San Lucas 12 - Zoque Copainalá New Testament

Aŋma'yoyu Jesús uy wyʌ'aŋjamba-chʌquiaju

¹ Y otzcomʌjcu'ca aŋba'te pʌn, cosaque'cše'ŋoyj namyaŋdochʌquiatʌjpa inʌc, Jesujsis wyinanʌmgʌ'yjayaju te' quiʌ'aŋmayeta'm: Coquendamʌ cuenta te' fariseo'sta'm lyevadura, porque te'wʌte' te' chʌquichʌquipʌ wʌ'aŋja'moquiuy.

² Porque ja'ndiyʌ yajtiyʌ nu'mdij chʌquiajupʌ, juca ja'n maŋu quieju, ni cʌwʌ'nupʌ juca ja'n maŋu myujšaju.

³ Te'cotoya tiyʌta'm mis ndzamdamu nu'mdij, maŋba myatoŋyaju jama's wyi'noyj. Y tiyʌ mis nu'mdzamdamu ŋgowya'ŋi cuarto'mo, tʌjcʌcopajcʌsi maŋba chamgopuŋyaju.

Iwʌ pyʌcpa wa'ytyʌ na'tzu

⁴ Amigota'm, ʌsmij nʌjaytyamba: Uy na'tztame yajca'jayajpapʌ's mista'm ŋgüerpo, y jʌsa'ca ja'namij yajtiyʌ musi ñchʌcjatʌjtamu.

⁵ Pero maŋba'ʌsmij ndzamjaytyamu iwʌ mis wa'y na'tztamu: Na'tztamʌ te' muspapʌ'smij ñdyʌŋdʌjcʌyu infierno'ojmo yajʌcʌ'jayu'ca mista'm ŋguenguy. Te'še'ʌsmij ndzamjaytyamba: Te'wʌ jʌ'ʌ, na'tztamʌ.

⁶ ¿Ja'nja mya'ʌyay mosa'y nama paloma majca'y centavocʌsi? Y ni tumʌc ja'n jyambʌ'i tʌ Ndata Diojsis.

⁷ Te'šejmij ŋguioquendamba ñe'cʌ's. Hasta mista'm ŋgopajcojmopʌ nway mumu mayecʌsi ijtu. Uy jeque na'tztame. Masmij nwyʌwʌcoyowata'm que ja'n soneta'mbʌ nama paloma.

Quiowʌ'aŋjamyajpapʌ's Jesús te' pʌ'nista'm wyi'naŋdʌjqui

⁸ Y ʌsmij nʌjaytyamba que mumu'iwʌ'sʌj cowʌ'aŋjamba pʌ'nista'm wyi'naŋdʌjqui, ʌs, te' Pʌ'nis 'Yune's, te'šejti'ʌs maŋba ŋgowʌ'aŋjamyajque'tu te' Diojsis 'yangelejsista'm wyi'naŋdʌjqui.

⁹ Pero iwʌ'sʌj ja'n cowʌ'aŋjame ʌj pʌ'nista'm wyi'naŋdʌjqui, te'šejtijque' ʌs ja'nʌs maŋu ŋgowʌ'aŋjamu te'wʌ Diojsis 'yangelejsis wyi'naŋdʌjqui.

¹⁰ Y iwʌ'sʌj yatzicotzamba ʌj, te' Pʌ'nis 'Yune, maŋba yajcotocoyu Diojsis. Pero iwʌ's 'yotowewʌ'ajapya Espíritu Santo, ja'n maŋu yajcotocoyu Diojsis.

¹¹ Y ñʌmawʌtʌjtamba'camij windʌjcojmo, y te' cowi'na'sta'm y mʌja'ŋ aŋgui'myajpapʌ's wyi'naŋdʌjqui, uy jene quipstame jutzmij maŋba 'yaŋdzoŋdamu, ni tiyʌ mis maŋba ndzamdamu.

¹² Porque te' pitpʌ hora'oyjtya'a te' Espíritu Santo'smij maŋba nyajmustamu tiyʌ pyʌcpa wa'mis ndzamdamu.

Te' itʌpa'tcu'yis wʌntzʌtʌ yajtocoyu

¹³ Y tumʌ te' wʌwʌpʌ pʌ'nojmocta'mbʌ's ñʌjayu: Maestro, tzamja ʌs atzi wa'yʌj nʌwe'nu tʌs ndata'stʌj tzacjayupʌ tiyʌ.

