San Lucas 20 - Zoque Copainalá New Testament

Te' Jesujsis 'yaŋgui'mʌtʌjcuy

¹ Tumnaca yʌ'šej tujque'tu: Nʌ inʌc 'yaŋmayaju Jesujsis te' pʌnda'm te' templo'ojmo y nʌ inʌc chamgopuŋu te' evangelio. Pijche'ca nu'quiaju sacerdote-cowi'nata'm y te' aŋgui'mguy-tyayuta'm te' tzamupʌndʌcwayji'ŋ.

² Ñʌjayaju Jesús: Tzamjatʌj ¿jutzpʌ aŋgui'mʌtʌjcupyi'tayʌ' ndzʌcpa yʌ'šejta'mbʌ tiyʌ? ¿Y iwʌ'sa jequeyʌ' ñchi'u yʌ'šejpʌ aŋgui'mʌtʌjcuy?

³ Pijche'ca aŋdzoŋu Jesús y ñʌjayaju: Ʌs maŋba'ʌsmij ŋgʌ'aŋwa'ctaŋgue'tu mijta'm. Tzamjaytyamʌ'ʌj:

⁴ ¿Iwʌ'sa chi'u Juan aŋgui'mʌtʌjcuy wa'y yajnʌ'yʌ'oyu? ¿Diojsisʌ'ŋde' chi'u o pʌ'nista'm?

⁵ Pero quipsoyaju y nʌmyaju ñe'co'mo: Juca nʌmbatʌj, Diojsiste' chi'u aŋgui'mʌtʌjcuy, maŋbatʌj nʌjayu: ¿Y tiyajca'nde' janwyʌ'aŋjamdamʌ?

⁶ Y juca nʌmbatʌj: Pʌ'nista'mde' chi'u, maŋbatʌj tʌŋga'yaju tza'pit mumu cumgupyʌ'nis. Porque tumʌtzocoy inʌc wyʌ'aŋjamyajpa que te' Juan tza'maŋwa'oyete' inʌc.

⁷ 'Yaŋdzoŋyaju que ja'n inʌc myujšay jutʌpʌte'.

⁸ Pijche'ca ñʌjayaju Jesujsis: Ni ʌs, ja'nʌsmij ndzamjaytyame jutzpʌ aŋgui'mʌtʌjcupyi'tʌs ndzʌcpa yʌ'šejta'mbʌ tiyʌ.

Te' yatzita'mbʌ cowe'nducʌ

⁹ Y Jesujsis chamnʌcʌtzo'tzjayaju te' cumgupyʌn yʌ'šejpʌ comparación: Chʌjcu tumʌ nas-comi's te' uva-nipi y chi'oquia'u yojšajpapʌcʌsi wa'y quiowe'nduquiaju. Pijche'ca maŋu ya'ay y teymʌ ya'yu.

¹⁰ Y nu'cu'cande' te' uva-aŋsʌŋ, quiʌ'weju tumʌ quioyosa ijtyajumʌy te' cowe'nducʌta'm wa'y minu pyʌjcʌchoŋu te' uva-nipi's tyʌm quiowindzʌmbaše'ŋ. Pero te' cowe'nducʌ'sta'm ñacšaju te coyosa y wyindumʌ yajtzu'cumyaju.

¹¹ Y te' uva-comi's quiʌ'wejwʌtzʌjque'tu eyapʌ quioyosa. Pero te'šejtij chʌquiajque'tu yʌ'ta'mbʌ's. Ñacšaju y chʌctza'ajyaju y wyindumʌ yajtzu'cumyajque'tu.

¹² Quiʌ'wejwʌtzʌjque'tu tuca'yojmopʌ quioyosa Pero te'šejtijque' ñacšaju te'wʌ, y ñʌpujtyaju.

¹³ Pijche'cande' te' uva-comi nʌmu: ¿Tiya'mʌs ndzʌcpa yʌtij? Maŋba'ʌs ŋgʌ'weju une sunbapʌ'ʌs Quieñajpa'ca yʌ'wʌ, muspajatʌ' jutz maŋba quiʌna'tzʌyaju.

¹⁴ Pero quieñaju'ctij te' cowe'nducʌ'sta'm, quipsoyaju ñe'co'mo, y nʌmyaju: Yʌ'wʌ'syʌ' maŋba ñʌtzʌ'yupʌ. Ma'ndʌ nyajca'tamu wa'ytyʌ tʌ nʌtzʌ'yjaytyamu te' yojsaŋ.

