San Lucas 7 - Zoque Copainalá New Testament

Jesujsis yajtzocjayu capita'ŋis quioyosa

¹ Yʌ'še'a ñʌjayaju'c Jesujsis te' tey ijtyajupʌ, maŋu te' Capernaum-gumgu'yojmo.

² Y tumʌ capita'ŋis ñʌ'ijtu inʌc tumʌ quioyosa jene šunbapʌ. Ca'epa'tu yʌ'wʌ y maŋba inʌc quia'u.

³ Y myujsu'ctij te' capita'ŋis que nʌ chamyaju Jesús, quiʌ'weju judio'sta'm chamupʌndʌcway wa'y wya'cjayaju Jesús wa'y minu yajtzocjayu te' quioyosa.

⁴ Y quiʌ'maŋyaju Jesús ñe'cʌ'sta'm y chijpana-wa'cjayaju y ñʌjayaju: Yʌ' capita'ŋis myerecetzʌcpa wa'mis ŋgotzoŋu

⁵ porque jene šunjapya tʌs nación, y ñe'cʌ's yajtenayjayu tʌs nwindʌc.

⁶ Y Jesús maŋu ñe'cʌji'ŋda'm. Pero tomya' nʌ quieñaju'c te' tʌc, quiʌ'wejque'tu te' capita'ŋis eyata'mbʌ Jesusaŋi y ñʌjayaju: Señor, u'ya tzi'i pena wa'mij minu. Ja'nʌs merecetzʌqui wa'mij ŋguia'ŋdʌjcʌyu ʌs ndʌjcojmo.

⁷ Como ja'nʌs merecetzʌqui, jašunʌ'ʌj minʌ mi'aŋʌ. Pero nʌmʌ wa'y chojcu ʌs ŋgoyosa y tzocpa.

⁸ Porque ʌj, cojtyajque'tu'ʌj wa'yʌj aŋgui'moyu, y aŋgui'myajpa'ʌs soldado. Nʌjapya'ʌs tumʌ: Mawʌ, y maŋba. Nwejpa'ʌs eyawʌ, y minba. Aŋgui'mba'ʌs ʌs ŋgoyosa: Tzʌcʌ yʌ'wʌ, y chʌcpa.

⁹ Te'še'a myatoŋu'c Jesujsis, ñʌmaya'u te' pʌn, y quenwitu'u y ñʌjayaju te' nʌ quio'ŋyajupʌ's: Ʌsmij nʌjaytyamba que ni te' Israel-pʌ'nojmota'm jambya'ttʌ'ma'ʌs yʌ'še'ŋ wʌ'aŋja'mopyapʌ.

¹⁰ Y witu'yaju'cande' tʌjcoyj te' quiʌ'wejyatʌjupʌ, tzojcuwa' pya'tyaju te' coyosa, ca'epʌ inʌc.

Jesujsis yajwinsa'jayu se'aŋ-yomo's 'yune

¹¹ Y jʌsa'ca yʌ'šej tujque'tu: Ijtu inʌc tumʌ cumguy ñʌjayajpapʌ Naín. Y teymʌ inʌc nʌ myaŋu Jesús, y ñe'cʌji'ŋ nʌ inʌc myaŋyajque'tu sone quiʌ'aŋmayeta'm y wʌwʌ pʌn.

¹² Y nʌ'c tyʌjcʌyu'c te' Nain-cumgu'yoyj, tey nʌ inʌc ñʌpujtyaju ca'uwʌ. Y te'wʌ tʌŋdumʌ unete' inʌc ñana'sñe', y ñanaj se'aŋ-yomote' inʌc. Y cutzupa inʌc nʌ miñaju cumgupyʌn ñe'cʌji'ŋ.

¹³ Y quienu'ctij tʌ Ngomi's, tyo'ya'ŋʌyu te' yomo y ñʌjayu: Uy jʌyi.

