San Lucas 15 - Zoque Copainalá New Testament

Tocoytyʌ'upʌ ñchowambe

¹ Quiʌnu'cʌyajpa inʌc Jesús mumu tze'coyajpapʌ's y cowatzʌquita'mbʌ's wa'y quiʌmato'ŋʌyaju.

² Y tuptupnayajpa inʌc fariseota'm y aŋgui'mguy-tyayuta'm. Nʌ inʌc ñʌmyaju: Yʌ'wʌ's pyʌjcʌchoŋba cowatzʌquita'mbʌ y cu'tpa ñe'cʌji'ŋda'm.

³ Pijche'ca Jesujsis chamjayaju yʌ'šejpʌ comparación:

⁴ Juca ijtu tuma'ŋbʌ'nis mojsi's ñchowambe, y tocopya tumʌ, ¿ja'nsʌ'ŋ chaque te' noventa y nuevepʌ ja'itʌnʌmʌmʌy y maŋba mye'tzu te' tocoyupʌ hasta que pya'tpa?

⁵ Y pya'tu'ca, quiotpa pyequicʌsi y ñʌ'omba.

⁶ Maŋba tyʌjcaŋʌ. Yajtu'mʌpya 'yamigota'm y vyecinota'm y ñʌjayajpa: Nʌnʌ'omdamʌ'ʌj, porque mba'twa'mʌs te' ñchowambe tocoyupʌ inʌc.

⁷ Ndzamjaytyamba'ʌsmij yʌ'šej: Más maŋba ñʌ'omyaju tzajpojmota'mbʌ's quipswitu'pa'c tumʌ cowatzʌquipʌ pʌn que ja'nde' noventa y nueve justota'mbʌ ja'na pyʌquiapyʌ's wa'y quipswitu'yaju.

Tocoytyʌ'upʌ tumin

⁸ O juca tumʌpʌ yomo's ñʌ'ijtu majca'y dracma-tumin y yajtocopya tumʌ, ¿ja'nsʌ'ŋ ño'e sʌ'ŋgʌ' y tyacspete tyʌc wa'y chijpana-me'tzu hasta que pya'tpa?

⁹ Y pya'tu'ca, wyejtu'mʌyajpa te' yoma'ŋdʌwʌ y tyʌjca'ŋoyjtya'mbʌ. Y ñʌjayajpa: Nʌnʌ'omdamʌ'ʌj, porque mba'twa'mʌs te' dracma tocoyupʌ inʌc.

¹⁰ Te'še'ʌsmij ndzamjaytyamba que maŋba ñʌ'omyajque'tu Diojsis 'yangelejsis cuando quipswitu'pa'c tumʌ cowatzʌquipʌ pʌn.

Te' maŋu jyowiwijtupʌ

¹¹ Nʌmgue'tu Jesús: Ijtu inʌc tumʌ pʌn ijtupʌ's metza 'yune.

¹² Te' potzo's ñʌjayu te' tyataj: Tatay, tzi'a'mʌj maŋbaše'ŋʌs nʌtzʌ'yupʌ tiyʌ. Y tyata's wye'nbʌ'jayaju te' ñe' interés.

¹³ Jaquiʌtʌcʌ sone jama, yajtu'mʌpyʌ'u te' potzo's mumutiyʌta'm chi'yaju, y maŋu ya'ay eya najsojmo. Teymʌ yaju ijtuše'ŋbʌ tyiyʌ jyowi-itcu'yojmo.

¹⁴ Y tacsniyaju'ca, minu maya'aŋbʌ yu' te' ijtumʌy, y quiengʌ'yu toya.

¹⁵ Pijche'ca maŋu yosjayu tumʌ pʌn te' najsoyj. Te'wʌ's quiʌ'weju rancho'mo wa'y maŋu pyʌ'nʌyu yoyaj.

¹⁶ Sunba inʌc quiʌ'su te' cupyac yu'pit te' yoya's quiʌ'šajpapʌ. Pero ya'iwʌ's inʌc ja'n chi'i.

¹⁷ Minu quipsoquiuy y nʌmu: Ʌs ndata's tyʌjcaŋʌ wʌwʌta'mbʌ quioyosa's ijtyaju wʌwʌ quiu'tcuy, y ʌj yʌy, wʌntzʌ'ʌj ŋga'u yu'is.