¹⁵ Myacpujtyaju te' uva-nipi'ojmoc y yajca'yaju ¿Tiya'sʌ'ŋ maŋba chʌcjayatʌju te' uva-comi's?

¹⁶ Maŋba minu, y maŋba yajca'pʌ'yatʌju yʌ' cowe'nducʌta'm. Y maŋba chi'oquia'u te' ñe' uva-nipi eyata'mbʌ cowe'nducʌcʌsi. Myatoŋyaju'ca pʌ'nista'm te'šej, nʌmyaju: Diojsistʌ yajcotzowa.

¹⁷ Pero Jesujsis ñique'nʌyaju y nʌmu: ¿Tiya' jeque sunba chamu te' yʌ'šej ja'yʌyumʌy? Te' tza' jašuñapʌ tʌctzʌquiajpapʌ's, Yʌ'wʌ minu yojsu aŋguinʌ tzo'tzcuquiotoya.

¹⁸ Iwʌ cunba te' tza'cʌsi, te' tza'is maŋba wyenu, pero iwʌ te' tza'is ñicu'nʌpya, maŋba ñamatu'pu'u.

Te' cocoyo'oquiuy

¹⁹ Pijche'ctij chʌcme'chaju wa'y ñuquiaju Jesús te' sacerdote-cowi'na'sta'm y te' aŋgui'mguy-tyayu'sta'm porque ñʌctʌ'yaju que ñe'cʌta'mde' nʌ chamyatʌju chamu'c te' comparación. Pero ña'chaju te' wʌwʌta'mbʌ pʌn.

²⁰ Quiengʌwijtyajpa inʌc y quiʌ'wejyaju cʌ'isʌ'oye jyustocotzʌquiajupʌ's wyin wa'y yajcuñaju chamdzamnaquiuquiʌsi te' Jesús. Te'šej chʌquiaju wa'y chi'oquiu'yajyaju gobernado'ris quiʌ'ojmo.

²¹ Te'ta'mbʌ's quiʌ'aŋwa'quiaju: Maestro, muspatʌs que ndzambamis y aŋmapyamis wiyuŋbʌ tiyʌ. Ja'nmis menoschʌqui ni'iwʌ pʌn, sino que wiyuŋšej nyajqueñajpamis te' tuŋ te' Diojsisñe'.

²² ¿Yajwinducpasʌ'ŋdʌ aŋgui'mgu'yis wa'ytyʌ ŋgocoyo'oyu Cesarcʌsi, o ja'ne?

²³ Pero como Jesujsis ñʌctʌ'yjayaju te' ñe'ta'm myaña'cuy, ñʌjayaju: ¿Tiyʌcotoya'mʌjte' sunba oc'istamu?

²⁴ Yajquendamʌ'ʌj te' tumin. ¿Iwʌ'sja yʌ' wyinnaca-chʌqui, y yʌ' ja'yʌyupʌ tiyʌ cʌsmʌc? 'Yaŋdzoŋyaju y nʌmyaju: Te' rey Cesa'riste'ñe'.

²⁵ Pijche'ca ñʌjayaju Jesujsis: Tzi'tamʌ jeque te' César ñe'cʌ's quiowindzʌmbaše'ŋ, y tzi'taŋgue'ta Dios ñe'cʌ's quiowindzʌmbaše'ŋ.

²⁶ Y jamusʌ yajcuña Jesús yʌ' cʌ'isoye'sta'm te' chamupʌ tiyʌpit te' pʌ'nista'm wyi'naŋdʌjqui. Ñʌmaya'yaju te' aŋdzoŋušej y numumgʌñe'quiaju.

¿Jutzasʌ'ŋ winsa'ʌnʌmu'ca?

²⁷ Pijche'ca quiʌnu'cʌyaju Jesús metza tuca'y saduceo'sta'm. Yʌ'ta'mbʌte' nʌmyajpa que ja'n maŋu wyinsa'ʌnʌmu. Minu quiʌ'aŋwa'quiaju, y nʌmyaju:

²⁸ Maestro, Moisejsis jayʌtzacjayutʌj que juca iwʌjutiwʌ's 'yatzi ca'pa y chacpa te' yomo, y ja'itʌ 'yune, yajnʌco'tʌjcaja te' pyotzo's te' yomo wa'y ijtyaju 'yune, te'šej wa'y yajwingʌyojayu 'yatzi's ñʌy.

²⁹ Ijtu inʌc jeque cu'ya'ytya'mbʌ atzi. Co'tʌjcaju te' winbʌ, y ca'u, pero ja'itʌ 'yune.

