu'yojmomij ja'n mbyʌjcʌchowatʌjtame, nʌ'camij ñchu'cumdamu, copuptamʌ mis ne'ŋbajcʌsipʌ po'yo. Te'šejmis nyajqueñajpa que ñe'cʌ's ijtyaju quiowa porque ja'n pyʌjcʌchoŋyay te' Diojsis chame.

⁶ Y tzu'cumyaju ñe'cʌta'm, y maŋu quiʌtʌquiaju mumu te' cumgu'yojmota'm wa'y chamgopuŋyaju te' evangelio y wa'y yajtzojcoyaju mumujutʌ.

Yajca'yaju Juan Bautista

⁷ Pijche'c Herodes inʌc nʌ 'yaŋgui'mu, y myujsu mumutiyʌta'm inʌc nʌ chʌjcupʌ Jesujsis. Y jopi'tu porque nʌmyajpa inʌc wene pʌn: Juan Bautistayʌ' winsa'upʌ ca'yajupʌ'ojmoc.

⁸ Y eyata'mbʌ nʌmyaju: Eliaste' queju. Y eyata'mbʌ nʌmyaju: Iwʌjutipʌ tza'maŋwa'oyete' winsa'u, te' winata'mbʌšej.

⁹ Y nʌmu Herodes: Nyajcopajcotʌcsʌtʌju'ʌs te' Juan, ¿iwa' jequeyʌ' yʌ'wʌ, nʌ'ʌs matoŋupʌ tiyʌta'm nʌ chʌjcupʌ's? Y chʌcme'tzpa inʌc jutz wa'y quienu.

Pyʌ'nʌyu Jesujsis mosa'y mil pʌn

¹⁰ Y pijche'ca witu'yaju te' cʌ'wejta'm y minu chamjayaju Jesús mumutiyʌta'm chʌquiajuwʌ. Y pyʌquiaju Jesujsis y ñʌmaŋyaju emʌpʌ luga'rojmo ja'itʌnʌmʌmʌy, Betsaida-cumgu'yis quiowindzʌmbamʌy.

¹¹ Pero ñʌctʌ'yaju'ca te' wʌwʌpʌ pʌ'nista'm, maŋu quio'ŋyaju Jesús, y ñe'cʌ's pyʌjcʌchoŋyaju y ñʌtzamyaju te' Diojsis 'yaŋgui'mʌtʌjcuy y yajtzoquiaju ca'eta'mbʌ.

¹² Y nʌwa' inʌc cha'yanʌmu'c y nu'quiaju te' macwʌstʌjca'ytya'mbʌ y ñʌjayaju: Señor, yajmaŋyaytya'a yʌ' pʌnda'm wa'y myaŋyaju tometa'mbʌ cumgu'yojmo y rancho'mo wa'y mye'chaju jejcuy y wa'y pya'tyaju quiu'tcuy, porque yʌy ittamumʌytyʌ ja'itʌnʌmʌpyʌyʌ'.

¹³ Y Jesujsis ñʌjayaju: Pʌ'nʌytyamʌ mista'm. Y nʌmyaju: Šunba wa'ytyʌs maŋu njuyjayaju cu'tcuy mumu yʌ' pʌnda'm porque na' mosa'ytyʌs nʌ'ijtu pan y metza coquej.

¹⁴ Y mosa'y mil pʌnš e'ŋoyjtya'mbʌte' inʌc. Pijche'ca ñʌjayaju ñe'cʌ's te' quiʌ'aŋmayeta'm: Ma yajpocsquequia yu'mchiŋnayu'c wʌstʌjqui's-co-mac tumdumʌ niwoye.

¹⁵ Y te'šej chʌquiaju, yajpocsquecpʌ'yatʌju mumu.

¹⁶ Y pyʌjcu Jesujsis te' mosa'pyʌ pan y te' metzapʌ coquej, quengui'mu tzajpojmo y ñicomasa'nʌyu y wyenu y chi'yaju te' quiʌ'aŋmaye wa'y šajne'ŋbʌ'yaju te' pʌ'nojmo.

¹⁷ Y mumu cu'tyaju tyajša'ŋoyj. Y pyiŋdu'mʌyajque'tumaj macwʌstʌjca'y waca te' cu'tcʌchʌ'yʌ.

Pedro nʌmu que Jesuste' te' Cristo

¹⁸ Y emʌpʌ luga'rojmo Jesujsis nʌ inʌc 'yoto'ŋʌyu Dios, y ñe'cʌji'ŋ inʌc ijtyaju te' quiʌ'aŋmayeta'm. Y quiʌ'aŋwa'quiaju ñe'cʌ's y nʌmu: ¿Iwʌše'amʌj comʌ'yajpa pʌ'nista'm?

