San Lucas 23 - Zoque Copainalá New Testament

Jesús te' Pilato's wyi'naŋdʌjqui

¹ Y cutzupa tzu'cumyaju tey mumu, y ñʌmaŋyaju Jesús te' Pilato'aŋʌ.

² Ñicotza'mʌquiʌ'yaju Jesús y nʌmyaju: Yʌ'wʌ ŋgunjawya'ndʌs que nʌ chʌcjopi'tjayu tʌs nación y aŋgui'mopya uy quiocoyo'oyaju Cesarcʌsi. Y nʌmba que ñe'cʌte' te' Cristo, te' Rey.

³ Pijche'ca Pilato's quiʌ'aŋwa'cu y ñʌjayu: ¿Mijate' te' judio'sta'm Rey? 'Yaŋdzoŋu Jesujsis y nʌmu: Pijtʌjyʌ', mis nʌ ndzamušej.

⁴ Pilato's ñʌjayaju te' sacerdote-cowi'nata'm y te' pʌnda'm: Yajtiyʌ cowa ja'ʌs mba'tjay yʌ' pʌ'nisñe'.

⁵ Pero jaque-nʌmyajpa inʌc: Chʌcjopi'tpa 'yaŋma'yoquiupyit mumu Judea'ojmota'mbʌ pʌn. Ñitzʌjcu Galilea-najsojmo y nu'cpa hasta yʌmʌšej.

Jesús te' Herodejsis wyi'naŋdʌjqui

⁶ Pijche'ca Pilato's myatoŋu'ctij Galilea, quiʌ'aŋwa'cu juca Galilea-pʌnde' inʌc te' Jesús.

⁷ Y ñʌctʌ'yu Pilato's que Herodejsiste' 'yaŋgui'mʌtʌjcu'yis quiowindzʌmbapʌ inʌc. Te'cotoya quiʌ'weju Jesús ijtumʌy Herodes, porque te'ta'mbʌ jamo'oyj tey inʌc ijtu Jerusale'ŋojmo.

⁸ Quienu'ctij Herodejsis te' Jesús, ñʌ'o'maŋgʌtʌjcu porque sone tiempo'ande' inʌc quiʌñʌñba wa'y quienu. Myatoŋu jutz inʌc chamyajpa Jesús y te'cotoya sunba inʌc quienjayu tiyʌ'iwʌ 'yisaŋwʌ'ajcuy.

⁹ Y tyacscʌ'aŋwa'cʌ'yu, pero Jesujsis yajutz ja'yaŋdzowa.

¹⁰ Tey inʌc ijtyaju sacerdote-cowi'nata'm, y aŋgui'mguy-tyayuta'm wa'y jyaque-nicotza'mʌyaju.

¹¹ Pijche'ca Herodejsis y te' šoldado'sta'm yajtiyʌšej quieñaju y qui'tzcu'yajyaju. Reyšej yajmequia'yaju rico pamapit y te'šej quiʌ'wejwʌtzʌjcu Pilato'aŋʌ.

¹² Y te' jamo'oyj amigotzʌquiaju Pilato te' Herodesji'ŋ porque naqui'nisʌtʌjyajpapʌte' inʌc.

Jyajcʌyjayaju Jesús wa'y yajca'yaju

¹³ Pijche'ca Pilato's yajtu'mʌpyʌ'yaju sacerdote-cowi'nata'm, y te' aŋgui'myajpapʌ y mumu te' pʌnda'm.

¹⁴ Y ñʌjayaju: Nya'aŋguejtamumis ʌs nwi'naŋdʌjqui yʌ' pʌn jujcha' chʌcjopi'tpapʌ's pʌnda'm. Y ʌs ŋgʌ'aŋwa'cpʌcpʌ'u'ʌs mista'm nwi'naŋdʌjqui y yajtiyʌ cowa'ʌs jambya'tʌ yʌ' pʌ'nisñe' te' niwa'cʌytyambašejmis.

¹⁵ Ni te' Herodejsis japya'tja nijutzpʌ quiowa, te'cotoya cʌ'wejwʌtzʌcjaytyamutʌj yʌy. Ja'n pyʌqui wa'y yajca'yaju yʌ' pʌn porque ja'ndiyʌ nijutzpʌ quiowa.

¹⁶ Maŋba'ʌs ndapsu jeque, y ndzʌcʌpʌ'pa'ʌs.

¹⁷ Tumdumʌ pascua-sʌ'ŋoyj pyʌcpa inʌc wa'y chʌcʌpʌ'jayaju tumʌ preso.

¹⁸ Pero tumnacacʌsi wejyaju myuma'ŋgʌ'y y nʌmyaju: Yajca'ʌ yʌ'wʌ, y tzacʌpʌ'jatʌj Barrabás.

