San Juan 9 - Zoque Copainalá New Testament

Yajtzojcu Jesujsis to'titya'a pʌ'najupʌ pʌn

¹ Y nʌ'c myaŋu Jesús quienu tumʌ pʌn to'titya' pʌ'najupʌ.

² Y tʌs, te' quiʌ'aŋmaye's ŋgʌ'aŋwa'cutʌs: ¿Maestro, iwa'sʌ'ŋ cowapa'tu yʌ'wʌ o tyatajta'm wa'y to'tipʌytya' pyʌ'naju?

³ Aŋdzoŋu Jesús: Ja'nde' juca cowapa'tu yʌ'wʌ, ni tyatajta'm, sino que wa'ytye' quieju Diojsis isaŋwʌ'ajcuy ñe'cʌcʌsi.

⁴ Nʌ'cše'ŋo'yʌj tzi'yaju lugar wa'yʌj nyojsu pyʌcpa wa'yʌs ndzʌcjayu Diojsis yoscuy, porque ñe'cʌ'sʌj cʌ'weju. Porque maŋba minu te' aŋsʌŋ ja'nandʌ maŋu tzi'yaju lugar wa'ytyʌ nyostamu.

⁵ Yʌ'yʌj ijtu'cše'ŋoyj najsacopajcʌsi ʌste' sʌ'ŋgʌtzʌcjayajpa najsacopajcʌsita'mbʌ pʌ'nis chocoy.

⁶ Yʌ'še'a nʌmu'c, tzuju nascʌsi y chʌjcu mote chuwinbit. Y te' motepit jyasjayu te' to'tipʌ's wyitʌm.

⁷ Y ñʌjayu: Ma cotze'a Siloe-tanque'ojmo (y te' Siloé sunbate' ñʌmu: Cʌ'wej). Pijche'ca maŋu y quioche'u, y quenba'ca witu'u.

⁸ Y te' tome ijtyajupʌ's y te' ispʌquiajpapʌ's desde une'cmaj que to'tipʌte' inʌc, nʌmgʌ'yaju: ¿Ja'nja jequete' yʌ'wʌ te' yʌy pocspapʌ inʌc wa'y wya'cu?

⁹ Wene pʌn nʌmyajpa inʌc: Yʌ'wʌte'. Y eyata'mbʌ nʌmyaju: Ñe'cʌšej quenba. Pero ñe'cʌ nʌmu: Pijtʌjyʌ'.

¹⁰ Te'cotoya quiʌ'aŋwa'quiaju: ¿Jutza' jeque yʌtij sʌ'ŋba mis nwitʌm?

¹¹ Aŋdzoŋu ñe'cʌ y nʌmu: Te' pʌn ñʌjayajpapʌ Jesús, te'wʌ's chʌjcu mote y jyasjayu ʌs nwitʌm y nʌjayu'ʌj: Mawʌ Siloe-tanque'ojmo y tze'a. Tiju'ʌs ndze'u, y yʌtij quenba'mʌj.

¹² Pijche'ca ñʌjayaju: ¿Juta' ijtu te' ñcho'yʌyupʌ'smij? Y ñe'cʌ nʌmu: Ja'ʌs musi.

Fariseo'sta'm 'yaŋwa'cpʌquiaju te' to'tiwʌ inʌc

¹³ Y ñʌmaŋyaju fariseo'sta'm wyi'naŋdʌjqui te' to'tipʌ inʌc.

¹⁴ Y sabado-jamate' inʌc chʌjcu'c Jesujsis te' mote wa'y yajsʌ'ŋjayu te' wyitʌm.

¹⁵ Y te' fariseo'sta'm quiʌ'aŋwa'quiajque'tutij jutzte' yajsʌ'ŋjayu te' wyitʌm. Y te' to'tipʌ inʌc aŋdzoŋu: Cotjayu'ʌj mote nwitʌmgʌsi. Ndze'u'ʌs, y yʌtij quenba'mʌj.

¹⁶ Pijche'ca metza tuca'y te' fariseo nʌmyajpa inʌc: Te' cho'yʌyupʌ's ja'nde' Diojsis quiʌ'weju porque ja'n quiojame sábado. Eyata'mbʌ nʌmyajpa inʌc: ¿Jutza' jeque muspa chʌjcu yʌ'šejta'mbʌ isaŋwʌ'ajcuy cowatzʌquipʌ pʌ'nis? Y quipotoŋgʌ'yaju ñe'co'mo.

¹⁷ Y quiʌ'aŋwa'cwʌtzʌquiaju te' to'tipʌ inʌc: ¿Mis, tiya' ndzamba, iwa'sʌ'ŋde' yajsʌ'ŋjayupʌ's mis nwitʌm? Y ñe'cʌ nʌmu: Tza'maŋwa'opyapʌte'.

¹⁸ Pero jawyʌ'aŋjamya te' judio'sta'm juca ñe'cʌte' te' to'tipʌ inʌc, y tzocwa'a wyitʌm. Pijche'ca wyejayaju tyatajta'm te' to'tipʌ'sñe'.

¹⁹ Aŋguejyaju, y quiʌ'aŋwa'quiatʌju: ¿Yʌ'wʌjate' te' mista'm une? ¿Yʌ'wʌjate' te' ñʌmdambapʌmij to'tipʌytya'a pʌ'najupʌ? ¿Jutza jequeyʌ' yʌtij quenba'a?

²⁰ 'Yaŋdzoŋyaju te' tata'sta'm: Muspatʌs que yʌ'wʌ tʌsyʌ' une y to'tipʌytya'a pʌ'naju.

