San Juan 7 - Zoque Copainalá New Testament

Jesujsis pyotzo'sta'm ja'n inʌc wyʌ'aŋjamyay

¹ Cʌtʌjcu'ca yʌ'šejta'mbʌ tiyʌ maŋu ñʌcwijtʌyu Jesujsis Galilea-nas. Ja'n inʌc suni wyijtu Judea-najsojmo porque chʌcme'chajpa inʌc jutz wa'y yajca'yaju te' judio'sta'm.

² Y nʌte' inʌc tyo'mʌyu judio'sta'm quiu'tcuy-šʌŋ tijpa'c inʌc ijtyaju pechtʌjcojmo te' judiota'm.

³ Ñʌjayaju pyotzo'sta'm te' Jesús: Tzu'cumʌ yʌy, y mawʌ Judea'ojmo wa'y quieñajque'tu mis ŋgʌ'aŋmaye'sta'm teymʌ tiyʌta'mbʌ tzʌqui mis ndzʌcpa.

⁴ Iwʌ's šunba wa'y ispʌquiaju ja'n ñu'mdzʌqui yajtiyʌ. Juca yʌ'šejta'mbʌ tiyʌ mis ndzʌcpa, yajqueya nwin iwʌmijte' najsacopajcʌsita'mbʌ's wyi'naŋdʌjqui.

⁵ Porque ni te' pyotzo'sta'm ja'n inʌc wyʌ'aŋjamyay iwʌte'.

⁶ Pijche'ca ñʌjayaju Jesujsis: Jañu'cʌmaj te' aŋsʌŋ wa'yʌs nyajqueju ʌs nwin iwʌ'ʌjyʌ'. Pero mista'm aŋsʌŋ tepyʌtijte' tiyʌ mis sunba ndzʌctamu.

⁷ Mijta'm, ja'nmij ŋgui'nisʌtʌjtame najsacopajcʌsita'mbʌ's. Pero ʌj qui'nišajpa'ʌj porque ŋgotzamjayajpa'ʌs te' yatzita'mbʌ chʌqui.

⁸ Maŋdamʌ mijta'm te' sʌ'ŋajcu'yojmo, pero ʌj ja'nma'ʌj mawe yʌ' sʌ'ŋoyj porque jañu'cʌmaj te' aŋsʌŋ wa'yʌj maŋu.

⁹ Y yʌ'še'a ñʌjayaju'c, tzʌ'yu Galilea'ojmo.

Jesús te' pechtʌc sʌ'ŋajcu'yojmo

¹⁰ Pero maŋyaju'cande' pyotzota'm, pijche'cmaj maŋu ñe'cʌ te' sʌ'ŋajcu'yojmo. Jamyawʌ quejuqueju'c wʌwʌ pʌ'nojmo, sino que maŋu iwʌjana'iwʌšej.

¹¹ Y te' sʌ'ŋoyj quiʌ'aŋwa'cme'chajpa inʌc Jesús te' judio'sta'm y nʌmyajpa inʌc: ¿Y te'wʌ, juta'sʌ'ŋ ijtu?

¹² Y cʌ'ŋʌ'pa inʌc chamyajpa ñe'cʌ wʌwʌ pʌ'nis. Wene pʌn inʌc nʌmyajpa: Oyepʌ pʌnde'. Y wene pʌn nʌmyajpa inʌc: Ja'ne, aŋgoma'cʌ'opyapʌte'.

¹³ Pero ya'iwʌ's inʌc ja'n quiotzame ñe'cʌ quejuqueju'c, porque ña'tzjayajpa inʌc judio'sta'm quiowi'na.

¹⁴ Pero sʌ'ŋʌcujcoyj tʌjcʌyu Jesús te' judio-templo'ojmo y aŋma'yoquiʌ'yu.

¹⁵ Ñʌmaya'yajpa inʌc judio'sta'm y nʌmyaju: ¿Jutza myuspa yʌ'wʌ's te' Totojaye juca jatyiyʌ 'yaŋmayʌ?

¹⁶ 'Yaŋdzoŋyaju Jesujsis: Ʌsmij aŋmaytyambapʌ tiyʌ, ja'nde' ʌsne' aŋma'yoquiuy, sino que ijtu iwʌ'sʌj cʌ'weju. Ñe' 'yaŋma'yoquiupyit nʌ'ʌsmij aŋmaytyamu.

¹⁷ Iwʌ's sunba chʌjcu šunbašej Diojsis, maŋba ñʌctʌ'yjayu ʌs aŋma'yoquiuy juca Diojsiste'ñe' o juca ʌste'ne' ŋgo'quips ndzamba.

¹⁸ Iwʌ's ñe' quio'quips chamba, mye'tzpa wa'y yajmʌja'ŋaju ñe' wyin. Pero iwʌ's mye'tzpa wa'y yajmʌja'ŋaju te' quiʌ'wejupʌ's, te'wʌte' wiyuŋdzambapʌ pʌn. Te'šejpʌ pʌn ja'n 'yaŋgoma'cʌ'oy.