¹⁹ Te'wʌ somupʌte' inʌc porque ñʌcʌpo'u quipcuy te' cumgu'yojmo y yajca'oyu.

²⁰ Pilato's 'yoto'ŋʌwyʌtzʌquiajque'tu porque sunba inʌc chʌcʌpʌ'u Jesús.

²¹ Pero wejwʌtzʌquiajque'tu te' pʌnda'm y nʌmyaju: Ma'mʌ cruzcʌsi, ma'mʌ cruzcʌsi.

²² Y tyuca'y ñaco'mo ñʌjayajque'tu Pilato's: ¿Tiyʌ yacha'cu'ya jeque chʌjcu yʌ'wʌ's? Nijutzpʌ quiowa'ʌs ja'n mba'tjay wa'yʌs nyajca'u. Maŋba'ʌs jeque ndapsu y ndzʌcʌpʌ'pa'ʌs.

²³ Pero pʌ'nista'm weju'c inʌc wya'quiajpa wa'y mya'mʌyaju Jesús cruzcʌsi. Tanto que wejyaju ñe'cʌta'm y te' sacerdote-cowi'nata'm, wyejmocha'yaju Pilato ñe'cʌ'sta'm.

²⁴ Pijche'ca Pilato nʌmu que wa'y tyujcu ñe'cʌ's wya'quiajpašej.

²⁵ Chʌcʌpʌ'jayatʌju te' preso'mo inʌc ijtupʌ, te' yajca'oyupʌ y quipcuy ñʌcʌpo'opyapʌ, porque te'wʌte' wya'quiaju. Y chi'oquia'u Jesús wa'y chʌquiaju ñe'ta'm šu'noquiuy.

Mya'mʌyaju cruzcʌsi Jesús

²⁶ Nʌ'ca ñʌmaŋyaju Jesús, ñuquiaju Simón Cirene'ojmopʌ, nʌ inʌc minupʌ tza'mo'moc. Y te'wʌ chi'yaju pena wa'y ñʌmaŋjayu Jesujsis cruz ñe' 'yucaŋgʌ'y.

²⁷ Y cutzupa quiʌ'maŋyaju te' cumgu'yojmocta'mbʌ's y te' yomo'sta'm. Yʌ'ta'mbʌ's quiojʌyajpa y tyo'ya'ŋʌyajpa inʌc.

²⁸ Pero Jesujsis quienwitu'jayaju y ñʌjayaju: Jerusalen-yomota'm, u'yʌj cojʌytyame, pero cojʌytyamʌ ne' nwin y mista'm une.

²⁹ Porque te' miñajpapʌ jamo'oyj maŋba ñʌmyaju: Dichosa te' mapeta'mbʌ y te' mo'yʌndzima jajyu'mʌpʌ's une y te' tzu'tzi ja'yuneyajtzocapʌ.

³⁰ Pijche'c pʌ'nista'm maŋba ñʌjayaju te' cotzʌcta'm: Nicu'nʌytyamʌtʌj. Y maŋba ñʌjayajque'tu te' pu'mnata'm: Cʌwʌ'ndamʌtʌj.

³¹ Juca yʌ'šejta'mbʌ tiyʌ chʌcjayajpa te' tzujtzujpʌ cuy, ¿muspajatʌ jutz maŋba chʌjquiajque'tu te' tʌtzta'mbʌ cuy?

³² Y nʌ inʌc ñʌmaŋyajque'tu metza nu'myajpapʌ Jesusji'ŋ wa'y yajca'yatʌju.

³³ Nu'quiaju te' luga'royj ñʌjayajpamʌy: Ca'uwʌ coy'awa pac. Tey mya'mʌyaju Jesús cruzcʌsi, y eyata'mbʌ cruzcʌsi metza nu'myajpawʌ, tumʌ chʌ'na'ŋojmoc y te' eyapʌ 'yaŋña'ojmoc.

³⁴ Y Jesús nʌmba inʌc: Tatay, yajcotocoya, porque ja'n myujšay tiyʌte' nʌ chʌquiaju. Y quiosijayaju te' pyama wa'y wye'nbʌ'yaju ñe'co'mota'm.

³⁵ Cumgu'yis inʌc nʌ quienu y cowi'na'sta'm nʌ inʌc quiʌsijcʌyaju Jesús y nʌmyaju: Eyata'mbʌ yajcotzojcu. Juca ñe'cʌte' te' Cristo, te' Diojsis quiopiwi, yajyajcotzoca wyin.

³⁶ Y qui'tzcu'yajyajque'tu Jesús te' soldado'sta'm, y ca'ŋnu'quiaju wa'y chi'yaju vinagre.

³⁷ Y ñʌjayaju: Juca mijte' te' judio'sta'm Rey, yajcotzoca ne' nwin.