³⁰ Y te' myetzo'mopʌ's ñʌco'tʌjcajayu te' yomo, y ca'que'tu te' pʌn y ja'itque'tatij 'yune.

³¹ Y te' tyuca'yojmopʌ's ñʌco'tʌjcajayu te' yomo. Te'šej jeque te' quiu'ya'pyʌni ñʌco'tʌjcajayaju. Y mumu ja'ijtya 'yune, y ca'yaju.

³² Y último ca'que'tu te' yomo.

³³ Como quiu'ya'pyʌni tiju ñʌ'itne'ŋbʌ'yaju, ¿jutiwʌ'sasʌ'ŋde' yomo winsa'yajpa'ca ca'yajupʌ?

³⁴ Pijche'ca aŋdzoŋu Jesús y ñʌjayaju: Yʌtijta'mbʌ pʌn co'tʌjcajyajpa y šajyajpa 'yune wa'y quio'tʌjcajyaju.

³⁵ Pero jujche'ŋ Diojsis myayajupʌ wa'y wyinsa'yaju ca'yajupʌ'ojmoc pijche'cpʌ itcuquiotoya, ja'na maŋu quio'tʌjcajyaju ni ja'na maŋu šajyaju 'yune.

³⁶ Ja'na musi quia'yaju porque tu'mbacta'mba'nde' angelesji'ŋda'm. Y yʌ'šejta'mbʌ Diojsisande 'yuneta'm pitpʌ winsa'cu'yoyj.

³⁷ Juca ndzambatʌ que wiyuŋšej maŋba wyinsa'yaju te' ca'yajupʌ, te'šej yajnʌctʌ'yopya Moisés jya'yʌyjayu'c totocʌsi tiyʌte' yajmujsu te' nembapʌ apit-su'tʌpit. Nʌmu que tʌ Ngomi, Abraha'ŋiste' Dios, Isaajquiste' Dios y Jacojpiste' Dios.

³⁸ Porque juca ñe'cʌ te' ñe'ta'm Dios, queñajpamaj ñempe ca'yaju ñe'ta'm cuerpo.

³⁹ Y 'yaŋdzoŋyaju metza tuca'y aŋgui'mguy-tyayu'sta'm, y nʌmyaju: Maestro, wyiyuŋdzambamij.

⁴⁰ Desde pijche'c ja'ijtya pyaquitzoco'yajcuy wa'y quiʌ'aŋwa'quiajque'tumaj tiyʌ'iwʌ.

¿Iwʌ'sasʌ'ŋde' 'yune te' Cristo?

⁴¹ Pijche'ca Jesujsis ñʌjayaju: ¿Tiyʌcotoyasʌ'ŋ nʌmyajpa que te' Cristo Davijtiste' 'yune?

⁴² Y te' Davijtis jyayu te' Salmo-libro'ojmo nʌmbamʌy: 'Yoto'ŋʌyjayu ʌs Ngomi te' Tata Diojsis y ñʌjayu: Pocsa yʌy ʌs ndzʌ'na'ŋoyj mʌja'ŋajcu'yojmo,

⁴³ Nyajmaŋgopajcʌyajpa'cše'ŋo'yʌsmij te' ŋgui'nišajpapʌ'smij.

⁴⁴ Juca David jequete' te' tataj, ¿tiyajca' ñʌjayu te' Cristo, ʌs Ngomi, juca 'yunete'?

Yatzicotzamu Jesujsis te' aŋgui'mguy-tyayuta'm

⁴⁵ Y nʌ quiʌmato'ŋʌyaju'c mumu pʌ'nis, Jesujsis ñʌjayaju ñe' quiʌ'aŋmaye:

⁴⁶ Coquendamʌ cuenta te' aŋgui'mguy-tyayuta'm. Yʌ'ta'mbʌ's yamyajpa pʌytya'mbʌ pyama wa'y quieñatʌju. Quiʌñʌñajpa wa'y myʌja'ŋdyujchi'yatʌju te' plaza'ojmo. Y quiʌñʌñajpa te' wi'naŋ-bocscuytya'm judio'sta'm wyindʌjcojmopʌ y te' wi'naŋ-bocscuytya'm sʌŋ-gu'tcu'yojmo.

⁴⁷ Yʌ'ta'mbʌ's ñicu'tpʌ'yajpa se'aŋ-yomota'm, y chʌquiajpa pʌytya'mbʌ conucsoquiuy wa'y cha'maŋjamyaju. Te'cotoya más wʌwʌ maŋba quio'aŋgʌyaju.