¹⁴ Y ca'ŋnu'cu Jesús y pyi'quisjayu te' quiajon. Y tenachʌ'yaju te' nʌ inʌc chʌmnʌmaŋyajupʌ's. Y Jesús nʌmu: Tʌwʌy, nʌjapya'ʌsmij, tzu'cumʌ.

¹⁵ Pijche'ctij pocsqui'mu te' ca'upʌ y tzamdzamnaquiʌ'yu. Y Jesujsis chi'oquia'u te' ñanajcʌsi.

¹⁶ Y na'chaju mumu te' pʌnda'm y myʌja'ŋwʌcotzamyaju Dios y nʌmyaju: Mʌja'ŋ tza'maŋwa'oye'stʌ cʌ'mindamu. Y nʌmyajque'tu: Quiʌ'minu Diojsis te' ñe' pyʌnda'm.

¹⁷ Y copuŋu Jesujsis chamʌtʌjcuy mumu Judea-najsojmo y jujche'ŋ nas quiowindzʌmbapʌji'ŋ.

Te' pʌnda'm quiʌ'wejyajupʌ Juan Bautista's

¹⁸ Y Jua'ŋis quiʌ'aŋmaye'sta'm yajmujšaju ñe'cʌ yʌ'šejta'mbʌ tiyʌ. Y Jua'ŋisa quiopiŋu metza quiʌ'aŋmaye,

¹⁹ y quiʌ'wejyaju Jesusaŋi wa'y maŋu quiʌ'aŋwa'quiaju: ¿Mijate' te' Mesías, te' maŋba minupʌ inʌc, o njo'cpamajtʌs eyapʌ?

²⁰ Y quiʌ'miñaju te' pʌ'nista'm te' Jesús y nʌmyaju: Juan Bautista'stʌjyʌ' cʌ'weju mi'aŋi. Minutʌj wa'ytyʌsmij ŋgʌ'aŋwa'cu: ¿Mijate' te' maŋbapʌ inʌc minu o njo'cpamajtʌs eyapʌ?

²¹ Y tey ijtyaju'c yajtzojcu Jesujsis sone ca'eta'mbʌ y yatziputzi'ʌyajupʌ y yatzi-espiritu'ʌyajupʌ y yajsʌ'ŋjayaju wyitʌm to'tita'mbʌ'sñe'.

²² Y aŋdzoŋu Jesús y ñʌjayaju: Ma tzamjaytyamʌ te' Juan tiyʌ mis nʌ ŋguendamu y tiyʌ mis nʌ matoŋdamu. Nʌ šʌ'ŋyaju te' to'tita'mbʌ's wyitʌm. Nʌ quia'ŋyaju oye te' mʌ'ŋyajpapʌ. Nʌ quiowajyaju te' yatziputzi'ʌyajupʌ. Y nʌ 'yaŋwajyaju quiowi cowita'mbʌ'sñe'. Nʌ wyinsa'yaju te' ca'yajupʌ, y nʌ chamgopuŋjayatʌju te' evangelio te' yacsnu'ajcu'yojmo ijtyajupʌ.

²³ Y dichoso iwʌ ja'n myawequi'šca'e porque wʌ'aŋjamba'ʌj.

²⁴ Tzu'cumyaju'ca Jua'ŋis quiʌ'wejta'm, chamgʌ'yu Jesujsis te' Juan te' wʌwʌpʌ pʌ'nista'm wyi'naŋdʌjqui, y ñʌjayaju: ¿Tiya'nde' maŋu ŋguendamu te' ja'itʌnʌmʌmʌy? ¿Ja'nja te' cape nʌ yajmi'csupʌ sawa's?

²⁵ Pero ¿tiya'nde' maŋu ŋguendamu? ¿Ja'nja te' tzi'nmequia'upʌ pʌn? Te' re'yis pyalacio'ojmo ijtyajpa te' newe'ijtyajpapʌ y te' tzi'nmequia'yajpapʌ.