³⁸ Mya'mʌyaju tabla cruzcʌsi Jesujsis quiʌsmʌ ja'yʌyumʌy griego-otowe'ojmoc, latin-otowe'ojmoc y judio-otowe'ojmoc nʌmbamʌy: YɅ'WɅTE' TE' JUDIO'STA'M REY.

³⁹ Y te' chʌquiajupʌ's te' yacha'cuy tey inʌc ijtyajque'tu ma'mdzʌ'yajupʌ. Tumʌpʌ's wyinʌcnʌ'mnʌ'mwʌyu, y ñʌjayu: Juca mijte' te' Cristo, yajcotzocatʌj, tʌj y misne' nwin.

⁴⁰ Te' eyapʌ's 'yotoŋwindujcu y ñʌjayu: ¿Ni mis, ja'nja na'tze te' Dios, y nʌmiste' ŋgo'aŋgʌquie'tu ŋgowa?

⁴¹ Tʌta'm, wiyuŋšej justopʌ tiyʌte' wa'ytyʌ ndoyapʌjcu, porque ndzʌjcupʌ tzʌquitʌte' nʌ ŋgo'aŋgʌyu. Pero yʌ'wʌ's jachʌcʌ yajtiyʌ cowa.

⁴² Y ñʌjayu Jesús: Señor, te'yamʌj jamwʌtzʌcʌ minba'camij 'yaŋgui'moyu.

⁴³ Pijche'ca Jesujsis ñʌjayu: Wiyuŋše'ʌsmij ndzamjapya que išo'oyj maŋbamij ijtu ʌji'ŋ te' paraiso'ojmo.

Ca'u Jesús

⁴⁴ Paŋguc-jamaše'ŋoyj pi'tzanʌmu naswindumʌ y menu-jamaše'ŋoyj minu šʌ'ŋbʌ'nʌmu.

⁴⁵ Pi'tza'u te' jama, y te' templo'ojmopʌ pama-aŋgʌyʌ cuctaŋu.

⁴⁶ Pijche'ca maya'aŋ weju Jesús y nʌmu: Tatay, nitza'mʌpya'ʌs espíritu mijcʌsi. Yʌ'še'a nʌmu'c, ca'u.

⁴⁷ Quienu'ca te' capita'ŋis tiyʌ tujcu, myʌja'ŋwʌcotzamu Dios y nʌmu: Wiyuŋšej justopʌyʌ' inʌc yʌ' pʌn.

⁴⁸ Y mumu te' tey no'tznayajupʌ wi'na'ŋoyj nʌ quieñajupʌ's quieñaju tiyʌ tujcu y cucpac pu'ŋu'c maŋyaju.

⁴⁹ Pero mumu te' quio'ispʌquiajpapʌ's Jesús, y te' yomota'm Galilea'ojmoc quio'ŋnʌmiñajupʌ's ya'amyʌctij inʌc nʌ 'yocnʌque'nʌyaju yʌ'šejta'mbʌ tiyʌ.

Ñipyaju Jesús

⁵⁰ Ijtu inʌc tumʌ pʌn ñʌjayajpapʌ José, Arimatea'ojmopʌte' inʌc te' Judea-najsis quiowindzʌmbapʌ. Te'wʌ aŋgui'mbapʌ, oyepʌ y wʌpʌ pʌnde' inʌc.

⁵¹ Jañʌtu'mbajcajya te' aŋgui'myajpapʌ's chʌquiajušej, y jyo'que'tpa inʌc wa'y 'yaŋgui'moyu Dios.

⁵² Yʌ'wʌ's quiʌnu'cʌyu Pilato y wya'cjayu Jesujsis cuerpo.

⁵³ Yajwanajcu y myonu sabana'ojmo. Maŋu quiojtu te' cuerpo ca'uwʌ tza'tʌjcojmo nojtaŋwajupʌ tza'ojmo. Te'wo'mo ya'iwʌmajte' jaquiojtyatʌ'ʌpʌ.

⁵⁴ Nʌte' inʌc ñimejcʌyaju judio'sta'm tiyʌ'iwʌ te' pascua-sʌŋgotoya. Nʌwa'nde' inʌc tyo'mʌyu te' sabado-jama.

⁵⁵ Y te' yomo'sta'm quio'ŋnʌmiñajupʌ's inʌc Jesús te' Galilea'ojmoc, maŋu quieñaju te' tza'tʌc y jutz quiotjayaju te' Jesujsis cuerpo.

⁵⁶ Y witu'yaju'ca tyʌjcaŋʌ, ñimejcʌyaju omoma y jajsoquiuy. Y sapʌquiaju te' sabado-jamo'oyj pyʌcpašej te' aŋgui'mgu'yis.