San Lucas 16 - Zoque Copainalá New Testament

Te' ja'n ñijamyapyʌ co'aŋgui'moye

¹ Ñʌjayajque'tu Jesujsis te' quiʌ'aŋmaye: Ijtu inʌc tumʌ pʌn itʌpa'tupʌ. Yʌ'wʌ's ijtu inʌc tumʌ quio'aŋgui'moye y yʌ'wʌ ñicotza'mʌyaju te' quiomicʌsi que nʌ yajayu te' yojsaŋ.

² Y wyeju te' quiomi's y ñʌjayu: Šujayajwa'mʌs ŋgowi. ¿Tiya'nde' nʌ ndzʌjcu? Yʌtij tzamja'ʌj jutz mis nʌ nʌtu'ŋaju mis ŋgo'aŋgui'moquiuy, porque ja'namij maŋu mujsu ŋguio'aŋgui'moyu.

³ Pijche'cande' te' co'aŋgui'moye quipsoyu choco'yojmo: ¿Tiya'mʌs ndzʌcpa yʌtij? Ʌsyʌ' ŋgomi's maŋba yajʌcʌ'jayu ʌs ŋgo'aŋgui'moquiuy. Ja'ʌs musi ndaju nas y tza'ajpa'ʌj wa'yʌj nwa'cwijtu.

⁴ Muspa'mʌs tiyʌ'ʌs maŋba ndzʌjcu wa'yʌj pʌjcʌchoŋyaju ñe'ta'm tyʌjcojmo, yajʌcʌ'jayajpa'ca'mʌs ŋgo'aŋgui'moquiuy.

⁵ Y wyejyaju tumduma'ŋbʌn te' jya'tzjayajpapʌ's inʌc ñe' quiomi. Te' winbʌ ñʌjayu: ¿Jujche'ŋa nja'tzjapya ʌs ŋgomi?

⁶ Y ñe'cʌ nʌmu: Mojsi's barril aceite. Pijche'ca te' co'aŋgui'moye's ñʌjayu: Pʌcʌ misyʌ' nja'tzi-toto y pocsa jʌnʌc y ja'yʌ wʌstʌjqui's-co-mac barril.

⁷ Pijche'ca ñʌjaquie'tu eyapʌ: ¿Y mij, jujche'ŋa njya'tzpa? Ñe'cʌ nʌmu: Mojsi's muqui trigo. Pijche'ca te' co'aŋgui'moye's ñʌjayu: Pʌcʌ misyʌ' nja'tzi-toto y ja'yʌ mactajsi's.

⁸ Y wyʌcotzamu quiomi's te' ja'n 'yoyepʌ quio'aŋgui'moye porque chi'twituwituwʌyu. Yʌ' yʌtijta'mbʌ ja'n wyʌ'aŋjamyapyʌ's Dios chi'twituwituwʌyajpa yempetiyʌ tyʌwʌji'ŋda'm más que ja'nde' sʌ'ŋgʌ'ojmo ijtyajupʌ's.

⁹ Ʌsmij nʌjaytyamba: Amigotzʌctamʌ yʌ' yʌtijta'mbʌ's rico'ajcupyit wa'mij mbyʌjcʌchowatʌjtamu ja'n yayepʌ itcu'yojmo yaju'cande' te' rico'ajcuy.

¹⁰ Iwʌ's yajta'nbʌ'pa chicsta'mbʌ tiyʌ, te'šejtij yajta'nbʌ'que'tpa mʌjata'mbʌ. Iwʌ's ja'n yajcota'nbʌ'i chicsta'mbʌ tiyʌ, te'šejtij ja'n yajcota'ngue'te mʌjata'mbʌ tiyʌ.

¹¹ Pero juca jañchʌctamʌmis ta'nupʌ tiyʌ yʌ' yʌtijta'mbʌ's rico'ajcupyit, ¿iwʌ'sa ŋguionfiatzʌcjaytyamba te' wiyuŋšejpʌ rico'ajcu'yojmo?

¹² Y juca eyane'cʌsimis jañchʌctamʌ ta'nupʌ tiyʌ, ¿iwʌ'samij maŋba ñchi'tamu ŋgowindzʌmdambaše'ŋmis?

¹³ Ni'iwʌpʌ coyosa's ja'n musi yosjayu tumnacacʌsi metzapʌ comi, porque maŋba qui'nisu tumʌ y maŋba šunu te' eyapʌ o maŋba myʌja'ŋgomʌ'yu tumʌ y te' eyapʌ ja'n myʌja'ŋgomʌ'i. Ja'nmis musi nyosjaytyamu Dios y nyosjaytyaŋgue'tu te' itʌpa'tcuy.

¹⁴ Mumu yʌ'šejta'mbʌ tiyʌ myatoŋyaju te' fariseo'sta'm. Como sunba inʌc itʌpa'tyaju, quiʌsijcʌyaju Jesús.

¹⁵ Pero ñe'cʌ's ñʌjayaju: Mista'm, oyecocottambamis ne' nwin pʌ'nista'm wyi'naŋdʌjqui, pero ispʌcpa Diojsis tiyʌ mis sundamba ndzoco'yojmo. Tiyʌ myʌja'ŋgomʌ'yajpa pʌ'nis, qui'nispa Diojsis.