¹⁹ ¿Jañchi'tamʌja Moisejsis te' aŋgui'mguy? y mi'ojmota'm ya'iwʌ's ja'n quiojame te' aŋgui'mguy. ¿Tiyajca'nde' ndzʌcme'tztamba wa'misʌj nyajca'tamu?

²⁰ Aŋdzoŋyaju te' pʌnda'm: Yatzipʌ espiritu's mijte' ñʌc'ijtʌyu. ¿Iwʌ'sa nʌ chʌcme'tzu wa'mij nyajca'u?

²¹ 'Yaŋdzoŋyaju Jesujsis: Porque ndzʌjcu'ʌs tumʌ isaŋwʌ'ajcuy sabado-jamo'oyj, te'cotoyamij myaya'tamba.

²² Wiyuŋšej 'yaŋgui'mdamumij Moisejsis wa'mij šircuncidatzʌctamu, (ja'nde' juca Moisejsis 'yaŋgui'mguy, sino que tʌte' nwinatata'sta'mde'ñe') y circuncidatzʌctambamis pʌnda'm sabado-jamo'oyj.

²³ Uy myaŋgocʌtʌcjayaju'ŋmʌjcʌ te' Moisejsis 'yaŋgui'mguy circuncidatzʌquiajpa inʌc sabado'oyj, juca pijche'c nu'cpa te' jama. ¿Tiyajca' ʌj ŋgui'šca'jaytyamba porque nyajtzojcoctujcu'ʌs ca'ewʌ pʌn sabado-jamo'oyj?

²⁴ Uy cʌme'tzoytyame comeque'ctij mista'm ne' ŋgo'quipspit, pero cʌme'tzoytyamʌ justopʌ cʌme'tzʌ'oquiupyit.

Jesujsis chamu iwʌ'ste' quiʌ'weju

²⁵ Pijche'c ijtyaju inʌc Jerusale'ŋojmo nʌmyajpapʌ: ¿Ja'nja jequete' yʌ'wʌ nʌ mye'chaju cowi'na'sta'm wa'y yajca'yaju?

²⁶ Yʌtij quejuqueju'c yʌy tzamdzamnapya, y yajtiyʌ ja'n chamjayay cowi'na'sta'm. ¿Wiyuŋšej ñʌctʌ'yajwa'sʌ'ŋ que yʌ'wʌte' te' Cristo?

²⁷ Tʌs, muspatʌs jutʌpʌ cumgu'yojmopʌyʌ' yʌ'wʌ. Y minba'cande' te' Cristo ya'iwʌ's ja'n maŋu myujsu jutʌpʌte'.

²⁸ Nʌ inʌc 'yaŋma'yoyu Jesús te' judio-templo'ojmo. Pijche'c weju'c nʌmu: Ispʌctambamisʌj y mustambamis jutʌpʌ'ʌjyʌ', pero te' wiyuŋšejpʌ Diojsisʌjte' cʌ'weju, y ñe'cʌ ja'nmis ispʌctame mista'm.

²⁹ Ʌs ispʌcpa'ʌs, porque tzu'cumu'ʌj ñe'cʌ ijtumʌy, y ñe'cʌ'sʌjyʌ' cʌ'weju.

³⁰ Pijche'ctij chʌcme'chaju cowi'na'sta'm wa'y ñuquiaju. Pero ya'iwʌ's jañipi'cʌ porque jañu'cʌ'cmajte' hora wa'y quia'u.

³¹ Y wyʌ'aŋjamyaju ñe'cʌ wʌwʌ pʌ'nista'm y nʌmyajpa inʌc: Minba'ca te' Cristo, ¿maŋbasʌ'ŋ chʌjcu más isaŋwʌ'ajcuy que ja'n yʌ'wʌ's?

Fariseo'sta'm yajnucʌtʌjyaju Jesús

³² Myatoŋyaju fariseo'sta'm que yʌ'šej inʌc nʌ ñu'mdzamyaju te' pʌ'nista'm. Te'cotoya quiʌ'wejyaju policía te' sacerdote-cowi'na'sta'm y fariseo'sta'm wa'y ñuquiaju.

³³ Pijche'ca ñʌjayaju Jesujsis: Ja'nʌjyʌ' maŋu nya'yu miji'ŋda'm. Jʌ'nʌ'amʌjyʌ' maŋgue'tpa ijtumʌy te' cʌ'wejupʌ'sʌj.

³⁴ Maŋbamisʌj me'tztamu pero ja'namisʌj maŋu mba'ttamu. Te' maŋbamʌ'yʌj ijtu ʌj, mijta'm ja'nmij musi mindamu.

