San Juan 6 - Zoque Copainalá New Testament

Pyʌ'nʌyu Jesujsis mosa'y mil pʌn

¹ Jʌsa'ca maŋu Jesús te' Galilea-ma'ra'ocwinduc, y te'wʌtijte'que' Tiberias mar.

² Nʌ inʌc quio'ŋu Jesús wʌwʌ pʌ'nis porque quieñaju jutz inʌc chʌcpa isaŋwʌ'ajcuy wa'y yajtzojcu ca'eta'mbʌ.

³ Y qui'mutʌj Jesusji'ŋ pu'mnacʌsi ŋgʌ'aŋmaye-tʌwʌji'ŋ y maŋutʌj mbocsu tey.

⁴ Nʌ inʌc tyo'mʌyu te' pascua-sʌŋ, quiosʌ'ŋajyajpapʌ inʌc judio'sta'm.

⁵ Quengui'mu Jesús y quienu jutz wʌwʌ pʌn cutzunu'quiaju. Pijche'ca ñʌjayu Felipe: ¿Juta'ndʌ njuytyʌ'pa cu'tcuy wa'ytyʌ mbʌ'nʌyaju yʌ'ta'mbʌ?

⁶ Wa'ytyijte' inʌc chʌjquisu Jesujsis yʌ'šej ñʌjayu. Ñe'cʌ's myuspawʌytya'nde' inʌc tiyʌ maŋba chʌjcu.

⁷ 'Yaŋdzoŋu Felipe's: Majqui's denariojpyʌ pa'ŋis ja'n maŋu quiʌpa'tyaju ni uša'ŋ uša'ŋ wa'y quiu'tyaju tumduma'ŋbʌ'nis.

⁸ Tey inʌc ijtu tumʌ te' Jesujsis quiʌ'aŋmaye ñʌjayajpapʌ Andrés, Simón Pedro's pyotzo. Yʌ'wʌ's ñʌjayu Jesús:

⁹ Yʌy ijtu tumʌ ŋga'e ñʌ'ijtupʌ's mosa'y cebadapʌ pan y metza chicsta'mbʌ coquej. Pero te'še'ŋbʌ cu'tcuy ja'n jyujche'ŋay yʌ' aŋba'tepʌ pʌngotoya.

¹⁰ Pijche'ca Jesús nʌmu: Yajpocsquecpʌ'ya yʌ' pʌnda'm. Y tey pe'chmu'c lugarte' inʌc. Y mosa'y mil pʌnše'ŋoyj pocsquequiaju.

¹¹ Pijche'c pyʌjcu Jesujsis te' pan y ñʌjayu Dios yʌscotoya. Pijche'ca we'nbʌ'jayutʌj jujche'ŋdʌj quiʌ'aŋmaye, y tʌsa maŋutʌs sajne'ŋbʌ'u mumu te' pocšajupʌ'ojmo. Y sajque'tutʌs te' coquej, y cu'tyaju šuñajuše'ŋ.

¹² Tajšaju'ca te' pʌnda'm, nʌjayutʌj Jesujsis: Piŋdu'mʌytyamʌ te' cu'tcʌchʌ'yʌ uy tyocoyu'ŋmʌjcʌ ni uša'ŋ.

¹³ Mbiŋdu'mʌyutʌs jeque, y njo'ʌquie'tumajtʌs macwʌstʌjca'y waca te' cu'tcʌchʌ'yaŋbit. Te'še'ŋ tzʌ'yu te' cu'tcʌchʌ'yaŋ cu'tyaju'ca myuma'ŋgʌ'y te' mosa'pyʌ cebadapʌ pan.

¹⁴ Quieñaju te' pʌ'nista'm te' isaŋwʌ'ajcuy chʌjcupʌ Jesujsis. Te'cotoya nʌmyaju: Wiyuŋšej yʌ'wʌte' te' tza'maŋwa'oye maŋba inʌc minupʌ najsacopajcʌsi.