Te' aŋgui'mguy y te' aŋgui'mbašej Dios

¹⁶ Te' aŋgui'mguy yojsu y te' tza'maŋwa'oyeta'm tza'maŋwa'oyaju hasta te' Jua'ŋis jyamo'oyjtya'm. Y pijche'c chamgopuŋgʌ'yaju te' evangelio chambapʌ's jutz aŋgui'mba Dios. Mumu pʌ'nis chi'pa pena wa'y tyʌjcʌyu aŋgui'mbamʌy ñe'cʌ.

¹⁷ Pero maste' fácil wa'y yaju te' tzap y te' nas que ja'n wa'y 'yaŋgui'maŋjeju tumʌc más namapʌ letra aŋgui'mgu'yisñe'.

Jesujsis chamu te' divorcio

¹⁸ Iwʌ's chacpa te' yomo y co'tʌjcajpa eyapʌji'ŋ, nʌte' quiʌtzʌjcʌ'oyu. Y iwʌ co'tʌjcajpa te' chaquiajupʌji'ŋ, cʌtzʌjcʌ'opya.

Te' itʌpa'tupʌ pʌn y te' Lázaro

¹⁹ Ijtu inʌc tumʌ pʌn itʌpa'tupʌ, yambapʌ's inʌc yʌc-tzapaspʌ pama wʌwʌ coyowapʌ. Tumdumʌ jama inʌc chʌcpa mʌja'ŋ-gu'tcuy.

²⁰ Y itque'tu inʌc tumʌ wa'cwitjojcʌtʌcpapʌ pʌn, ñʌjayajpapʌ Lázaro. Tey inʌc te'tznapocsu yʌ'wʌ te' itʌpa'tupʌ's puerta'ŋi, y amyagapʌ.

²¹ Sunba inʌc quiu'tu te' cʌtupu te' itʌpa'tupʌ's myesacʌ'mʌ cunbapʌ. Te' tuwi'sta'm minba inʌc quiatjayaju te' llaga.

²² Yʌ'šej tujcu: Ca'u te' wa'cpapʌ y ñʌmaŋyaju angelejsista'm ijtumʌy te' Abrahán. Y ca'que'tu te' itʌpa'tupʌ y maŋu ñipyaju.

²³ Y nʌ tyoyapʌjcu'c te' ijtyajpamʌy ca'yajupʌ, quengui'mu. Ya'amyʌc quienu te' Abrahán, y te' Abrahaŋji'ŋ tumʌ'ijtu te' Lázaro.

²⁴ Pijche'ca weju'c nʌmu: Tata Abrahán, to'ya'ŋʌ'ʌj. Cʌ'weya Lázaro wa'y yajmuju quiʌ'mosi nʌ'pit y wa'y minu yajsujcʌyjayu ʌs ndotz porque nʌ'ʌj ndoyapʌjcu yʌ' jucʌtʌc-nema'ojmo.

²⁵ Pero ñʌjayu Abraha'ŋis: Tʌwʌy, jamwʌtzʌcʌ que mbʌjcʌchoŋumis itʌpa'tcuy najsacopajcʌsimajmij ijtu'c, y Lazaro's quienu toya. Pero yʌtij ñe'cʌ sʌ'mnayu'c ijtu yʌy, y mis nʌmis ŋguenu toya tey.

²⁶ Ja'n solo te'šej, sino que maya'aŋ jaŋupʌ jojpac ijtu tʌta'm ŋgucmʌ. Juca iwʌ sunba chu'cumu yʌy wa'y myaŋu mi'aŋʌta'm, ja'n musi quiʌtʌjcu, ni teymʌcta'mbʌ ja'n quiʌtʌquiay wa'y miñaju yʌy.

²⁷ Pijche'ca ñʌjayu te' itʌpa'tupʌ's: Nwa'cjapya'ʌsmij jeque, tatay, wa'mis ŋgʌ'weju Lázaro ʌs ndata's tyʌjcaŋʌ.

²⁸ Porque tey ijtyaju mojsa'y ʌs mbotzota'm. Y sunba'ʌs wa'y chamjayaju uy miñaju ñe'cʌta'm yʌy toyapʌcpamʌ'yʌj.

²⁹ Y Abraha'ŋis ñʌjayu: Ijtu te' Moisejsis tyotojaye y te' tza'maŋwa'oye'sta'mñe'. Yajmato'ŋoyjaya.

³⁰ Pijche'ca te' itʌpa'tupʌ's ñʌjayu: Ja'ne, tata Abrahán. Pero juca iwʌjutiwʌ's quiʌ'maŋjayajpa ca'yajupʌ'ojmoc, maŋba quipswitu'yaju.

³¹ Pero Abraha'ŋis ñʌjayu: Juca ja'n myato'ŋoyjayay Moisejsis tyotojaye y te' tza'maŋwa'oye'sta'mñe', ja'n maŋu wyʌ'aŋjamyaju ñempe winsa'ʌ iwʌjutiwʌ ca'yajupʌ'ojmoc.