³⁵ Pijche'ca nʌmyaju ñe'co'mo te' judiota'm: ¿Juta'sʌ'ŋ jequeyʌ' maŋba yʌ'wʌ wa'ytyʌ jana mba'ttamu? ¿Quiʌ'maŋbasʌ'ŋ te' judiota'm puŋdijtitnayajupʌ griego'ojmota'm, wa'y 'yaŋmayaju griegota'm?

³⁶ ¿Jutza'sʌ'ŋyʌ' sunba ñʌmu te' ñe'cʌ's chambašej: Maŋbamisʌj me'tztamu y ja'nmisʌj maŋu mba'ttamu? Y: ¿Maŋbamʌ'yʌj ijtu ʌj, ja'nmij musi mindamu?

Te' quenguy mʌja nʌ'šejta'mbʌte'

³⁷ Te' ultimopʌ jama judio's chʌcsʌŋdyʌŋyajpa'c te' sʌŋ, tenaqui'mu Jesús y weju'c nʌmu: Juca iwʌ yoctʌtzpa, yajminʌ ʌ'aŋi wa'y chocopyajcu.

³⁸ Iwʌ'sʌj wʌ'aŋjamba ʌj, te'wʌ's choco'yojmoc maŋba wyomjojcʌtʌjcu mʌja nʌ'šej te' iscuy-quenguy. Te'šej chamba te' Totojaye's.

³⁹ Pero Jesujsis nʌte' inʌc chamu te' Espíritu Santo maŋba pyʌjcʌchoŋyajupʌ jujche'ŋ wyʌ'aŋjamyajpapʌ's ñe'cʌ. Jaminʌ'cmajte' Espíritu Santo, porque Jesús jayajmʌja'ŋa'cmajte' Diojsis.

Eya'eya quipsoyaju te' pʌnda'm

⁴⁰ Wʌwʌ pʌ'nis myatoŋyaju yʌ'šejta'mbʌ tiyʌ chamu'c Jesujsis. Pijche'ca wene pʌn nʌmyaju: Wiyuŋšej yʌ'wʌte' te' tza'maŋwa'oye Diojsistʌ tzamdzi'upʌ.

⁴¹ Eyata'mbʌ nʌmyaju: Yʌ'wʌte' te' Cristo. Pero metza tuca'y pʌn nʌmyajque'tu: ¿Galilea'ojmocja jeque maŋba quieju te' Cristo?

⁴² ¿Ja'nja jeque ñʌmi te' Totojaye que maŋba quieju te' Cristo Davijtis 'yune'ojmocta'm, te' Beleŋ-gumgu'yojmoc, pʌ'najumʌy David?

⁴³ Quipcuy chʌquia'yaju ñe'co'mo te' Jesús.

⁴⁴ Y metza tuca'y pʌ'nis ñe'co'mocta'm sunba inʌc ñuquiaju, pero ya'iwʌ's jañipi'cʌ.

Te' aŋgui'myajpapʌ's ja'n wyʌ'aŋjamyay Jesús

⁴⁵ Pijche'ca te' policia's quiʌ'maŋyaju sacerdote-cowi'na y fariseota'm. Ñe'cʌ'sta'm ñʌjayaju: ¿Y tiyajca'nde' jañuctamʌ?

⁴⁶ Aŋdzoŋyaju te' policiata'm: Yajujche'cmajtʌs jamyatoŋdʌ'ʌ te'šej tzamdzamnapyapʌ pʌn.

⁴⁷ Pijche'ca 'yaŋdzoŋyaju fariseo'sta'm: ¿Nʌtijmijyʌ' 'yaŋgoma'cʌtʌjtaŋgue'tu mijta'm?

⁴⁸ ¿Jutipʌ cowi'na's o fariseo'sa nʌ wyʌ'aŋjamu ñe'cʌ?

⁴⁹ Pero yʌ'wʌ iwʌjana'iwʌ pʌ'niste' nʌ quio'ŋyaju, y te' ja'n myujšapyʌ's aŋgui'mguy. Te'cotoya Diojsis maŋba yajnʌco'aŋgʌyaju.

⁵⁰ Tey inʌc ijtu Nicodemo, quiʌ'tijupʌ's Jesús tzu'cʌsi. Yʌ'wʌ fariseotijte'que' inʌc, y quiʌ'aŋwa'quiaju te' fyariseo-tʌwʌ:

⁵¹ ¿Tzi'tambasʌ'ŋdʌ lugar tʌta'm aŋgui'mgu'yis wa'ytyʌ nyajnʌco'aŋgʌyu pʌn tiyʌ'iwʌ juca ja'ndʌ wina ŋgʌme'tze wa'ytyʌ musjayu quiowa?

⁵² 'Yaŋdzoŋyaju: ¿Y mij Galilea-pʌndyayʌ'que'? Quena y tacscʌme'tza Totojaye'ojmo, ja'itʌmaj yajujche'c Galilea'ojmopʌ tza'maŋwa'oye.

⁵³ Y tumduma'ŋbʌn maŋyaju tyʌjcaŋʌ.