San Lucas 11 - Zoque Copainalá New Testament

Jesujsis chamu jutztʌ wa'y oto'ŋʌyu Dios

¹ Y maŋu tumʌco luga'royj Jesús wa'y 'yoto'ŋʌyu Dios. Y 'yoto'ŋʌyaŋjeju'ca Dios, ñʌjayu tumʌ te' ñe' quiʌ'aŋmaye's: Señor, aŋmayʌtʌj wa'ytyʌs oto'ŋʌyu Dios, 'yaŋmayajušej Jua'ŋis te' ñe' quiʌ'aŋmayeta'm.

² Y ñʌjayaju: Oto'ŋʌytyamba'cmis Dios, yʌ'šej nʌmdamʌ: Tatay, tzajpojmomij ijtupʌ, Yajcʌna'tzʌyjaya mis nʌy. Minʌ aŋgui'moya. Yajtucʌ mis sunbašej, Jujcha' tzajpojmo, te'šejtijque' yʌy najsacopajcʌsi.

³ Tzi'ʌtʌj tumdumʌ jamapʌ tʌs njamacʌtʌjcuy.

⁴ Yajcotocoyja tʌs ŋgowa, Jujcha' tʌs nyajcotocoquie'tpa mumu tzʌcjapyapʌ'stʌj mal. Uytyʌj yajtʌjcʌy oc'išajpamʌytyʌj, Sino que yajcotzocatʌj yacha'cu'yojmoc.

⁵ Y ñʌjayajque'tu yʌ'šej Jesujsis: Juca mi'ojmota'm ijtu tumʌ pʌn ijtupʌ's 'yamigo y quiʌ'maŋba paŋguctzu' y ñʌjapya: Amigo, cʌyojtzi'ʌ'ʌj tuca'yʌc pan,

⁶ porque tey nu'cu tumʌ ʌsne' amigo nʌ minupʌ viaje'ojmoc y ja'ndiyʌ tiyʌpi'tʌs mbʌ'nʌpya.

⁷ Y te' jojmoc ijtupʌ's 'yaŋdzoŋba: U'yʌj molestatzʌqui. Aŋgʌwya'mʌs ndʌc, y yʌmʌ ʌŋyaju ʌs uneta'm ʌji'ŋ, ja'nʌj musi ndzu'cumu wa'yʌsmij ndzi'u.

⁸ Juca ijtu te'šejpʌ pʌn, ʌsmij nʌjaytyamba, ñempe jana sunʌ chu'cumʌ te' 'yamigocotoya, pero como tey jyaque-wa'cjapya te' 'yamigo's, maŋba quiʌtzu'cu'mʌyu wa'y chi'u jujche'ŋ nʌ wya'cupʌ.

⁹ Y ʌsmij nʌjaytyamba: Wa'ctamʌ, y ñchi'ʌtʌjtambamij. Me'tztamʌ, y mba'ttambamis. Wejwindzo'ŋoytyamʌ y 'yaŋdzowatʌjtambamij.

¹⁰ Porque iwʌ's wya'cpa tiyʌ'iwʌ, pyʌjcʌchoŋba. Y iwʌ's mye'tzpa, pya'tpa. Y iwʌ wejwindzo'ŋopya, 'yaŋdzoŋyajpa.

¹¹ Tatajta'm, ¿juca mis une's nʌ wya'cu pan, maŋbasʌ'ŋmis ndzi'tamu tza'? ¿Y juca coquej nʌ wya'cu, maŋbasʌ'ŋmis ndzi'tamu tzan y ja'n coquej?

¹² Y juca mis une's wya'cpa poca ¿maŋbasʌ'ŋmis ndzi'tamu cacwe?

¹³ Mijta'm, yatzita'mbʌ mbyʌnmijyʌ'. Y juca muspamis ndzi'tamu oyeta'mbʌ tiyʌ mista'm une, ¿cuantimastya'a tzajpojmo ijtupʌ mis Ndata Diojsis maŋbamij ñchi'tamu te' Espíritu Santo juca nwa'cjaytyambamis?

Nʌmyaju que Jesús yatziwʌ'ste' ñʌc'ijtʌyu

¹⁴ Y nʌ inʌc myacpujtu Jesujsis tumʌ yatzi-espiritu ya'uma'opyapʌ. Y pujtu'ctij te' yatzi-espiritu, tzamdzamnaquiʌ'yu te' umapʌ inʌc y ñʌmaya'yaju pʌ'nista'm.

