San Lucas 10 - Zoque Copainalá New Testament

Jesujsis quiʌ'weju tuqui's-co-mac pʌn

¹ Y cʌtʌquiaju'ca yʌ'šejta'mbʌ tiyʌ, tuqui's-co-mac quiopiŋbujtu eyata'mbʌ quiʌ'aŋmaye tʌ Ngomi's. Y quiʌ'wejyaju te'ta'mbʌ metza metza wa'y wyi'najayaju ñe'cʌ. Quiʌ'wejyaju mumuta'mbʌ luga'rojmo y cumgu'yojmo maŋgue'tpamʌy inʌc ñe'cʌ.

² Y ñʌjayajpa inʌc: Wiyuŋšej jene wʌwʌ te' cosecha, y uša'ŋ te' yojšajpapʌ. Te'cotoya wa'ctamʌ te' cosecha-comicʌsi wa'y quiʌ'weju yojšajpapʌ ñe' quiosechacotoya. (Pʌ'nʌste' nʌ ndzamyaju.)

³ Maŋdamʌ. Coquendamʌ cuenta, nʌ'ʌsmij ŋgʌ'wejtamu jujcha' ñchowambe wʌwʌta'mbʌ lobocucmʌ.

⁴ Uy nʌmaŋdame tzunu, ni nuti, ni cʌ'ac, ni uy dyujchi'tame ya'iwʌ tu'ŋojmo.

⁵ Y jutipʌ tʌjcojmomij ñdyʌjcʌytyamba, winac nʌmdamʌ: Sunba'ʌs wa'y Diojsismij ñchi'tamu sʌ'mnaquiuy yʌ' tʌjcoyj.

⁶ Y juca ijtu tey tumʌ pʌn šunbapʌ's sʌ'mnaquiuy, Diojsis maŋba chi'u sʌ'mnaquiuy mijpitta'm. Y juca ja'n šuni, Diojsis ja'n maŋu chi'u sʌ'mnaquiuy.

⁷ Y tepyʌ tʌjcoyj cojejtamʌ. Cu'ttamʌ y uctamʌ tiyʌtijmij ñchi'ʌtʌjtamʌ, porque te' nʌ yojsupʌ pʌ'nis myerecetzʌcpa wa'y quioyojyaju. Uy tʌjcaŋgomaytyame.

⁸ Y jutʌpʌ cumgu'yojmomij ñdyʌjcʌytyamba y mbyʌjcʌchowatʌjtambamij, cu'ttamʌ tiyʌtijmij ñchi'ʌtʌjtamʌ.

⁹ Yajtzoctamʌ ca'eta'mbʌ te' cumgu'yojmo ijtyajupʌ, y nʌjaytyamʌ te' pʌnda'm: Tijtʌ'u Dios wa'y 'yaŋgui'moyu mi'ojmota'm, jašundamʌmis.

¹⁰ Pero jutipʌ cumgu'yojmomij ñdyʌjcʌytyamba, y ja'nmij mbyʌjcʌchowatʌjtame, jojtu'ŋojmo nʌmdamʌ:

¹¹ Yʌ' cumgupyo'yo tzʌ'yupʌ tʌs ne'ŋbajcʌsi, ŋgopujpatʌs mi'ojmota'm. Pero mustamʌ que tijtʌ'u Dios wa'y 'yaŋgui'moyu mi'ojmota'm, jašundamʌmis.

¹² Y ʌsmijte' nʌ ndzamjaytyamu que más maŋba tyo'ya'ŋʌyatʌju te' Sodoma-cumgu'yojmota'mbʌ ʌ'ta'mbʌ jamo'oyj que ja'nde' tepyʌ cumgu'yojmota'mbʌ.

Cumguytya'm ja'n myato'ŋoyapyʌ

¹³ Ay mij, Corazin-itita'm. Ay mij, Betsaida-itita'm. Maŋbamis ŋguendamu toya porque soneta'mbʌ isaŋwʌ'ajcuy mis ŋguendamu mista'm ŋgumgu'yojmo, y jaŋguipswitu'tamʌmij. Juca inʌc quieñaju Tiro-iti'sta'm y Sidon-iti'sta'm mis ŋguendamupʌ isaŋwʌ'ajcuy, ñe'cʌta'm ya'ajca inʌc quipswitu'yaju. Yamyajwa' inʌc costal-pama y pocšajwa' inʌc cuyja'mojmo, wa'y yajquejayaju que nʌte' inʌc quipswitu'yaju.