¹⁹ Y aŋdzoŋyaju: Ijtu nʌmyajpapʌ, Juan Bautistamijte', y eyata'mbʌ nʌmyajpa, Eliasmijte'. Y eyata'mbʌ nʌmyajpa, Iwʌjutiwʌ ya'acta'mbʌ tza'maŋwa'oyemijte' winsa'upʌ.

²⁰ Y Jesujsis ñʌjayaju: ¿Y mista'm, iwʌše'amʌj ŋgomʌ'ytyamba? Pijche'ca 'yaŋdzoŋu Pedro's y nʌmu: Diojsismijyʌ' Cristo.

Jesujsis 'yaŋgocasʌyu que maŋba yajca'yaju

²¹ Y Jesujsis ñitza'mʌyaju y 'yaŋgui'myaju uy ya'iwʌ chamjayaju te'šej.

²² Y ñʌjayajque'tu: Ijtupʌte' pyena wa'yʌj ʌj, te' Pʌ'nis 'Yune, ndoyapʌjcu soneta'mbʌ tiyʌcʌsi. Ja'nʌj maŋu pʌjcʌchoŋyaju te' tzamupʌndʌcwa'yis ni te' sacerdote-cowi'na'sta'm ni te' aŋgui'mguy-tyayu'sta'm. Ijtupʌte' pyena wa'yʌj yajca'yaju pʌ'nista'm y wa'yʌj nwinsa'u tuca'y jamacʌsi.

²³ Jʌsa'ca yʌ'šej ñʌjayu Jesujsis mumu pʌn: Juca iwʌ'sʌj sunba co'ŋu, yajʌ'ctzʌ'yʌ ñe' wyin y ñempe yajtoyapʌquia jujcha' ʌj maŋba yajtoyapʌquiaju cruzcʌsi, yajco'ŋjojcʌtʌcʌ'ʌj.

²⁴ Porque juca iwʌ's sunba yajcotzojcu ñe' wyin, yajtocopya. Pero iwʌ's chi'oquia'yajpa wyin ʌjcotoya, yʌ'wʌ's maŋba pya'tu quenguy.

²⁵ ¿Tiya'sʌ'ŋ ñʌwʌ'ajpa pʌ'nis juca quiʌpa'tpa mumutiyʌ najsacopajcʌsi pero yajtocopya quienguy?

²⁶ Porque iwʌ'sʌj cotza'ajpa ʌj y ʌs ndzame, ʌs, te' Pʌ'nis 'Yune's maŋba'ʌs ŋgotza'ajque'tu yʌ'wʌ minba'camʌj ʌs ndzi'muŋgʌ'ojmo, y ʌs Ndata's y masanda'mbʌ 'yangelejsis chi'muŋgʌ'ojmo.

²⁷ Wiyuŋše'ʌsmij ndzamjaytyamba: Ijtu yʌy mi'ojmota'mbʌ ja'n maŋu quia'yajupʌ hasta que quieñajpa jutz aŋgui'mba Dios.

'Yeyacotzʌjcu wyin Jesujsis

²⁸ Chamu Jesujsis yʌ'šejta'mbʌ tiyʌ. Y cʌtʌjcu'ca tucutujta'y jamaše'ŋoyj, yʌ'šej tujcu: Ñʌmaŋu te' Pedro, te' Juan y te' Jacobo y qui'mu ye'ŋupʌ pu'mnacʌsi wa'y 'yoto'ŋʌyu Dios.

²⁹ Y tey inʌc nʌ 'yoto'ŋʌyu'c Dios, 'yeyacotzʌjcu te' wyinnaca's quiene, y ñe' pyama sujpopa'u y tzi'muŋgʌpajcu.

³⁰ Y tey quejyaju metza'ŋbʌn, y nʌ chamdzamnayaju Jesusji'ŋ. Y te'ta'mbʌ Moiseste' inʌc y te' Elías.

³¹ Yʌ' metzata'mbʌ quejyaju tzi'muŋgʌ'ojmo, y nʌ inʌc chamyaju jutz inʌc maŋba yajca'yaju Jesús pʌ'nista'm. Y te'šej inʌc maŋba quiʌtʌcjayu Jerusale'ŋojmo.

³² Pero jene nʌ inʌc pye'ŋyaju ʌwi's te' Pedro y te' ñe'cʌji'ŋ inʌc ijtyajupʌ, y sa'yaju'ca quienjayaju Jesujsis chi'muŋgʌ' y te' metzata'mbʌ pʌn ñe'cʌji'ŋ inʌc ijtyajupʌ.