¹⁴ Pero Jesujsis ñʌjayu: Ja mbyʌn, ¿iwʌ'samʌj cojtu ʌj jujcha' cʌme'tzopyapʌ wa'yʌj nwe'nbʌ'oyu mi'ojmota'm?

¹⁵ Y ñʌjayaju: Coquendamʌ cuenta, umis aŋsundamu itʌpa'tcuy. Porque wa'y ñʌ'ijtu pʌ'nis wʌwʌ yosquejupʌ tiyʌ, ja'nde' te'wʌ te' quienguy.

¹⁶ Y chamjayajque'tu tumʌ comparación y nʌmu: Tumʌ itʌpa'tupʌ pʌ'nis ñas-juyi'ojmo jene nʌ inʌc pyucsu cosecha.

¹⁷ Y ñe'cʌ quipsoyu choco'yojmo y nʌmu: ¿Tiya'mʌs maŋba ndzʌjcu yʌtij? Ja'namʌs jutʌ ŋgote ʌs wʌwʌpʌ moc.

¹⁸ Y nʌmu: Yʌ'še'ʌs maŋba ndzʌjcu. Maŋba'ʌs mbo'pʌ'yaju ʌs ndrojata'm y maŋba'ʌs ndzʌjcu más mʌjata'mbʌ, y tey ʌs maŋba nyajtu'mʌpyʌ'u mumu ʌs ŋgosecha.

¹⁹ Y maŋba'ʌs nʌjayu ʌs ndzocoy: Tzocoy, wʌwʌ ijtu mis ndiyʌjanatiyʌ tu'mʌyupʌ sone amecotoya. Sapʌcʌ, cu'tʌ, ucʌ y pajchʌcʌ.

²⁰ Y ñʌjayu Diojsis: Njowi, yʌ' tzu' maŋba yajʌcʌ'jayaju mis ŋguenguy. Y te' nyajtu'mʌyajupʌ tiyʌmis, ¿iwʌ'sasʌ'ŋ maŋba ñe'aju?

²¹ Te'šejte' te' ñe' wyingotoya itʌpa'tpapʌ, y te' Diojsis wyi'naŋdʌjqui ja'nde' rico.

Diojsis quioquenba 'yuneta'm

²² Y ñʌjayaju Jesujsis te' quiʌ'aŋmayeta'm: Te'cotoya'ʌsmij ndzamjaytyamba: Uy jene quipstame yʌpyʌ jamacʌtʌjcuy, tiyʌmis maŋba ŋgu'ttamu, ni mista'm ŋgüerpo, jutzmis maŋba mbama'ʌytyamu.

²³ Tʌ ŋguenguy maspʌte' que ja'n tʌ ŋgu'tcuy, y tʌ ŋgüerpo maspʌte' que ja'n tʌ mbama.

²⁴ Quendamʌ te' jo'tita'm, ja'n yajtiyʌ ñipyay, ni ja'n chiquiay. Ja'ndiyʌta'm 'yʌcsicotcuy ni troja, y pyʌ'nʌyajpa Diojsis. ¿Ja'nsʌ'ŋmij más ŋguioyowa'ʌytyamu mij que ja'nde' palomata'm?

²⁵ ¿Ijtusʌ'ŋ iwʌjutiwʌ mi'ojmota'm muspapʌ's 'ya'ŋʌyu tumʌ tzumi te' ye'ŋa'cʌ' jene quipsoyu'ŋmʌjcʌ?

²⁶ Y juca ja'nmis musi ndzʌctamu te' aŋnama'ŋbʌ tiyʌ, ¿tiyajca'nde' jene ŋguipsoytyamba eyata'mbʌ tiyʌcʌsi?

²⁷ Quendamʌ te' lirio-jʌyʌ jutz tzoquiajpa. Ja'n yojšay ni ja'n jyu'tyay. Y ʌsmij nʌjaytyamba que te' lirio-jʌyʌ jene suñita'm, más suñi que ja'nde' rey Salomón tzi'nmequia'pa'c.

²⁸ Y juca te'šej suñi yajtzocpa Diojsis te' ta'nʌta'm, išo'oyj ijtyajupʌ tza'mo'mo, y jo'pit quiojtyatʌjpa jucʌtʌjcojmo, ¿ja'nsʌ'ŋmij más nwyʌcomʌ'ytyame mijta'm, wa'mij nyajmequia'tamu, ñempemij uša'ŋ nwyʌ'aŋja'moytyamba?

²⁹ Uy jene quipstame jeque, tiyʌ mis maŋba ŋgu'ttamu, o tiyʌ mis maŋba uctamu, ni uy quipstʌjwʌytyame.