²⁶ Pero ¿tiya'nde' maŋu ŋguendamu? ¿Ja'nja te' tza'maŋwa'opyapʌ? Jʌ'ʌ, y ndzamjaytyaŋgue'tpa'ʌsmij tza'maŋwa'oyete' y itniqui'ma'ŋʌyupʌ.

²⁷ Yʌ' Juaŋde' te' chambapʌ te' Totojaye's: Ʌj Dios, yʌ'yʌs ŋgʌ'wejpa ʌsne' ŋgʌ'wej mis nwi'naŋdʌjqui. Yʌ'wʌ's maŋba ñimejcʌyjayaju pʌ'nista'm chocoy mijcotoya jujcha' pʌ'nista'm ñimejcʌyajpa tuŋ.

²⁸ Ñʌjayajque'tu Jesujsis: ʌsmij ndzamjaytyamba que japyʌ'najtʌ'ʌmaj tza'maŋwa'oye najsacopajcʌsi más itniqui'ma'ŋʌyupʌ que ja'nde' Juan Bautista. Pero te' más cʌmaŋbʌ pʌn aŋgui'mbamʌy Dios, te'wʌte' más itniqui'ma'ŋʌyu que ja'n Juan.

²⁹ Y yʌ'še'a myatoŋyaju'c te' pʌ'nʌputzi'is y tze'coyajpapʌ's, nʌmyaju que justopʌte' Dios. Y chi'yaju lugar te' Juan wa'y yajnʌ'yʌyaju.

³⁰ Pero te' fariseo'sta'm y te' aŋgui'mguy-myujsoye'sta'm japyʌjcʌchoŋjaya te' Diojsis 'yaŋnʌctza'mʌ'oquiuy ñe'cʌcotoyata'm y jachaquia wa'y Jua'ŋis yajnʌ'yʌyaju.

³¹ Y nʌmu tʌ Ngomi: ¿Jutza'mʌs utztʌ'pa jeque te' pʌnda'm te' yʌtijta'mbʌ tiempo'ojmo ijtyajuwʌ? ¿Y tiyʌšejta'mbʌte'?

³² Yʌ'ta'mbʌ, plaza'ojmo pocšajpapʌ unešejta'm, tuptupnayajpapʌ ñe'co'mo, y nʌmyajpa: Mbi'cjaytyamutʌsmij flauta y ja'yetztamʌmij. Y nwanjayutʌsmij ca'uwʌ wane y janjyʌytyamʌmij.

³³ Minu'c Juan Bautista, ja'n inʌc suni tyumʌcu'tu ni tyumʌ'ujcu pʌnji'ŋda'm, y ñʌmdambamij inʌc: Yatzipʌ espiritu'syʌ' ñʌc'ijtʌyu.

³⁴ Mingue'tu'ʌj ʌj, te' Pʌ'nis 'Yune, y tumʌcu'tpa'ʌj, y tumʌ'ucpa'ʌj pʌnji'ŋda'm, y ñʌmdambamij: Yʌ'wʌ's tyʌwʌpa'tpa tze'coyajpapʌ y eyata'mbʌ cowatzʌqui.

³⁵ Pero 'yoyecocojtyajpa te' mujsoquiuy mumu te' mujsoye'sta'm.

Jesús, te' Simo'ŋis tyʌjcaŋʌ

³⁶ Y tumʌ te' fariseo's wya'cjayu Jesús wa'y quiu'tu ñe'cʌji'ŋ. Y tʌjcʌyu'ca te' fariseo's tyʌjcojmo, pocsu te' mesa'ojmo.

³⁷ Y te' cumgu'yojmo ijtu inʌc tumʌ cowatzʌquipʌ yomo. Myujsu'ctij te'wʌ's que mesa'ojmo inʌc ijtu Jesús te' fariseo's tyʌjcaŋʌ, ñʌminu tumʌ alabastropʌ cojtoquiuy ijtuwo'mo jajsoquiuy.

