San Lucas 18 - Zoque Copainalá New Testament

Te' se'aŋ-yomo y te' cʌme'tzopyapʌ pʌn

¹ Chamjayajque'tu Jesujsis tumʌ comparación que ijtupʌte' pyena wa'ytyʌ oto'ŋʌyu Dios mumu jama y uytyʌ ndzocomyocha'tamu.

² Y nʌmu: Tumʌco cumgu'yojmo ijtu inʌc tumʌ cʌme'tzopyapʌ. Te'wʌ's ja'n inʌc ña'tze Dios, ni ja'n inʌc quiʌjamʌ'ʌy pyʌndʌwʌ.

³ Y itque'tu inʌc te' cumgu'yojmo tumʌ se'aŋ-yomo. Yʌ'wʌ's quiʌ'minjojcʌtʌcpa inʌc te' cʌme'tzopyapʌ y ñʌjapya inʌc: Coquipʌ'ʌj ʌs ŋgui'nisoye's quiʌ'ojmoc justiciapit.

⁴ Y te' cʌme'tzoye's, quienu'ca que sone naca'a quiʌ'tijpa, jašunʌ chʌcja justicia. Pero jʌsa'ca nʌmu choco'yojmo:

⁵ U'ya'mʌj molestatzʌjcu yʌ' se'aŋ-yomo's, maŋba'ʌs ndzʌcjayu justicia, uy mingue'tumaj wa'y yajayu ʌs mbaciencia.

⁶ Nʌmu tʌ Ngomi: Matoŋdamʌ tiyʌ chamba te' ja'n jyustopʌ cʌme'tzoye's.

⁷ ¿Ja'nsʌ'ŋ chʌcjay Diojsis justicia ñe' quiopiwita'm, wyejwindzoŋyajpapʌ's ñe'cʌ tzu'ji'ŋ jamaji'ŋ? ¿Maŋbasʌ'ŋ ya'yu wa'y 'yaŋdzoŋu?

⁸ Ʌsmij ndzamjaytyamba que ja'n maŋu ya'yu wa'y quioquipyaju. Pero minba'camʌj ʌj, te' Pʌ'nis 'Yune, ¿maŋbasʌ'ŋʌs mba'tu wʌ'aŋja'moquiuy najsacopajcʌsi?

Te' fariseo y te' tze'copyawʌ

⁹ Y chamjayajque'tu Jesujsis yʌ'šejpʌ comparación te' quiomʌ'yajpapʌ's que ñe'ta'm wyin justopʌte', te' myenoschʌquiajpapʌ's tyʌwʌ.

¹⁰ Metza'ŋbʌn qui'myaju te' templo'ojmo wa'y maŋu quionucsoyaju, tumʌ fariseo y te' eyapʌ tze'copyapʌ.

¹¹ Te' fariseo tenayu'c inʌc conucsopya ñaytyumʌ. Y nʌmgʌ'yu: Dios, yʌscotoya mis ndzʌcpa porque ja'nʌj eyata'mbʌ pʌnšej. Cota'nupʌ'ʌjyʌ', ja'nʌj nu'mi, ni ja'nʌj ŋgʌtzʌjcʌ'oy, ni ja'nʌj yʌ' tze'copyapʌ pʌnšej.

¹² Ayunatzʌcpa'ʌj metza naca tumʌ semana'ojmoc, y ŋgoyojapya'ʌs myajca'yajcuy mumu nyojsa'ŋisñe'.

¹³ Pero te' tze'copyapʌ ya'amyʌctij ja'n inʌc suni quiengui'mu tzajpojmo. Y cucpac pu'ŋu'c inʌc nʌmba: Dios, to'ya'ŋʌ'ʌj, porque cowatzʌquipʌ pʌ'nʌjyʌ'.

¹⁴ Ʌsmij nʌjaytyamba que yʌ'wʌ justopa' wanajcu ñe' tyʌjcaŋʌ, y te' eyapʌ, ja'ne. Porque iwʌ's myʌja'ŋgomʌ'pya wyin, maŋba yajcʌma'ŋajyaju. Y iwʌ's quiʌmaŋdzʌcpa wyin, maŋba yajmʌja'ŋajyaju.

Ñicomasa'nʌyu Jesujsis te' uneta'm

¹⁵ Ñʌnu'quiajpa inʌc uneta'm Jesusaŋi wa'y quiojtu quiʌ' ñe'cʌcʌsita'm. Pero quieñaju te' quiʌ'aŋmaye'sta'm y 'yotoŋjayajpa inʌc te' ñʌmiñajupʌ's te' uneta'm.

¹⁶ Pero Jesujsis wyejyaju y nʌmu: Tzactamʌ te' uneta'm wa'y miñaju ʌ'aŋi. Uy yajwinductame porque yʌ'šejta'mbʌte' maŋba tyʌjcʌyaju aŋgui'mopyamʌy Dios.

¹⁷ Wiyuŋše'ʌsmij ndzamjaytyamba que iwʌ's ja'n unešej chʌqui wyin wa'y tyʌjcʌyu aŋgui'mopyamʌy Dios, ja'n maŋu tyʌjcʌyu tey.

Te' itʌpa'tupʌ pʌn

¹⁸ Tumʌco cowi'na's quiʌ'aŋwa'cu Jesús y ñʌjayu: Oyepʌ Maestro, ¿tiya'sʌ'ŋ oye wa'yʌs ndzʌjcu wa'yʌs mba'tu ja'n yayepʌ quenguy?

¹⁹ Jesujsis ñʌjayu: ¿Tiyʌcotoya'mʌjte' nʌjapya, oyepʌ Maestro? Ja'ndiyʌ ya'iwʌ oyepʌ, juca ja'n Dios tumʌpʌ.