³³ Y nʌ'ca chu'cumyaju Jesusaŋi te'ta'mbʌ, yʌ'šej tujcu, ñʌjayu Pedro's te' Jesús: Maestro, oye wa'ytyʌ ndzʌ'ytyamu yʌy. Ndzʌcta'mitʌy tuca'y pechtʌc, tumʌ mijcotoya, y tumʌ Moisescotoya y eyapʌ Eliascotoya. Te'šej nʌmu porque ja'n inʌc myusi tiyʌ wa'y chamu.

³⁴ Y yʌ'šejtij nʌ chamu'c Pedro's, wanajcu o'na y quiʌmʌŋdzʌcjayaju y nʌ tyʌjcʌyaju'c te' o'na'ojmo, na'chaju.

³⁵ Y myatoŋyaju otowe te' o'na'ojmoc nʌmupʌ: Yʌ'wʌte' te' ʌs sunbapʌ Une. Cʌmato'ŋʌytyamʌ ñe'cʌ.

³⁶ Y nʌmu'cande' te'šej, Jesustya'a quieñaju. Y numumgʌñe'quiaju, y te'ta'mbʌ jamo'oyj jachamjaya ya'iwʌ te' quieñajupʌ tiyʌ.

Yajtzojcu Jesujsis jaya-une yatzi-espiritu'ʌyupʌ

³⁷ Y jo'pit wanaquiaju te' pu'mnacʌsi, y minu choŋyaju wʌwʌta'mbʌ pʌ'nis.

³⁸ Y tey weju tuma'ŋbʌn te' wʌwʌta'mbʌ pʌ'nojmoc, y nʌmu: Maestro, nwa'cjapya'ʌsmij wa'mis minu nique'nʌyjayu ʌs njaya-une, porque chʌcstumʌpʌte'.

³⁹ Y ñucpa tumʌ espiritu's y yajwejtonbutpa, y yajsʌtʌjtu'ca yajcunba, y ya'a'ŋupa'pa. Y penapit chacpa yajqui'tutzutznayu'ca.

⁴⁰ Y nwa'cjayaju'ʌs mis ŋgʌ'aŋmaye wa'y myacpujtyaju te' espíritu y jamusʌ ñʌpujtya.

⁴¹ Y aŋdzoŋu Jesús y nʌmu: Ja pʌnda'm, ja'ndejcamij nwyʌ'aŋja'moytyame, ndo'wi-quipsoquiuytya'm. ¿Jujche'ŋdiempoma'ʌj maŋba ijtu miji'ŋda'm y nʌmaŋjaytyamba'ʌsmij paciencia? Nʌmindamʌ yʌy te' mis une.

⁴² Y na' nʌ quia'ŋnu'cu'c te' ŋga'e, te' yatzi-espiritu's yajcunu y yajsʌtʌtcʌ'yu. Pero 'yotoŋjayu Jesujsis te' yatzi-espiritu y yajtzojcu te' ŋga'e, y chi'oquia'u te' tyatajcʌsi.

⁴³ Y mumupʌ's ñʌmayajayaju te' Diojsis myʌja'ŋajcʌ'. Y nʌ'cše'ŋoyjtyij ñʌmaya'yaju mumu te' chʌjcupʌ tiyʌ, ñe'cʌ's ñʌjayu te' quiʌ'aŋmayeta'm:

Jesujsis 'yaŋgocasʌwyʌtzʌjcu que maŋba yajca'yaju

⁴⁴ Matoŋdamʌ oye'c, y umis njambʌ'tamu te' nʌ'ʌsmij ndzamupʌ tiyʌ: Maŋba'ʌj tzi'oquiu'yajyaju ʌj, te' Pʌ'nis 'Yune, pʌ'nista'm quiʌ'ojmo.

⁴⁵ Pero ñe'cʌ'sta'm jañʌctʌ'ya tiyʌte' nʌ chamu. Cʌwʌ'nupʌ tiyʌte' inʌc wa'y jana ñʌctʌ'yaju. Y na'chaju wa'y quiʌ'aŋwa'quiaju jutzte' te'šej maŋba tyujcu.

¿Iwa'sʌ'ŋde' te' más mʌja'ŋbʌ?

⁴⁶ Pijche'ca naquiʌ'aŋwa'quiatʌju ñe'co'mo jutiwʌte' más maŋba myʌja'ŋaju ñe'co'mota'm.