²¹ Pero ja'ndʌs musi jutzyʌ' yʌtij sʌ'ŋba'a wyitʌm. Y ja'ndʌs musi iwʌ's yajsʌ'ŋjayu. Tzamupa'ʌ', cʌ'aŋwa'ctamʌ ñe'cʌ. Ñe'cʌ's yajtzamʌ.

²² Yʌ'šej nʌmyaju te' tyatajta'm porque ña'chajpa inʌc te' judiota'm porque nʌmyaju'ctya'nde' que iwʌ nʌmba que Jesuste' te' Mesías, maŋba myacpujtyaju te' ñe'ta'm wyindʌjcojmoc.

²³ Te'wʌcotoya nʌmyaju te' tyatajta'm: Tzamupa'ʌ', cʌ'aŋwa'ctamʌ ñe'cʌ.

²⁴ Pijche'ca wyejwʌtzʌquiaju te' pʌn to'tipʌ inʌc y ñʌjayaju: Wʌcotzamʌ Dios y ja'n te'wʌ, porque tʌs muspatʌs que te'wʌ cowatzʌquipʌ pʌnde'.

²⁵ Pijche'ca ñe'cʌ's 'yaŋdzoŋyaju: Tey ja'na'mʌs musque'te juca cowatzʌquite'. Tiyʌ'ʌs yʌtij muspa que to'ti inʌjcʌj, y yʌtij quenba'mʌj.

²⁶ Y ñʌmwʌtzʌcjayajque'tu: ¿Tiyʌpi'ta ñcho'yʌyu? ¿Jutza'nde' nyajsʌ'ŋjayu mis nwitʌm?

²⁷ 'Yaŋdzoŋyajque'tu: Ndzamjaytyamwa'mʌsmij y ja'nmis ŋgoquendame cuenta. ¿Tiyajca'nde' sunba matoŋwʌtzʌctaŋgue'tutij? ¿Sunbasʌ'ŋ mij ŋguiʌ'aŋmaye'ajtaŋgue'tu?

²⁸ Y quioraje-otoŋjayaju y nʌmyaju: Mij, ñe'mijyʌ' quiʌ'aŋmaye, pero tʌj, Moisejsistʌjyʌ' quiʌ'aŋmaye.

²⁹ Muspatʌs que Moisés 'yoto'ŋʌyu Diojsis, pero ʌ'wʌ ja'ndʌs musi jutʌpʌ'ʌ'.

³⁰ Aŋdzoŋu te' pʌn, y ñʌjayaju: Wiyuŋšej maya'cupyʌ tiyʌyʌ' yʌ'wʌ. Mista'm ja'nmis mustame jutʌpʌ'ʌ', y yajsʌ'ŋjayu ʌs nwitʌm.

³¹ Mustambatʌ que Diojsis ja'n quiʌmato'ŋʌy cowatzʌquita'mbʌ. Pero juca iwʌjutiwʌ's quiʌna'tzpa Dios, y chʌcpa ñe'cʌ's šunbašej, yʌ'wʌ quiʌmato'ŋʌpya Diojsis.

³² Yajujche'cmajtʌ jamyatoŋdʌ'ʌ juca iwʌ's yajtzoctʌ'wa'a to'titya' pʌ'najupʌ pʌn.

³³ Juca inʌc ja'n Diojsis quiʌ'weju, ja'n inʌc musi chʌjcu yʌ'šejta'mbʌ tiyʌ.

³⁴ Ñʌjayajque'tu fariseo'sta'm te' to'tipʌ inʌc: Saŋgowatzʌquimijyʌ' mbyʌ'naju, ¿y sunbajatʌj aŋmayu mis? Y myacpujtyaju te' ñe'ta'm wyindʌjcojmoc.

Ja'n ñʌctʌ'yapyʌ's wiyuŋbʌ tiyʌ

³⁵ Myujsu Jesujsis que myacpujtyajwa'a, y pya'tque'tu'ca ñʌjayu: ¿Nwʌ'aŋjambaja te' Diojsis 'Yune?

³⁶ Aŋdzoŋu te' to'tipʌ inʌc: Señor, tzamja'ʌj iwʌte' te' Diojsis 'Yune wa'yʌs nwʌ'aŋjamu.

³⁷ Y Jesujsis ñʌjayu: Nguenwa'mis. Pijtʌjyʌ', yʌ'yʌj nʌ ndzamdzamnayu miji'ŋ.

³⁸ Y ñe'cʌ nʌmu: Señor, nwʌ'aŋjamba'ʌsmij. Y cutcʌne'cu wyi'naŋdʌjqui.

³⁹ Y nʌmu Jesús: Minu'ʌj yʌ' najsacopajcʌsi wa'y Diojsis quiʌme'chaju pʌnda'm, wa'y iwʌ'sta'mis ja'ndiyʌ quipsoquiu'yis šʌ'ŋgʌ' wa'yʌs nyajsʌ'ŋjayaju quipsoquiuy, y te' nʌmyajpapʌ's que sʌ'ŋyajpa wyitʌm wa'y jana ispʌquiaju te' wiyuŋbʌ tiyʌ.

⁴⁰ Tey inʌc ijtyaju fariseo ñe'cʌji'ŋ y myatoŋyaju yʌ'šej, y ñʌjayaju: ¿Te'šejtijsʌ'ŋ ja'n šʌ'ŋgue'te tʌs nwitʌm?

⁴¹ Ñʌjayaju Jesujsis: Juca inʌc ja'ndiyʌ mista'm ŋguipsoquiu'yis šʌ'ŋgʌ' ja'ndiyʌta'm inʌc mis ŋgowa. Pero yʌtij como ñʌmdambamij que sʌ'ŋba mista'm ŋguipsoquiuy ittamu mis ŋgowa.