³⁸ Y 'yucaŋgʌ'mʌc quiʌnu'cʌyu y minu jyʌyu ñe'ŋbajcaŋi y ñitiqui'ʌyjayu ñe'ŋbacta'm wyitʌm nʌ'pit. Y quiomocjayu ñe' wyapyit. Y šu'cjayu te' ñe'ŋbacta'm y jyasjayu te' jajsoquiupyit.

³⁹ Y te' fariseo 'yaŋbʌjcupʌ's te' Jesús quienu'ca yʌ'šej, nʌmu choco'yojmo: Juca inʌc tza'maŋwa'opyapʌ yʌ'wʌ, ispʌcpa inʌc iwʌyʌ' y tiyʌyʌ' yʌ' yomo nʌ pyi'quisupʌ's, que cowatzʌquipʌ yomoyʌ'.

⁴⁰ Pijche'ca aŋdzoŋu Jesús y ñʌjayu: Simón, sunba'ʌsmij ndzamjayu tiyʌ'iwʌ. Y ñe'cʌ's ñʌjayu: Tzamja'ʌj, Maestro.

⁴¹ Jya'tzjayajpa inʌc metza'ŋbʌ'nis tumʌ pʌn ñucspʌ'papʌ's tyumin. Jya'tzjapya inʌc tumʌpʌ's tumʌ-mone-co-mojsi's denario y te' eyawʌ's wʌstʌjqui's-co-mac.

⁴² Y como myejtzji'ŋ inʌc ja'ndiyʌ tiyʌpit wa'y quioyojyaju, yajcotocoyjayaju te' jya'tzi. Yʌtij tzamdʌ'ʌj ¿jutiwʌ'sasʌ'ŋ más šunba?

⁴³ Aŋdzoŋu Simón y nʌmu: Ngomʌ'pya'ʌs que te' más wʌwʌ yajcotocoyupʌ te' comi's. Y Jesujsis ñʌjayu: Oyete' mis ndzamušej.

⁴⁴ Y quenwitu'u te' yomo'aŋi y ñʌjayu Simón: ¿Nʌja ŋguenu yʌ' yomo? Tʌjcʌyu'ʌj mis ndʌjcojmo, y jañchi'ʌmisʌj nʌ' wa'yʌs ndze'u ʌs ne'ŋbac, pero yʌ'wʌ's ñitiqui'ʌyjayu ʌs ne'ŋbac wyitʌm nʌ'pit y quiomocjawya'a wyapyit.

⁴⁵ Jašu'cʌmisʌj, pero yʌ'wʌ's desde que tʌjcʌyu'ʌj, jašu'caŋjejatij ʌs ne'ŋbac.

⁴⁶ Janjyasjamis ʌs ŋgopac aceitepit, pero yʌ'wʌ's jyasjawya'a jajsoquiupyit ʌs ne'ŋbac.

⁴⁷ Te'cotoya'ʌsmij ndzamjapya que ñe' wʌwʌta'mbʌ quiowa cotocopyʌ'wa'a, porque jene su'noyu. Iwʌ'sñe' uša'ŋ yajcotocoyjayajpa quiowa, uša'ŋ su'nopya.

⁴⁸ Y ñʌjayu te' yomo: Mis ŋgowa nyajcotocoyjawya'mʌs.

⁴⁹ Y te' tumʌpocšajupʌ mesa'ojmo ñe'cʌji'ŋ nʌmgʌ'yaju ñe'co'mo: ¿Iwa' jequeyʌ' yʌ'wʌ, yajcotocoquie'tpapʌ's cowa?

⁵⁰ Pero ñʌjayu te' yomo Jesujsis: Mis nwʌ'aŋja'moquiupyit ŋguiotzojcumij. Sʌ'mnayu'c mawʌ.