²⁰ Muspamis te' aŋgui'mguytya'm: Uy yajca'oy, uy cʌtzʌjcʌ'oy, uy nu'mi, uy cotestigosay sutzi, wʌcocottamʌ mis ndataj y mis nanaj.

²¹ Ñe'cʌ nʌmu: Mumu yʌ'šejta'mbʌ tiyʌ ŋgojamu'ʌs desde ʌs une'ajcu'yojmo.

²² Y myatoŋu'ca Jesujsis yʌ'šej, ñʌjayu: Faltamaj tumʌpʌ tiyʌ. Ma ma'ʌpyʌ'ʌ ndiyʌta'm mis ijtu, y tzi'ya te' tumin te' yacsnuwijtyajpapʌ. Te'šej maŋbamij itʌpa'tu tzajpojmo. Y minʌ co'ŋa'ʌj.

²³ Ñe'cʌ's myatoŋu yʌ'šej y jene triste'aju, porque jene itʌpa'tupʌte' inʌc.

²⁴ Quienu Jesujsis jutz tuyuquiʌñe'cu y nʌmu: Penapit maŋba tyʌjcʌyaju te' itʌpa'tyajupʌ te' aŋgui'mbamʌy Dios.

²⁵ Porque más mawʌcʌtʌcpa te' camello acuša-wo'ojmo que ja'n wa'y tyʌjcʌyaju itʌpa'tyajupʌ aŋgui'mbamʌy Dios.

²⁶ Y te' nʌ inʌc myatoŋyajupʌ's nʌmyaju: ¿Iwa'sʌ'ŋ jeque muspa quiotzojcu?

²⁷ Jesujsis ñʌjayaju: Tiyʌta'm ja'n musi chʌjcu pʌ'nis, Diojsis muspa chʌjcu.

²⁸ Pijche'ca Pedro nʌmu: Tʌs, ndzacwa'ndʌs mumu jujche'ŋdʌs nyojsaŋ y nʌtʌsmij ŋgo'ŋu.

²⁹ Jesujsis ñʌjayaju: Wiyuŋše'ʌsmij ndzamjaytyamba que iwʌ's chacpa tyʌc, tyatajta'm, 'yatzi, pyotzo, yomo o 'yune wa'y yosjayu Dios,

³⁰ te'wʌ's maŋba pyʌjcʌchoŋu más wʌwʌ yʌy najsacopajcʌsi y te' minbapʌ tiempo'ojmo maŋba pyʌjcʌchoŋu te' ja'n yayepʌ quenguy.

Jesujsis 'yaŋgocasʌwyʌtzʌjcu que maŋba yajca'yaju

³¹ Ñʌca'ŋwe'ñaju emʌ Jesujsis te' macwʌstʌjca'ytya'mbʌ pʌn y ñʌjayaju: Yʌtij nʌtʌ ŋgui'mdamu Jerusale'ŋojmo. Y maŋba tyujcu jya'yʌyajušej tza'maŋwa'oye'sta'm tiyʌta'mʌj maŋba cʌtʌcjayu, ʌj, te' Pʌ'nis 'Yune.

³² Maŋba'ʌj tzi'oquia'yaju te' genti'lista'm quiʌ'ojmo. Y maŋba'ʌj qui'tzcu'yajyaju, winʌcwejwejwʌyaju y nitzu'ʌyaju.

³³ Y nacstochʌquiaju'camʌj, maŋba'ʌj yajca'yaju. Pero tuca'y jamacʌsi maŋba'ʌj nwinsa'u.

³⁴ Pero ñe'cʌ'sta'm yajutz inʌc ja'n ñʌctʌ'yay yʌ'šejta'mbʌ tiyʌ y jašʌ'ŋgʌputʌ'cmajte' yʌ'šejpʌ tzame. Ja'n inʌc ñʌctʌ'yay tiyʌte' inʌc nʌ ñʌtzamyaju.

Yajtzojcu Jesujsis tumʌ to'tipʌ

³⁵ Nʌ'c tyo'mʌyu'c Jesujsis Jerico-cumguy, yʌ'šej tujcu: Tey inʌc pocsu tumʌ to'tipʌ pʌn tu'ŋaŋi, nʌ wya'cupʌ's limosna.

³⁶ Te'wʌ's myatoŋu que nʌ quiʌtʌquiaju pʌnda'm y quiʌ'aŋwa'cu iwʌta'mde'.

³⁷ Y ñʌjayaju que nʌte' quiʌtʌjcu Jesús te' Nazarejtojmowʌ.

³⁸ Pijche'ca weju'c nʌmu: Jesús, Davijtis 'Yune, to'ya'ŋʌ'ʌj.

³⁹ Te' wi'najyajupʌ's 'yotoŋjayaju uy wyeju. Pero más inʌc wejqui'mba y nʌmu: Davijtis 'Yune, to'ya'ŋʌ'ʌj.

⁴⁰ Pijche'ca tenachʌ'yu Jesús y nʌmu wa'y ñʌminjayaju ñe'ca'ŋi. Nu'cu'ctij, quiʌ'aŋwa'cu Jesujsis,

⁴¹ y nʌmu: ¿Tiya' sunba wa'yʌs ndzʌjcu mijcotoya? Ñe'cʌ nʌmu: Señor, yajsʌ'ŋja ʌs nwitʌm.

⁴² Jesujsis ñʌjayu: Yajsʌ'ŋʌ. Mis nwʌ'aŋjamgupyit ñchojcumij.

⁴³ Pijche'ctij yajsʌ'ŋjayu te' wyitʌm. Quio'ŋgʌ'yu Jesús y myʌja'ŋwʌcotzamba inʌc Dios. Y wyʌcotzamyaju Dios mumu pʌ'nis quieñaju'ca te'šej.