¹⁸ Maŋba'ʌj ndzu'cumu y maŋba'ʌj ndata'ŋʌ. Maŋba'ʌs nʌjayu ndataj: Tatay, cowapa'tu'ʌj Diojsis wyi'naŋdʌjqui y mis nwi'naŋdʌjqui.

¹⁹ Ja'na'mʌs nucpʌqui wa'misʌj unešej ŋgomʌ'yu. Pʌjcʌchowa'ʌj jujcha' coyospawʌytya'a.

²⁰ Tzu'cumu y maŋu tyata'ŋʌ. Y ya'amyʌcmaj nʌ minu'c, 'yocnʌque'nʌyu tyata's y tyo'ya'ŋʌyu. Popya maŋu y jyotzcʌtʌjcʌyu y šu'cu.

²¹ Ñʌjayu te' 'yune's: Tatay, cowapa'tu'ʌj Diojsis wyi'naŋdʌjqui y mis nwi'naŋdʌjqui. Y ja'na'mʌs nucpʌqui wa'misʌj unešej ŋgomʌ'yu.

²² Pero te' tata's ñʌjayaju te' quioyosa: Nʌputtamʌ te' más oyepʌ meque y yajmequia'tamʌ. Yajyamdamʌ quiʌ'ojmo cʌ'cumʌ y cʌ'ac ñe'ŋbajcojmo.

²³ Ma pʌctamʌ te' tzaŋgapʌ wacas-une, y yajca'tamʌ. Ma'ndʌ ŋgʌ'stamu y ndzʌcta'mitʌy sʌŋ.

²⁴ Porque yʌ' ʌs une ca'tʌ'upa'yʌ' y yʌtij winsa'wʌtzʌjcu, tocoytyʌ'upʌyʌ' y yʌtij quejwʌtzʌjcu. Y sʌ'ŋajcʌ'yaju.

²⁵ Pero te' más tzamupʌ 'yune te' pʌ'nisñe', yoscu'yojmo inʌc ijtu. Te'wʌ nʌwa' inʌc minu tyʌjcaŋʌ, y tomya' ijtu'c, myatoŋu te' son y quienu nʌ 'yejchaju.

²⁶ Wyeju tumʌ te' coyosa y quiʌ'aŋwa'cu tiyʌte' nʌ quiosʌ'ŋajyaju.

²⁷ Y ñe'cʌ's chamjayu: Minupʌte' mis mbotzo. Y porque cosa'sapʌ pyʌjcʌchoŋu mis ndata's, te'cotoya yajyajca'ʌtʌju tzaŋgapʌ wacas-une.

²⁸ Pijche'ca qui'šca'u te' atzi y ja'n inʌc suni tyʌjcʌyu. Te'cotoya pujtu te' tyataj y minu 'yoto'ŋʌyu wa'y tyʌjcʌyu.

²⁹ Pero ñe'cʌ's 'yaŋdzoŋu te' tyataj y ñʌjayu: Ʌs, sone ame'a'mʌsmij nyosjapya. Ja'nʌs maŋgocʌtʌcjay mis aŋgui'mguy, y nunca misʌj jañchi'tʌ'maj yajtya' tumʌc chiu-une wa'yʌs nʌ'omu ʌs amigoji'ŋda'm.

³⁰ Pero minu misyʌ' une, te' tijupʌ's yajayu mis nyojsaŋ malejyomoji'ŋda'm. Y yʌtij minu'ŋmʌjcʌ nyajca'jayumis tzaŋgapʌ wacas-une.

³¹ Pijche'ca tyata's ñʌjayu: Tʌwʌy, mumu jamatijmij yʌy itpa ʌji'ŋ, y mumutiyʌ ʌsne', miste'ne'.

³² Pero ijtupʌte' inʌc pyena wa'ytyʌ nʌ'omdamu y sʌ'ŋajtamu porque misyʌ' mbotzo ca'tʌ'upa'yʌ' y yʌtij winsa'wʌtzʌjcu, tocoytyʌ'upʌyʌ' y yʌtij quejwʌtzʌjcu.