⁴⁷ Pero ñʌctʌ'yjayaju Jesujsis tiyʌte' inʌc nʌ quipšaju choco'yojmo. Jyiticʌtʌjcʌyu une y quiojtu che'ŋna'oyj,

⁴⁸ y ñʌjayaju: Iwʌ's pyʌjcʌchoŋba yʌ' une ʌs nʌquiʌsi, ʌjte' pʌjcʌchoŋba. Y iwʌ'sʌj pʌjcʌchoŋba ʌj, pyʌjcʌchoŋba te' cʌ'wejupʌ'sʌj. Porque iwʌ's más chicstzʌcpa wyin mumu mi'ojmota'm, yʌ'wʌte' más maŋba myʌja'ŋaju.

Iwʌ'stʌ ja'n qui'nistame, te'wʌ tʌji'ŋda'mbʌte'

⁴⁹ Pijche'ca ñʌjayu te' Jua'ŋis: Maestro, ŋguenutʌs tumʌ pʌn nʌ myacpujtupʌ's yatzita'mbʌ espíritu mis nʌquiʌsi. Otoŋwindujcutʌs yʌ'wʌ porque ja'n tyumʌco'ŋoy tʌji'ŋ.

⁵⁰ Jesujsis ñʌjayu: Uy otoŋwinductame, porque iwʌ'stʌj ja'n qui'nistame, tumʌco'ŋopya tʌji'ŋ.

Jesujsis 'yotoŋjayu Jacobo y te' Juan

⁵¹ Cuando nʌ inʌc ñu'cu te' aŋsʌŋ wa'y qui'mu Jesús tzajpojmo, paquitzoco'yaju wa'y myaŋu Jerusale'ŋojmo.

⁵² Y ñe'cʌ's yajwi'najyaju nimejcʌ'oyajpapʌ. Y te'ta'mbʌ maŋyaju y tʌjcʌyaju tumʌco cumgu'yojmo Samaria-najsoyj wa'y ñimejcʌyjayaju cojejcuy.

⁵³ Pero japyʌjcʌchoŋya Jesús te' Samaria-pʌ'nista'm porque chʌjcu wyin Jerusale'ŋojmo nʌ myaŋupʌšej.

⁵⁴ Y quieñaju'ca yʌ'šej te' quiʌ'aŋmaye'sta'm, Jacobo y Jua'ŋis, ñʌjayaju: Señor, ¿sunbaja wa'ytyʌs aŋgui'mu wa'y wyanajcu jucʌtʌc tzajpojmoc wa'y pyoŋbʌ'yaju, chʌjcušej Eliajsis?

⁵⁵ Pijche'ca quenwitu'u Jesús y 'yotoŋwinduquiaju y ñʌjayaju: Ja'nmis nʌ nʌctʌ'ytyamu tiyʌ quipsoquiuy mis nʌ'ittamu.

⁵⁶ Porque ʌj, te' Pʌ'nis 'Yune, jaminʌ'ʌj wa'yʌs nyajtocoyjayu pʌ'nista'm wyin, sino que minu'ʌj wa'yʌs nyajcotzoquiaju. Y maŋyaju eyapʌ cumgu'yojmo.

Sunbapʌ's inʌc quio'ŋyaju Jesús

⁵⁷ Y nʌ'c myaŋyaju ñe'cʌta'm tu'ŋojmo, minu ñʌjayu Jesús tuma'ŋbʌ'nis: Señor, maŋba'ʌsmij ŋgo'ŋu jutʌtijmij myawʌ.

⁵⁸ Y Jesujsis ñʌjayu: Wetu'sta'm ijtyaju cha'tʌc, y te' sitityajpapʌ paloma's ijtyaju ño'se. Pero ʌj, te' Pʌ'nis 'Yune's, ja'ndiyʌ ni ʌs mbata tiyʌcʌsi wa'yʌj ʌŋu.

⁵⁹ Y eyapʌ ñʌjayu Jesujsis: Co'ŋa'ʌj. Y ñe'cʌ nʌmu: Señor, tzacʌma'ʌj winac wa'yʌs maŋu nasnicotʌ'ŋʌyu ʌs ndataj.

⁶⁰ Y Jesujsis ñʌjayu: Tzaquia te' ca'yajupʌšej ijtyajupʌ's quiowa'ojmo wa'y ñe'cʌ'sta'm ñasnicotʌ'ŋʌyaju ca'yajupʌ tyʌwʌ. Y mij, mawʌ, ma tzamgopuwʌ jutz aŋgui'mopya Dios.

⁶¹ Pijche'ca nʌmgue'tu eyapʌ: Señor, maŋba'ʌsmij ŋgo'ŋu. Pero tzi'ʌ'ʌj lugar winac wa'yʌs maŋu njojtzpʌcʌtzaquiaju ʌs ndʌjcaŋʌ ijtyajupʌ.

⁶² Y Jesujsis ñʌjayu: Iwʌ quenwitu'pa yoscu'yojma' ijtu'c ja'n musi yojsu oye Dioscotoya.