¹⁵ Pero ñʌctʌ'yu Jesujsis que maŋba inʌc miñaju wa'y jyupcʌtʌjcʌyaju wa'y quiojtyaju re'yajcu'yojmo. Pijche'ca ca'ŋjʌcʌ'u tey y qui'mwʌtzʌjque'tutij ñaytyumʌ pu'mnacʌsi.

Ca'ŋu Jesús ma'ranʌ'cʌsi

¹⁶ Y nʌ'ca chu'yanʌmu, tʌj te' cʌ'aŋmaye, wanajcutʌj ma'ra'acapoyo'mo.

¹⁷ Tʌjcʌyutʌj barco'ojmo y nyajtu'ŋajcʌ'yutʌs wa'ytyʌs njajcu te' mar wa'ytyʌj nu'cu Capernaum-gumgu'yojmo. Pi'tza' inʌc y Jesús ja'n inʌc quieye.

¹⁸ Y te' maya'aŋbʌ sawa's yajtepsqui'mcʌ'yu te' mar.

¹⁹ Y nyajemdu'ŋaju'candʌs te' barco tumʌ leguaše'ŋoyj ŋguenutʌs Jesús ca'ŋba nʌ minu marcʌsi wa'y ñu'cu te' barco'aŋi, y na'tzutʌj.

²⁰ Pero nʌjayutʌj ñe'cʌ's: Ʌjyʌ', uy na'tztame.

²¹ Pijche'ca oma'omatʌs nyajtʌjcʌyu te' barco'ojmo. Y jʌnʌjtya' nu'cu te' barco te' nʌtʌj maŋupʌ najsoyj.

Minu mye'chaju Jesús pʌ'nista'm

²² Jo'pit te' ma'ra'ocwinduc tzʌ'yajupʌ's myujšajpa inʌc que tumʌtij inʌc ijtu te' barco. Quieñaju que jamyawʌ Jesús tʌji'ŋ porque ŋgʌ'wi'ŋgʌ'ytyijtʌ tzu'cumu.

²³ Pero miñaju eyata'mbʌ barco Tiberias-cumgu'yojmoc. Y nu'quiaju tome quienbamʌy te' lugar tijumʌy wyi'quiaju pan te' pʌ'nista'm, ñʌjayu'c yʌscotoya Dios tʌ Ngomi's.

²⁴ Quieñaju te' pʌ'nista'm que ja'ndiyʌ inʌc tey Jesús ni tʌj te' quiʌ'aŋmayeta'm. Pijche'ca tʌjcʌyaju te' barco'ojmota'm y maŋyaju te' Capernau'ŋojmo wa'y mye'chaju Jesús.

Jesuste' te' pan quenguquiotoya

²⁵ Y pya'tyaju'ca ma'ra'ocwinduc, ñʌjayaju: Maestro, ¿jujche'ca ñu'cu yʌy?

²⁶ 'Yaŋdzoŋyaju Jesujsis: Wiyuŋše'ʌsmij nwiyuŋdzamjaytyamba: Nʌmisʌj me'tztamu ja'n porque nʌmis ŋguendamu ʌs ndzʌjcupʌ isaŋwʌ'ajcuy. Me'tztambamisʌj porque mbʌ'nʌytyamu'ʌsmij hasta que ñdyastamumij.

²⁷ Yostamʌ, ja'n na' wa'mis mba'ttamu yajpapʌ cu'tcuy, sino que wa'mis mba'ttamu ja'n yayepʌ cu'tcuy. Ʌs, te' Pʌ'nis 'Yune's, sunba'ʌsmij ndzi'tamu cu'tcuy ja'n yayepʌ quenguquiotoya. Porque ʌj copiŋu Ndata Diojsis wa'yʌsmij ʌs ndzi'tamu.

²⁸ Y ñʌjayaju Jesús: ¿Tiya'ndʌs ndzʌctʌ'wa'a wa'ytyʌs ndzʌjcu Diojsis šunbašej?