¹⁴ Te'cotoya, más maŋba tyo'ya'ŋʌyatʌju te' Tiro-itita'm y te' Sidon-itita'm que ja'n mijta'm te' cʌme'tzoquiuy jamo'oyj.

¹⁵ Y mij, Capernaum-itita'm, ¿sunbaja ŋgʌpa'ttamu tzap? Hasta infierno'ojmomij maŋba nyajwanacʌtʌjtamu.

¹⁶ Iwʌ'smij ŋguiʌmato'ŋʌytyamba mij, ʌs ŋgʌ'aŋmayeta'm, ʌjte' nʌ cʌmato'ŋʌyu. Y iwʌ'smij ja'n mbyʌjcʌchoŋdame, ʌjte' ja'n pʌjcʌchowe, y iwʌ'sʌj ja'n pʌjcʌchowe, ja'n pyʌjcʌchowe te' cʌ'wejupʌ'sʌj.

Witu'yaju te' tuqui's-co-macta'mbʌ

¹⁷ Y oma'oma witu'yaju te' tuqui's-co-macta'mbʌ pʌn y nʌmyaju: Señor, hasta te' yatzi-espiritu'sta'm mato'ŋoyjayajpatʌj mis nʌquiʌsi.

¹⁸ Y Jesujsis ñʌjayaju: Ʌs ŋguenu'ʌs Satanás, jujcha' ne'mgʌ' nʌ quiunu'c tzajpojmoc.

¹⁹ Yʌtij ndzi'tamu'ʌsmij aŋgui'mʌtʌjcuy jujche'ŋ qui'nisoye's pyʌmicʌsi y wa'mis maŋdochʌctamu ndzumba y cacwejta'm. Y yajtiyʌ'smij ja'n ñchʌcjaytyame toya.

²⁰ Myato'ŋoyjaytyamba'ŋmʌjcʌmij espiritu'sta'm uy nʌ'omdame te'wʌ, sino que nʌ'omdamʌ que ja'yʌyu mista'm nʌy tzajpojmo.

Jesujsis omapit wyʌcotzamu Tyataj

²¹ Pijche'ctij te' Espíritu Santopit ñʌ'omu Jesujsis y nʌmu: Tatay, tzajpis y najsacopajquis quiomi, nwʌcotzamba'ʌsmij porque ŋgʌwʌ'numis yʌ'šejta'mbʌ tiyʌ wa'y jana ñʌctʌ'yaju te' mujsoye's y nʌctʌ'yoye's, y nyajnʌctʌ'yajumis te' ja'n myujsoyapyʌ. Te'šej jeque oye, Tatay, porque te'šejmis nwʌcomʌ'yu wa'mis ndzʌjcu.

²² Ʌs ŋgʌ'ojmo quiojtu ʌs Ndata's mumutiyʌ. Ya'iwʌ'sʌj ja'n ispʌqui ʌj, te' Diojsis 'Yune, juca ja'n ʌs Ndata's. Ni ʌs Ndataj ja'n ispʌcjay ya'iwʌ's juca ja'n ʌs, te' 'Yune's, y iwʌta'm te' 'Yune's sunba ya'ispʌquiaju. Te'ta'mbʌ maŋba ya'ispʌquiaju.

²³ Y tze'ŋwitu'u ijtyajumʌy te' quiʌ'aŋmaye y ñʌnu'mdzamyatʌju: Dichosota'mbʌte' te' quieñajpapʌ's wyitʌmbit te' mis nʌ ŋguendamupʌ tiyʌ.

²⁴ Porque ʌsmij nʌjaytyamba que sone ya'acta'mbʌ tza'maŋwa'oye's y re'yista'm sunjo'yu quieñajtʌ'ʌ mis nʌ ŋguendamupʌ tiyʌ, pero jaquieña. Y sunjo'yu myatoŋyajtʌ'ʌ mis nʌ matoŋdamupʌ tiyʌ, pero jamyatoŋya.

Te' oyepʌ Samaria-pʌn

²⁵ Y ijtu inʌc tey tumʌ aŋgui'mguy-myujsoye, y tenaqui'mu wa'y chʌjquisu te' Jesús y ñʌjayu: Maestro, ¿tiya'sʌ'ŋ oye wa'yʌs ndzʌjcu wa'yʌs mba'tu ja'n yayepʌ quenguy?