¹⁵ Pero ijtu te' pʌ'nojmo nʌmyajupʌ: Te' yatzita'mbʌ espiritu's quiowi'na's, te' Beelzebú, yʌ'wʌ'syʌ' quiotzoŋba wa'y myacpujtu yatzita'mbʌ espíritu.

¹⁶ Y eyata'mbʌ pʌ'nis wa'y 'yoc'išajque'tu, wya'cjayaju wa'y yajqueñaju isaŋwʌ'ajcuy jujcha' señal que ñe'cʌ Diojsiste' quiʌ'wejupʌ tzajpojmoc.

¹⁷ Pero Jesujsis ñʌctʌ'yjayaju te' ñe'ta'm quipsoquiuy, y ñʌjayaju: Juca tumʌco gobierno'ojmota'mbʌ quipyajpa ñe'co'mo, tyacsniyajyajpa te' gobierno. Y juca tumʌco tʌjcoyj ijtyajupʌ quipyajpa ñe'co'mo, te'šejpʌ itcuytyʌc maŋba quio'tzu.

¹⁸ Y juca Satanajsis ñʌquijpa ñe' 'yaŋgui'mʌtʌjcuy, ja'n maŋu itjojcʌtʌjcu te' 'yaŋgui'mʌtʌjcuy. Porque nʌmij ñʌmdamu que ʌs macputpa'ʌs yatzi-espirituta'm Beelzebupit.

¹⁹ Y juca ʌs te' Beelzebupi'tʌs macputpa yatzita'mbʌ espíritu, mis ŋgʌ'aŋmaye'sta'm ¿iwʌpi'ta myacpujtyajpa yatzita'mbʌ espíritu? Te'cotoya mista'mne' ŋgʌ'aŋmaye'smij maŋba nyajmujšaju que te' nʌšejmij ñʌmdamu ja'nde' wiyuŋbʌ tiyʌ.

²⁰ Pero ʌs macputpa'ʌs yatzi-espirituta'm te Diojsis pyʌmipit. Te'cotoya yʌtij Diojsis 'yaŋgui'mʌtʌjcuy yʌy ijtu mi'ojmota'm.

²¹ Juca te' pʌmi'ʌyupʌ pʌ'nis ijtu 'yarmas y quioquenba tyʌc, myumutiyʌ sʌ'mnayu'c itpa.

²² Pero juca minba eyapʌ más pʌmi'ʌyupʌ que ja'n ñe'cʌ, tyʌŋgʌtejpa y yajʌcʌ'pʌ'japya ñe 'yarmas ñite'tzʌ'pyapʌ inʌc y wye'nbʌ'japya tyiyʌta'm yajʌcʌ'jayupʌ.

²³ Iwʌ ja'n suni wyijtu ʌji'ŋ, qui'nispapʌ'ʌjte' Y iwʌ'sʌj ja'n nʌwoctu'mʌy, yajtitpʌ'pa.

Tʌjcʌwyʌtzʌcpa te' yatzi-espiritu

²⁴ Y juca tumʌ yatzipʌ espiritu's chacpa te pʌn, maŋba wyijtu cotʌtz-luga'rojmo wa'y mye'tzu cojejcuy. Y japya'tʌ'ca nʌmba: Maŋgue'tpati'ʌj ndʌjcaŋʌ, te' pujtumʌ'yʌj.

²⁵ Y te'ya nu'cu'c, tacspejtuwʌ y cowʌtzʌjcupa'a pya'tpa te' tyʌc.

²⁶ Pijche'ca maŋba 'yaŋbʌjca'ŋʌyu cu'ya'y 'yespiritu-tʌwʌ más yatzita'mbʌ que ja'n ñe'cʌ. Y tʌjcʌyajpa wa'y ijtyaju te' pʌ'nojmo. Te' te'šejpʌ pʌ'nis jʌsa'capʌ itcuy más maŋba wyʌwa'u yacha'cuy que ja'n wina.

Te' wiyuŋšejpʌ dichoso'ajcuy

²⁷ Nʌ'c chamu Jesujsis yʌ'šejta'mbʌ tiyʌ, wejqui'mu tumʌ yomo te' wʌwʌpʌ pʌ'nojmo y ñʌjayu: Dichosa te' yomo jyu'mupʌ'smij y yajtzu'tzupʌ'smij.

²⁸ Y Jesujsis ñʌjayu: Más dichosota'm iwʌ's myatoŋjayajpa Diojsis chame y quiojamjayajpa.