²⁹ 'Yaŋdzoŋyaju Jesujsis: Yʌ'šejte' šunba Diojsis wa'mis ndzʌctamu, wa'misʌj nwʌ'aŋjamdamu ʌj, porque Diojsisʌjyʌ' cʌ'weju.

³⁰ Te'cotoya quiʌ'aŋwa'quiajque'tu Jesús: ¿Tiyʌ isaŋwʌ'ajcu'ya jeque ndzʌcpa mis wa'ytyʌs ŋguenu, y wa'ytyʌsmij nwʌ'aŋjamu? ¿Tiyʌ tzʌqui'a ndzʌcpa mis?

³¹ Tʌs ndata'a'ŋucu'sta'm quiu'tyaju maná te' ja'itʌnʌmʌmʌy. Porque yʌ'šejte' ja'yʌyu: Yajwi'quiatʌju pan wanajcupʌ tzajpojmoc.

³² Jesujsis ñʌjayaju: Wiyuŋše'ʌsmij nwiyuŋdzamjaytyamba: Ja'nde' Moisejsismij ñchi'tamu te' pan wanajcupʌ tzajpojmoc, sino que ʌste' Ndata'smij ñchi'tamba te' wiyuŋšejpʌ pan wanajcupʌ tzajpojmoc.

³³ Porque te' pan šajpapʌ Ndata Diojsis, te'wʌte' wanajcupʌ tzajpojmoc, y ñe'cʌ'ste' maŋba chi'yaju quenguy te' najsacopajcʌsita'mbʌ pʌn.

³⁴ Ñʌjayaju te' judio'sta'm: Señor, tzi'jojcʌtʌcʌtʌj te'šejpʌ pan.

³⁵ Y ñʌjayaju Jesujsis: Ʌjte' te' pan šajpapʌ's iscuy-quenguy mumu pʌngotoya. Iwʌ'sʌj cʌ'minba ʌj ja'na yu'que'temaj. Y iwʌ'sʌj wʌ'aŋjamba ʌj, ja'na yoctʌtzque'temaj.

³⁶ Pero ndzamjaytyamwa'mʌsmij ñempe misʌj ŋguendamʌ ja'nmisʌj nwʌ'aŋjamdame.

³⁷ Mumu jujche'ŋ quiopiŋba Diojsis wa'yʌj wʌ'aŋjamyajupʌ's, maŋba'ʌj cʌ'miñaju. Y iwʌ'sʌj cʌ'minba ja'nʌs macwinduqui.

³⁸ Porque wanajcu'ʌj tzajpojmoc, ja'n wa'yʌs ndzʌjcu ne' su'noquiuy, sino que wa'yʌs ndzʌjcu šunbašej te' cʌ'wejupʌ'sʌj.

³⁹ Ʌs Ndata'sʌjte' cʌ'weju, y ñe'cʌ's šunba u'yʌs nyajtocoyu ni tumʌc ñe'cʌ's quiopiŋyajupʌ wa'yʌj wʌ'aŋjamyaju. Šunba wa'yʌs nyajwinsa'yaju te' ultimopʌ jamo'oyj.

⁴⁰ Y yʌ'šej šunba ʌs Ndata's: Jujche'ŋ iwʌ'sʌj ispʌcpa que ʌjte' te' Diojsis 'Yune, y wʌ'aŋjamba'ʌj, pya'tpa ja'n yayepʌ quenguy. Y ʌs maŋba'ʌs nyajwinsa'u ultimopʌ jamo'oyj.

⁴¹ Pijche'ca te' judio'sta'm ñu'motoŋgʌ'yjayaju Jesús porque nʌmu: Ʌjte' te' pan wanajcupʌ tzajpojmoc.

⁴² Y nʌmyajpa inʌc: ¿Ja'nja jeque te' yʌ'wʌ te' Jesús, te' Jose'is 'yune? Ispʌcjaytyambatʌ tyataj y ñanaj. ¿Tiyajca' jequeyʌ' nʌmba: Tzajpojmojcʌjyʌ' wanajcupʌ?

