San Lucas 13 - Zoque Copainalá New Testament

Pyʌcpa wa'y quipswitu'yaju

¹ Pijche'ctij miñaju pʌnda'm y chamjayaju Jesús tiyʌ quiʌtʌcjayaju te' Galilea-pʌnda'm: Yajca'yatʌju ñe'cʌta'm Pilato's nʌ inʌc yajca'yaju'c te' copʌnda'm te' cʌna'tzʌquiu'yojmo ijtyaju'c.

² 'Yaŋdzoŋyaju Jesujsis: ¿Y ŋgomʌ'ytyambaja que más cowatzʌquita'm yʌ' Galilea-pʌnda'm quieñaju'ŋmʌjcʌ yʌ'šejta'mbʌ toya, que ja'n mumuta'mbʌ Galilea-pʌn?

³ Ʌsmij nʌjaytyamba que ja'ne. Pero mijta'm, juca ja'nmij ŋguipswitu'tame, te'šejmij tu'mbac maŋba ñdyocoytyamu mumu.

⁴ Y te' yʌt-co-tuca'ytya'mbʌ pʌn ñicu'nʌyajupʌ torre's Siloe-cumgu'yojmopʌ, y ca'pʌ'yaju, ¿ŋgomʌ'ytyambaja juca más inʌc yatzita'm que ja'n mumu Jerusale'ŋojmo ijtyajupʌ pʌn?

⁵ Ʌsmij nʌjaytyamba que ja'ne. Pero mijta'm, juca ja'nmij ŋguipswitu'tame, te'šejmij tu'mbac maŋba ñdyocoytyamu mumu.

Te' ja'n tyʌ'mapyʌ higo-cuy

⁶ Y chamu yʌ'šejpʌ comparación: Ijtu inʌc tumʌ pʌn ijtuwʌ's inʌc tumʌ higo-cuy 'yuva-nipi'ojmo, y minu mye'tzjayu te' tyʌm y japya'tja.

⁷ Y ñʌjayu te' nipi-coque'noye: Tuca'y-co-ame'amʌs minba me'tzjayu tyʌm yʌ' higo-cu'yisñe' y ja'ʌs mba'tjay. Tʌcspʌ'ʌ, ¿tiyʌcotoya' yʌy itpa?

⁸ Pijche'ca nipi-coque'noye's 'yaŋdzoŋu y nʌmu: Señor, tzacʌmaj yʌ' ame'oyj, y maŋba'ʌs ndajcu'mu y ŋgayuti'nʌyu.

⁹ Jowi'cšej tʌ'majpamaj. Juca ja'ne, pijche'camis ndʌcspʌ'pa.

Yajtzojcu tumʌ yomo Jesujsis te' sabado-jamo'oyj

¹⁰ Jesús nʌ inʌc 'yaŋma'yoyu windʌjcojmo sabado-jamo'oyj.

¹¹ Y tey inʌc ijtu tumʌ yomo yʌt-co-tuca'y ame'a yajca'epa'tupʌ yatzi-espiritu's y mucuca'ŋbatya'a inʌc y nijutz ja'na musi wyiyu'ŋajupʌ.

¹² Quienu'ctij Jesujsis, wyeju y ñʌjayu: Yomo, nyajtzocpa'ʌsmij.

¹³ Quiojtu quiʌ' ñe'cʌcʌsi y pijche'ctij wiyu'ŋaju te' yomo y myʌja'ŋwʌcotzamgʌ'yu Dios.

¹⁴ Pero qui'šca'u te' judio'sta'm wyindʌc-cowi'na porque tzo'yʌ'oyu Jesús sabado-jamo'oyj, y ñʌjayu te' wʌwʌ pʌn: Tujta'y jamatijte' pyʌcpa wa'ytyʌ nyojsu. Mindamʌ jeque pitpʌ jamo'oyjtya'm wa'mij ñcho'yʌtʌjtamu y ja'n sabado-jamo'oyj.

¹⁵ Pijche'ca 'yaŋdzoŋu tʌ Ngomi's y nʌmu: Mijta'm nwʌ'aŋjamba chʌcpata'm, ¿ja'nja mbu'pʌ'tame ne' ŋgabrestu o mburro si'numʌy wa'y yajnʌ'to'ŋdamu sabado-jamo'oyj?

¹⁶ Yʌ' yomo Abraha'ŋisyʌ' 'yune y chʌcpa'a yʌt-co-tuca'y ame yajca'epa'tu Satanajsis. ¿Ja'nja inʌc pyʌqui wa'yʌs nyajtzojcu sabado-jamo'oyj?

¹⁷ Nʌ'c chamu yʌ'šejta'mbʌ tiyʌ Jesujsis, tza'ajyaju te' ñe' qui'nisoye pero ñʌ'omyajpa inʌc mumu pʌ'nista'm te' mʌja'ŋ oyeta'mbʌ tiyʌ nʌ chʌjcupʌ Jesujsis.

Te' mostaza-tʌmbu

¹⁸ Nʌ'ma'ŋʌyu Jesús: ¿Tiyʌšejpa'nde' te' Diojsis 'yaŋgui'mʌtʌjcuy? ¿Tiyʌcʌsi'amʌs utztʌ'pa?