²⁶ Y Cristo's ñʌjayu: ¿Tiya' ja'yʌyu te' aŋgui'mgu'yojmo? ¿Jutza ndu'nba?

²⁷ Y ñe'cʌ aŋdzoŋu y nʌmu: Sunʌ mis Ngomi Dios ndumʌtzocoy, y ndumʌ sis y ndumʌ nʌ'pin, y mumu mis mbʌmipit, y mumu mis nʌctʌ'yoquiupyit. Y sunʌ mis ndʌwʌ jujcha' mis sunba ne' nwin.

²⁸ Y Jesujsis ñʌjayu: 'Yaŋdzoŋumij oye. Tzʌcʌ te'šej y mba'tpamis te' iscuy-quenguy.

²⁹ Pero ñe'cʌ's, como sunba inʌc 'yoyecocojtu wyin, ñʌjayu te' Jesús: ¿Iwa'sʌ'ŋde' ʌs ndʌwʌ?

³⁰ Y aŋdzoŋu Jesús y nʌmu: Tzu'cumu tuma'ŋbʌn Jerusale'ŋojmoc wa'y wyanajcu Jerico-cumgu'yojmo y ñuquiaju nu'mbawʌ's. Yʌ'ta'mbʌ's tyacsninu'myaju y pyu'ŋjetjetwʌyaju, y maŋyaju. Ca'uwʌšej chaquiaju.

³¹ Y pijche'c wanajcu tumʌ sacerdote te' tu'ŋojmo, y quienu'ca, tu'maŋ quiʌcʌtʌjcu.

³² Y te'šejtijque' wanajcu tumʌ levita-pʌn, y tyo'mʌyu ijtumʌy te' pʌn. Y quienu'ctij, emʌc cʌtʌjque'tu.

³³ Pero wanajcu tumʌ Samaria-pʌn tey, y tomya' nʌ minu'c, quiengopa'tʌyu y tyo'ya'ŋʌyu.

³⁴ Y ca'ŋnu'cu y quiotjayu aceite y vino te' jyete, pijche'ca myonjayu. Quiojtu quiopʌngʌsi y ñʌmaŋu cojejcu'yojmo y teymʌ maŋu quioquenu.

³⁵ Y jo'pit nʌ'ca chu'cumu'c, ñʌpujtu metza denario-tumin y chi'u te' cojejcuquiomi y ñʌjayu: Te'ya quenja, y juca ŋgastatzʌcpamis más, maŋba'ʌsmij ŋgoyoju witu'u'camʌj.

³⁶ Yʌ' tuca'pyʌ pʌ'nojmoc ¿jutiwʌ'sa ŋguipspa que tyʌwʌšej quiomʌ'yu te' ñuquiajupʌ nu'mbawʌ's?

³⁷ Y te' aŋgui'mguy-myujsoye nʌmu: Te' tyo'ya'ŋʌyupʌ's. Pijche'ca Jesujsis ñʌjayu: Mawʌ, y te'šej tzʌjque'ta mis.

Jesujsis tiju tyu'nišaju Marta y te' María

³⁸ Y yʌ'šej tujcu: Maŋu Jesús y tʌjcʌyu cumgu'yojmo, y nu'cu Marta'upʌ yomo's tyʌjcaŋʌ y tey pyʌjcʌchoŋu te'wʌ's.

³⁹ Y yʌ'wʌ's ijtu inʌc tumʌ pyotzo, ñʌjayajpapʌ María, y te'wʌ minu pyocsu Jesujsis ñe'ŋbajcaŋi wa'y quiʌmato'ŋʌyjayu ñe' chame.

⁴⁰ Pero chʌcjopi'tpa inʌc Marta yoscu'yis. Y quiʌ'minu Jesús y nʌmu: Señor, ¿ja'nja nʌ ŋgoquenu cuenta que ʌs mbotzo's naytyumʌ'ʌj tzacpa wa'yʌj nyojsu? Tzamja jeque wa'yʌj cotzoŋu.

⁴¹ Pero 'yaŋdzoŋu Jesujsis: Marta, Marta, na' yoscuy mis ŋguipspa, y soneta'mbʌ tiyʌ'smij nyajopi'tpa.

⁴² Pero tumʌtij ijtu te' más oyepʌ tiyʌ, y te'wʌ quiopiŋu Maria's y ja'n maŋu yajʌcʌ'jayaju.