⁴³ Jesús aŋdzoŋu: Uy nu'motoŋdame ne'co'mota'm.

⁴⁴ Ya'iwʌ ja'n musi minu ʌ'aŋi juca ʌs Ndata Diojsis ja'n yajpononajay chocoy. Y te' cʌ'miñajpapʌ'sʌj maŋba'ʌs nyajwinsa'u ultimopʌ jamo'oyj.

⁴⁵ Yʌ'šej jya'yʌyaju tza'maŋwa'oyajpapʌ's: Diojsis maŋba 'yaŋmayaju mumu pʌn. Te'cotoya mumu iwʌ's quiʌmato'ŋʌpya tʌ Ndata Dios y aŋmapya, cʌ'minba'ʌj.

⁴⁶ Ja'nde' suni ñʌmu juca iwʌjutiwʌ's quienu Dios. Ʌstijte' ŋguenu porque ñe'cʌ ijtumʌ'yʌj tzu'cumu.

⁴⁷ Wiyuŋše'ʌsmij nwiyuŋdzamjaytyamba: Iwʌ'sʌj wʌ'aŋjamba ʌj, pya'twa'a ja'n yayepʌ quenguy.

⁴⁸ Ʌjte' te' pan chi'yajpapʌ's mumu pʌn iscuy-quenguy.

⁴⁹ Tʌta'm ndata'a'ŋucu's quiu'tyaju te' maná te' ja'itʌnʌmʌmʌy, pero te'wʌ's jachi'ya ja'n yayepʌ quenguy.

⁵⁰ Pero ʌjte' te' pan wanajcupʌ tzajpojmoc. Iwʌ's wyi'cpa yʌ' pan ʌs maŋba'ʌs ndzi'u ja'n yayepʌ quenguy.

⁵¹ Ʌjte' te' pan wanajcupʌ tzajpojmoc, y šajpapʌ's quenguy. Juca iwʌ's wyi'cpa yʌ' pan, maŋba pya'tu ja'n yayepʌ quenguy. Y te' pan ʌs maŋba ndzi'oquia'upʌ, ʌste' ŋgüerpo. Ndzi'oquia'pa'ʌs wa'y pya'tyaju iscuy-quenguy najsacopajcʌsita'mbʌ's.

⁵² Pijche'ca quipotoŋgʌ'yaju judiota'm, y nʌmyajpa inʌc: ¿Jutza'ndʌ muspa tzi'u yʌ' pʌ'nis ñe' cuerpo jujcha' cu'tcupyʌ tiyʌ wa'ytyʌ ŋgʌ'sjaytyamu šis.

⁵³ Jesujsis ñʌjayaju: Ʌjte' te' Pʌ'nis 'Yune, y juca ja'nmis ŋgʌ'sjaytyame ʌs sis y ndo'ŋjaytyame ʌs nʌ'pin, ja'ndiyʌ mista'm iscuy-quenguy ndzoco'yojmo.

⁵⁴ Iwʌ's quiʌ'sjapya ʌs sis y tyo'ŋjapya ʌs nʌ'pin pya'twa'a ja'n yayepʌ quenguy, y maŋba'ʌs nyajwinsa'u ultimopʌ jamo'oyj.

⁵⁵ Porque te' ʌs sis wiyuŋšejpʌ cu'tcuyšejpʌte', y te' ʌs nʌ'pin wiyuŋšejpʌ to'ŋguyšejpʌte'.

⁵⁶ Iwʌ's quiʌ'sjapya ʌs sis y tyo'ŋjapya ʌs nʌ'pin, ʌs ndzoco'yojmo itjojcʌtʌcpa y ʌj ñe' choco'yojmo itpa.

⁵⁷ Ʌs Ndata Dios ñe' pyʌmipit quengu'yʌyu, y ñe'cʌ'sʌj cʌ'weju. Y jutzʌj ʌj ñe'cʌpit quengu'yʌyu, te'šej iwʌ's quiʌ'sjapya ʌs sis pya'twa'a ʌjpit te' ja'n yayepʌ quenguy.