³⁰ Porque yʌ'šejta'mbʌ tiyʌ mye'chajpa te' najsacopajcʌsita'mbʌ's. Pero myuspa tʌta'm Ndata's ndiyʌta'm mis ja'ndiyʌ.

³¹ Mejor me'tztamʌ wa'y 'yaŋgui'moyu Dios mista'm ndzoco'yojmo, y te'šej Diojsismij maŋba ñchi'a'ŋʌtʌjtamu mumu yʌ'šejta'mbʌ tiyʌ.

Tzajpojmopʌ itʌpa'tcuy

³² Ʌsne' uša'ŋ tu'mʌyajpapʌ ñchowambe, uy na'tztame porque mista'm Ndata's šu'noquiuy wa'mijte' ñchi'tamu aŋgui'mbamʌy Dios.

³³ Ma'ʌytyamʌ tiyʌta'm mis nʌ'ittamu y sajtzi'tamʌ te' pobreta'm. Tzʌctamʌ tzunu ja'n pyeca'epʌ y tzʌctamʌ tzajpojmopʌ itʌpa'tcuy ja'n yayepʌ. Tey tzajpojmo ja'n ñu'qui nu'mbawʌ ni ja'n myo'te ji'iji'is yajtiyʌ.

³⁴ Porque jutimʌy ijtu mista'm itʌpa'tcuy, teymʌ maŋba ijtu mista'm ndzocoy.

Nimejcʌyu'c pyʌcpa wa'ytyʌ ijtu

³⁵ Nimejcʌyu'c coquendamʌ nwin y nʌ'ittamʌ no'upʌ sʌ'ŋgʌ'.

³⁶ Y nimejcʌyu'c coquendamʌ nwin jujcha'nde' pʌnda'm nʌ jyo'quiajupʌ's quiomi maŋba wyitu'upʌ co'tʌjcajcu'yojmoc, y quiocspa'cande' puerta, jʌnʌjtij ya'aŋwajayajpa.

³⁷ Dichoso ʌ'ta'mbʌ coyosa juca tzu'quenu'c nʌ jyo'coyaju y te'šej pya'tyajpa te' quiomi's, minba'ca. Wiyuŋše'ʌsmij ndzamjaytyamba que te' quiomi's wyatwʌtzʌjcu'c wyin maŋba yajpocšatʌju mesa'ojmo y minba chi'yaju quiu'tcuy.

³⁸ Ñempe minʌ te' quiomi las nueveše'ŋoyj, o juca minba paŋguc-tzu'še'ŋoyj, juca te'šej pya'tyatʌjpa nʌ'c jyo'quiaju'c, dichosota'mbʌ coyosate'.

³⁹ Cottamʌ ŋguipsoquiu'yojmo, que juca inʌc myuspa te' tʌjcomi's tiyʌ hora minba te' nu'mbawʌ, quioquenba inʌc tyʌc y ja'n inʌc chaque wa'y ñinu'myaju.

⁴⁰ Te'šejtijque' jeque mista'm, nimejcʌyu'c coquendamʌ nwin, porque ja'nmis tiyʌ nʌ ŋguipstamu'c maŋba'ʌj minu, ʌj te' Pʌ'nis 'Yune.

Te' ñijamyajpapʌ y te' ja'n ñijamyapyʌ coyosa

⁴¹ Pijche'ca ñʌjayu Pedro's: Señor, ¿tʌjcotoyajate' nʌ ndzamu te' comparación, o mumu pʌngotoyata'm?

⁴² Y nʌmu tʌ Ngomi: ¿Iwa'sʌ'ŋde' te' ñijamyajpapʌ y nʌctʌ'yopyapʌ co'aŋgui'moye, te' quiomi's muspa quiojtupʌ te' ñe' quioyosacʌsita'm wa'y myucjayaju jyamacʌtʌjcuy nu'cpa'ca hora?

⁴³ Dichosopʌte' te' co'aŋgui'moye juca te'šej nʌ chʌjcu minba'ca te' quiomi, y te'šej pya'tpa.

⁴⁴ Wiyuŋše'ʌsmij ndzamjaytyamba que te' quiomi's maŋba quiojtu te'wʌ mumu ñe' itʌpa'tcuquiʌsi jujcha' cowi'na.