¹⁹ Yʌ'šejpʌte' jujcha' mostaza-tʌmbu pyʌjcupʌ te' pʌ'nis y ñijpu ñe' wye'quio'mo. Tzojcu y mʌjacu'yaju. Y te' sitityajpapʌ paloma's chʌquiaju ño'se 'yaŋmaŋgʌsita'm.

Te' levadura

²⁰ Y nʌmwʌtzʌjque'tu: ¿Tiyʌcʌsi'amʌs utztʌ'pa te' Diojsis 'yaŋgui'mʌtʌjcuy?

²¹ Yʌ'šejpʌte' jujcha' levadura pyʌjcupʌ tumʌ yomo's y myojtu tuca'y muquipʌ harina-waye'ojmo. Te'wʌ's yajpojqui'mbʌ'u.

Te' capyʌ tʌjcʌquiuy

²² Nʌ inʌc quiʌtʌjcu Jesús mumu cumgu'yojmo y ribera'ojmo. Tu'ŋojmo aŋma'yopya inʌc nʌ'c myaŋu Jerusalén.

²³ Y tuma'ŋbʌ'nis ñʌjayu: Señor, ¿uša'ŋdya'te' cotzoquiajpa? Y Jesús aŋdzoŋu:

²⁴ Tzʌcme'tztamʌ wa'mij ñdyʌjcʌytyamu te' penapittʌ tʌjcʌpyamʌy, porque ʌsmij nʌjaytyamba que wʌwʌ pʌ'nis maŋba chʌcme'chaju wa'y tyʌjcʌyaju y ja'n maŋu pya'tyaju tyʌjcʌquiuy.

²⁵ Tzu'cumba'ca te' tʌjcomi wa'y 'yaŋgʌyu te' tʌc y nʌ'camij ñchʌ'ytyamu fuera'ojmoc, pijche'ca maŋbamij ñʌmdamu puerta'ŋi: Señor, Señor, yajtʌjcʌtʌj. Y maŋbamij 'yaŋdzoŋdamu ñe'cʌ's: Ja'nʌs musi jutʌta'mbʌmijyʌ'.

²⁶ Pijche'cmij maŋba ñʌmgʌ'ytyamu: Miji'ŋdʌ cu'tu y ujcu y tʌs njojtu'ŋojmo 'yaŋma'yoyumij.

²⁷ Pero ñe'cʌ maŋba ñʌmu: Ʌsmij nʌjaytyamba que ja'nʌs musi jutʌta'mbʌmijyʌ'. Jʌcʌ'tamʌ tey, nyacha'cuy chʌcpata'm.

²⁸ Tey mij maŋba njyʌytyamu y toyapit maŋbamis ŋgʌ'ttamu ndʌtz ŋguendamba'camis Abrahán, te' Isaac, te' Jacob y mumu te' tza'maŋwa'oye tey aŋgui'mbamʌy Dios, y mijta'm fuera'ojmoc.

²⁹ Maŋba miñaju pʌnda'm chojtaŋgʌsmʌc y tyʌ'paŋgʌsmʌc y popyamʌc pacac-sawa y popyamʌc jama-sawa. Y maŋba pyocšaju mesa'ojmo tey aŋgui'mbamʌy Dios.

³⁰ Wʌwʌ te' yʌtijta'mbʌ cowi'na maŋba quiʌma'ŋajyaju. Y te' yʌtij cʌmaŋda'mbʌ maŋba quiowi'na'yaju.

Jesujsis quiojʌyu Jerusalen-itita'm

³¹ Pitpʌ hora'oyjtyij nu'quiaju metza tuca'y fariseo y ñʌjayaju Jesús: Tzu'cumʌ yʌy. Mawʌ, porque sunbamij nyajca'u te' Herodejsis.

³² Jesujsis ñʌjayaju: Ma tzamjaytyamʌ te' tzi'maña yʌ'šej: Ʌs macputpa'ʌs yatzi-espirituta'm. Yajtzojcopya'ʌj išo'oyj y jomi y tuca'y jamacʌsi maŋba'ʌs nyajtujcu nyoscuy.

³³ Pero ijtu pyena wa'yʌj nwijtu išo'oyj jomij y wʌstʌcmʌy, porque ja'ndejca' te' pyʌqui wa'y quia'u tza'maŋwa'oye Jerusale'ŋis fuera'ojmoc.

³⁴ Jerusaleŋ-bʌnda'm ñu'ŋʌytyamwa'mij wa'mis nyajca'tamu tza'maŋwa'oyeta'm. Y ndʌŋga'tambamis tza'pit Diojsismij ŋguiʌ'wejaytyambapʌ pʌnda'm. Sone naca'mʌsmij sunu nyajtu'mʌytyamu jujcha' te' cajši's yajtu'mʌpya te' 'yune ša'acʌ'mʌ, y jašundamʌmis.

³⁵ Uša'ŋ aŋsʌŋgʌsi maŋba chʌ'yiwʌ'aju mista'm ŋgumguy. Ʌsmij nʌjaytyamba que ja'namisʌj ŋguendaŋgue'temaj hasta que nu'cpa te' aŋsʌŋ ñʌmdamba'camij: Wʌcotzamda'mitʌy yʌ'wʌ yʌy nʌ minupʌ te' Diojsis ñʌquiʌsi.