⁵⁸ Ʌjte' te' pan wanajcupʌ tzajpojmoc. Ja'nde' jujcha' te' maná quiu'tyajupʌ tʌ ndata'a'ŋucu'sta'm, pero te'wʌ's jachi'ya ja'n yayepʌ quenguy.

⁵⁹ Yʌ'šejta'mbʌ tiyʌ chamu Jesujsis te' judio'sta'm wyindʌjcojmo, nʌ'c 'yaŋma'yoyu'c Capernaum-gumgu'yojmo.

Tiyʌta'm chamu Jesujsis, ja'n yayepʌ quenguquiotoyate'

⁶⁰ Y soneta'mbʌ quiʌ'aŋmaye's myatoŋyaju y nʌmyaju: Jene na'chaŋda'mbʌ tiyʌ chamba, ¿iwʌ'sasʌ'ŋ muspa ñʌtu'ŋaju?

⁶¹ Ñʌctʌ'yu Jesujsis ñe' choco'yojmo que te' quiʌ'aŋmaye nu'motoŋyajpa inʌc te' chamupʌ tiyʌpit. Pijche'ctij ñʌjayaju: ¿Ñchʌcna'tztamba yʌ'šejta'mbʌ tiyʌ's?

⁶² ¿Tiya'sʌ'ŋmis maŋba ŋguipstamu juca ŋguendambamisʌj, ʌj te' Pʌ'nis 'Yune, nʌ'camʌj ŋgui'mu'c tzajpojmo ijtumʌ'yʌj inʌc wina?

⁶³ Tʌ espiritu'stʌ tzi'pa quenguy, tʌ ŋgüerpo's ja'n quiotzowe. Y te' ʌs ndzamyajupʌ tiyʌ espiritute' y quenguytye'.

⁶⁴ Pero ijtu mi'ojmota'm ja'n wyʌ'aŋjamyapyʌ's. Porque myuspa inʌc Jesujsis desde tzo'tzcu'yojmo iwʌ'sta'm ja'n inʌc wyʌ'aŋjamyay, y iwʌ's inʌc maŋba chi'oquia'u.

⁶⁵ Y nʌmu: Te'cotoya'ʌsmijte' nʌjaytyamu que ya'iwʌ'sʌj ja'n maŋu cʌ'minu juca ʌs Ndata Diojsis ja'n yajpononajay chocoy.

⁶⁶ Pijche'c chaquiaju Jesús soneta'mbʌ quiʌ'aŋmaye's y jawyijtyajque'tamaj ñe'cʌji'ŋ.

⁶⁷ Pijche'ca tʌj, te' macwʌstʌjca'pyʌ quiʌ'aŋmaye, cʌ'aŋwa'cutʌj Jesujsis, y nʌjayutʌj: ¿Sunbaja'ʌj ndzactaŋgue'tu mista'm?

⁶⁸ 'Yaŋdzoŋu Simón Pedro's: Señor, juca ndzacpatʌsmij, ¿iwa'ndʌs ŋgʌ'maŋba? Mis ndzambamis tiyʌ'stʌ tzi'pa ja'n yayepʌ quenguy.

⁶⁹ Y tʌs nwʌ'aŋjambatʌs y ispʌcbatʌsmij que mijte' te' Cristo. Mijte' te' Diojsis 'Yune, te' Diojsis ñe' pyʌmipit quengu'yʌyupʌ.

⁷⁰ Y aŋdzoŋutʌj Jesujsis: Mijta'm te' macwʌstʌjca'ytya'mbʌ, ʌsmijte' ŋgopiŋdamupʌ. Pero mi'ojmota'm ijtu tumʌ ñʌc'ijtʌyupʌ yatziwʌ's.

⁷¹ Te' Judas te' inʌc nʌ chamu, Simón Iscariote's 'yune, te' maŋbapʌ's inʌc chi'oquia'u. Te'wʌ nʌcma'yʌyupʌte' macwʌstʌjca'pyo'mo.