Yatzitzocoytya'mbʌ's sunba quieñaju isaŋwʌ'ajcuy

²⁹ Y wʌwa'u'cande' te' pʌ'nʌputzi nʌmgʌ'yu Jesús: Yʌ' yʌtijta'mbʌ pʌn yatzita'mbʌyʌ'. Sunba quieñaju isaŋwʌ'ajcuy jujcha' señal, pero ja'ʌs maŋu nyajqueñaju isaŋwʌ'ajcuy jujcha' señal, sino que te' quiʌtʌcjayušej te' Jonás.

³⁰ Jonás, señalte' inʌc Ninive-cumgupyʌngotoyata'm, te'šej ʌj, te' Pʌ'nis 'Yune, señalti'ʌjyʌ'que' yʌtijta'mbʌ pʌngotoya.

³¹ Ijtu inʌc reina tzu'cumbamʌy jama-sawa. Desde teymʌc ya'ay tzu'cumu wa'y minu myatoŋjayu Salomo'ŋis myujsoquiuy-chame. Y te' cʌme'tzoquiuy jamo'oyj maŋba tyumʌ'aŋguejyaju yʌ' reina yʌ' yʌtijta'mbʌ pʌnji'ŋ. Maŋba wya'cu wa'y yajnʌco'aŋgʌyatʌju porque yʌtij yʌy ijtu más mujsopyawʌ que ja'nde' Salomón y ja'n wyʌ'aŋjamyay.

³² Te' Ninive-cumgu'yojmota'mbʌ pʌ'nis myatoŋyaju tiyʌ chamgopuŋu Jonajsis, y quipswitu'yaju. Y te' cʌmetzoquiuy jamo'oyj maŋba tyumʌ'aŋguejyaju yʌ' yʌtijta'mbʌ pʌnji'ŋ, y yʌ' Ninive-pʌ'nista'm maŋba wya'quiaju wa'y yajnʌco'aŋgʌyatʌju, porque yʌtij yʌy ijtu más mʌja'ŋbʌ que ja'nde' Jonás, y ja'n wyʌ'aŋjamyay.

Tʌte' ŋgüerpo's šʌ'ŋgʌ'

³³ Ya'iwʌ's ja'n quiʌwʌ'ni no'upʌ sʌ'ŋgʌ', ni ja'n ñimucsʌy tzicapit, sino que quiotpa sʌ'ŋgʌ'-cotcuquiʌsi wa'y quieñaju te' sʌ'ŋgʌ' jujche'ŋ tʌjcʌyajpapʌ's.

³⁴ Tʌta'm nwitʌm tʌte' ŋgüerpo's šʌ'ŋgʌ'. Juca mis nwitʌm sʌ'ŋba oye, ŋguenda'nbamis ñempetiyʌ. Pero juca ja'n šʌ'ŋi oye mis nwitʌm, pi'tza'ŋajcʌ'ojmošejmij itpa.

³⁵ Te'cotoya coquena cuenta uy 'yaŋbondu'yu te' mi'ojmo ijtupʌ sʌ'ŋgʌ'.

³⁶ Pero juca ŋguenbamis oye te' sʌ'ŋgʌ' y ja'n te' pi'tza'ŋajcʌ', maŋbamij ijtu te' wiyuŋšejpʌ sʌ'ŋgʌ'ojmo jujcha'nde' quiwaŋbʌ sʌ'ŋgʌ'smij šʌ'ŋjapya'c.

Yatzicotzamu Jesujsis fariseota'm y aŋgui'mguy-tyayuta'm

³⁷ Y yʌ'še'a nʌmu'c Jesús, 'yaŋbʌjcu tumʌ fariseo's wa'y maŋu quiu'tu ñe'cʌji'ŋ. Y tʌjcʌyu Jesús, pocsu te' mesa'ojmo.

³⁸ Y te' fariseo's ñʌmaya'u porque quienu que Jesujsis jache'a quiʌ' maŋba'ca quiu'tu.

³⁹ Y tʌ Ngomi's ñʌjayu: Mijta'm, fariseo, nitze'tambamis cʌsmʌc te' tzima y te' plato, pero jojmo, mista'm ndzocoy jaquiotze'a, tajsu nu'mguquipsoquiu'yis y yacha'cu'yis.

⁴⁰ Njyowita'm mij, ¿ja'nsʌ'ŋde' chʌjcupʌ's cʌsmʌcpʌ, chʌjque'tu te' jojmocpʌ, te' tzocoy?

⁴¹ Pero tzi'oquiu'yajtamʌ te' ndzocoy jujcha' limosna y pijche'ca mumutiyʌ cowaju mijcotoyata'm.