⁴⁵ Pero juca te' co'aŋgui'moye nʌmba choco'yojmo: Ʌs ŋgomi maŋbamaj ya'yu wa'y minu. Pijche'ca tzo'tzcʌ'pya wa'y tyochʌquiaju te' coyosata'm y te' coyomota'm, y maŋba quiu'tu y 'yujcu, y ño'tu.

⁴⁶ Maŋba minu te'wʌ's quiomi ja'n nʌ ñijamupʌ jamo'oyj y ja'n myusipʌ hora'oyj. Y maya'aŋ maŋba yajnʌco'aŋgʌyu te'wʌ te' quiomi's. Y maŋba tyumʌcojtu te' ja'n ñijamyatʌpyʌji'ŋ.

⁴⁷ Pero jene maŋba ñacšaju te' co'aŋgui'moye juca ñʌctʌ'yjayu ñe' quiomi's šu'noquiuy, y jaquioquena cuenta ni jachʌcʌ šunbašej.

⁴⁸ Pero te' jañʌctʌ'yʌpʌ's y chʌjcu tiyʌta'm pyʌcpawʌcʌsi wa'y quio'aŋgʌyu, uša'ŋ maŋba ñacšaju. Porque iwʌ's pyʌjcʌchoŋu wʌwʌ, te'šejtij wʌwʌ maŋba wya'cjayajque'tu. Y iwʌ ñitza'mʌchacjayaju wʌwʌ, más wʌwʌ maŋba wya'cjayajque'tu.

We'ñajpa Jesus-wʌ'aŋjamgupyit

⁴⁹ Jucʌtʌc ʌs minu ŋgojtu najsacopajcʌsi, y oye inʌc juca inʌc nʌwa' ñemu.

⁵⁰ Ijtupʌte' pyena wa'yʌs ŋguenu toya, y jene maya'pa'ʌj ndzoco'yojmo hasta que tucpa.

⁵¹ ¿Ngomʌ'ytyambaja que minu'ʌj wa'yʌs nyajsʌ'mnayaju pʌnda'm najsacopajcʌsi? Ʌsmij nʌjaytyamba que ja'ne, porque ʌjcotoya maŋba ñaqui'nišatʌju.

⁵² Porque desde yʌtij maŋba ijtyaju mosa'pyʌ pʌn tumʌpʌ tʌjcoyj, naquipotoŋyatʌjpapʌ, tuca'y ñʌquipotoŋyajpapʌ's metza, y metza ñʌquipotoŋyajpapʌ's tuca'y.

⁵³ Maŋba ñʌquipotoŋu te' tata's te' 'yune, y te' une's te' tyataj, y maŋba ñʌquipotoŋu te' nana's te' yomo-une, y te' yomo-une's te' ñanaj, y maŋba ñʌquipotoŋu te' saque's te' šaque-une, y te' saque's te' šaque-mama.

Tiyʌcʌsitʌ ispʌcpa aŋsʌŋda'm

⁵⁴ Y ñʌjayajque'tu te' pʌnda'm Jesujsis: Nguendamba'cmis o'na nʌ chu'cumu tʌ'paŋgʌsmʌc, jʌnʌjtijmij ñʌmdamba: Maŋba quiejcu tuj. Y quecpa.

⁵⁵ Y popya'c jama-sawa, ñʌmdambamij: Maŋba pyiyʌnʌmu. Y piyʌnʌmba.

⁵⁶ Nwʌ'aŋjamba chʌcpata'm, muspamis ŋgue'nʌytyamu tiyʌ nʌ quiotzamu te' tzajpis y te' najsis, ¿y tiyajca' ja'n ŋgue'nʌytyame tiyʌ nʌ tyujcu yʌ'ta'mbʌ tiempo'ojmo?

Ma tzamsujcʌ ŋgui'nispapʌ'smij

⁵⁷ ¿Y tiyajca'nde' ja'n musi ŋgopiŋdamu ne'cʌtij te' wiyuŋbʌ tiyʌ?

⁵⁸ Nʌ'cmij myaŋu wa'coquiu'yojmo te' wa'copyapʌji'ŋ, tzʌcme'tza tu'ŋojmotij wa'mis ndzamsujcʌyu ñe'cʌ uytya'mij ñʌmaŋu cʌme'tzopyawa'ŋʌ. Y te' cʌmetzopyapʌ's maŋbamij ñchi'oquia'u soldadocʌsi, y te' soldado's maŋbamij šomu.

⁵⁹ Y ndzamjapya'ʌsmij: Ja'nmij maŋu mbyujtu tey, hasta que ŋgoyojpʌ'pamis mumu mis nja'tzi.