⁴² Pero ay mijta'm, fariseo, ŋgoyojaytyambamis te' yerba buena's y ruda's y mumu aŋnamaŋ nipi's myajca'yajcuy Diojsis ñʌquiʌsi. Pero ja'nmis ŋgoquendame cuenta te' justo-pʌ'najcuy ni wa'mis sundamu Dios. Yʌ'šejta'mbʌ tiyʌ pyʌcpa inʌc wa'mis ndzʌjcu pero umis inʌc njambʌ'tamu te' eyata'mbʌ.

⁴³ Ay mijta'm, fariseo, ŋgʌñʌñdyambamis wi'naŋ-bocscuytya'm judio-windʌjcojmowʌ y wa'mij myʌja'ŋdyujchi'ʌtʌjtamu plaza'ojmo.

⁴⁴ Ay mijta'm, aŋgui'mguy-tyayu y fariseo, nwʌ'aŋjamba chʌcpata'm. Ja'n quieyepʌ ca'uwʌ tza'tʌcšejta'm mij, y te'ta'mbʌcʌsi wijtyajpa te' pʌnda'm y ja'n myujšay tiyʌcʌsi nʌ wyijtyaju.

⁴⁵ Y 'yaŋdzoŋu tumʌ te' aŋgui'mguy-myujsoye's y ñʌjayu: Maestro, ndzamba'cmis yʌ'šejta'mbʌ tiyʌ, yajtitʌj nʌctza'mʌpyamistʌj.

⁴⁶ Y Jesús nʌmu: Ay mijta'm, aŋgui'mguy-myujsoye. Tzʌctamʌ cuenta que nʌmis nicu'ŋʌytyamu pʌnda'm ja'n musi ñʌmaŋyajupʌ tzʌmipit, pero ne'cʌ ni ušʌc mij ja'n suni mbyʌmitzʌctamu wa'mij ŋguiotzo'ŋoytyamu.

⁴⁷ Ay mijta'm, mbiŋwʌtzʌcjaytyambamis cha'tʌc ñipyatʌjumʌy tza'maŋwa'oyeta'm, y mis ya'acta'mbʌ ndata's yajca'yaju te' tza'maŋwa'oyeta'm.

⁴⁸ Wiyuŋšej yʌ'wʌcʌsi quejpa que nwʌmʌ'ytyambamis tiyʌta'm chʌquiajuwʌ mista'm ndata's, porque ñe'cʌ'ste' yajca'yaju tza'maŋwa'oyeta'm, y mista'm mbiŋwʌtzʌcjaytyambamis ñe'ta'm cha'tʌc.

⁴⁹ Te'cotoya yʌ'šej nʌmgue'tu te' mujsopyapʌ Dios: Maŋba'ʌs ŋgʌ'wejayaju tza'maŋwa'oye y cʌ'wejta'm, y wene maŋba yajca'yaju y wene maŋba yacsnutzʌquiatʌju.

⁵⁰ Hasta yʌ' yʌtijta'mbʌ pʌn maŋba ñi'aŋba'tyatʌju jujche'ŋ tza'maŋwa'oye yajca'yatʌjupʌpit desde que tujcu yʌ' najsacopac,

⁵¹ te' yajca'yaju'c te' Abel hasta que yajca'yaju te' Zacarías te' Diojsis tyemplo'ojmo alta'raŋi. Yʌ'še'ʌsmij ndzamjaytyamba que te'wʌcotoya Diojsis maŋba ñi'aŋba'tyatʌju hasta yʌtijta'mbʌ pʌn.

⁵² Ay mijta'm, aŋgui'mgu'yis myujsoye, nya'aŋga'mdamumis tuŋ uy tyʌjcʌyaju pʌnda'm wa'y 'yaŋmayaju. Ni mijta'm, jañdyʌjcʌytyamʌmij, y te' nʌ inʌc sunu tyʌjcʌyajupʌ nyajwinductamumis.

⁵³ Y yʌ'šejta'mbʌ tiyʌ'a chamjayaju'c Jesujsis, ñitzʌquiaju te' aŋgui'mguy-tyayu'sta'm y te' fariseo'sta'm wa'y tyacscʌ'aŋwa'quiaju y wa'y 'yaŋje'ñaju wa'y más tiyʌta'm chamu.

⁵⁴ Porque yatzi tzoco'yajcupyit nʌ inʌc jyo'quiaju y ñʌcpʌmi'ʌyajpa inʌc wa'y más tiyʌta'm chamu y te'šej wa'y ñicotza'mʌyaju.